Read Bhaibhiri Idzva rechiShona 2 Nhoroondo 11 Bible Online

2 Nhoroondo 11 - Bhaibhiri Idzva rechiShona bible

2 Nhoroondo 11

¹Rehobhoamu paakasvika kuJerusaremu, akaunganidza vemba yokwaJudha nevokwaBhenjamini zana namakumi masere ezviuru zveshasha chaidzo dzokurwa hondo kundorwisa vokwaIsiraeri kuitira kuti vadzorere nyika kuna Rehobhoamu.

²Asi shoko raTenzi rakauya kuna Shemaya munhu waMwari,

³rikati, “Iti kuna Rehobhoamu mwanakomana waSoromoni mambo wokwaJudha nokuvaIsiraeri vose vari kwaJudha nokwaBhenjamini,

⁴zvanzi naTenzi, ‘Regai kuenda uye musarwisane nehama dzenyu. Munhu wose kumusha nokuti zvinhu izvi zvakabva kwandiri.’ ” Saizvozvo vakateerera zvakarehwa naTenzi ndokudzokera zvavo, vakarega kundorwisa Jerobhoamu.

⁵Rehobhoamu aigara muJerusaremu. Akavakirira muJudhamo maguta okuzvidzivirira muhondo.

⁶Akavaka Bheterehemu neEtamu neTekoa

⁷neBhetizuri neSoko neAdhuramu

⁸neGati neMaresha neZifu

⁹neAdhoraimu neRakishi neAzeka

¹⁰neZora neAiyaroni neHebhuroni, maguta etsvingo ari kwaJudha nokwaBhenjamini.

¹¹Akasimbisa tsvingo dzacho akaisamo vatungamiriri vehondo namatura ezvokudya namafuta newaini.

¹²Akaisawo nhoo namapfumo mumaguta ose iwayo akaasimbisa zvikuru kwazvo. Iwaya ndiwo makwanisiro aakaita kutonga kwaJudha nokwaBhenjamini.

¹³Vapristi nevaRevhi vaiva muIsiraeri yose zvayo vakaunganidzana kwaari kubva kumatunhu avo ose

¹⁴nokuti vaRevhi vakanga vatobva kumaruwa nokumisha yavo vatamira kwaJudha nokuJerusaremu pamusana pokuti Jerobhoamu navana vake vakomana vakavadzinga basa roupristi rokushandira Tenzi,

¹⁵akazvisarudzira vanhu kuti vave vapristi vomunzvimbo dzakatunhumara dzokuteurira, vezvifananidzo zvembudzi zvokunamata nezvimhuru zvaakanga agadzira.

¹⁶Vamwewo vaiva nemwoyo wokutsvaka Tenzi, Mwari weIsiraeri vakavateverawo kubva kumadzinza ose eIsiraeri vakaenda kuJerusaremu kundopira zvibayiro kuna Tenzi, Mwari wamadzibaba avo.

¹⁷Vakasimbisa umambo hwokwaJudha kwemakore matatu vakatsigirana naRehobhoamu mwanakomana waSoromoni vakapedza makore matatu vachitevera gwara raDhavhidhi naSoromoni.

¹⁸Rehobhoamu akaroora mukadzi ainzi Maharati aberekwa naJerimoti mwanakomana waDhavhidhi amai vake vari Abhihairi vaberekwa naEriabhu mwanakomana waJese.

¹⁹Iye akamuberekera vana vakomana ava vanoti: Jeushi naShemariya naZahamu.

²⁰Mushure maiyeyu akaroorawo Maaka mwana waAbhusharomu iyewo akamuberekera Abhiya naAtai naZiza naSheromiti.

²¹Rehobhoamu aida Maaka mwanasikana waAbhusharomu kupinda vamwe vose vakadzi vake navarongo. (Akaroora vakadzi gumi navasere navarongo makumi matanhatu uye aiva navana vakomana makumi maviri navasere vana vasikana makumi matanhatu.)

²²Rehobhoamu akapa Abhiya mwanakomana waMaaka ukuru hwokutonga vakoma nevanun'una vake achiitira kuti azomugadza umambo.

²³Rehobhoamu akaita zvine ungwaru akagovanisa vamwe vanakomana vake mumatunhu okwaJudha neekwaBhenjamini mumaguta ose etsvingo achivawanisa zvokudya zvakawanda nokuvaroorera vakadzi vazhinji.