Read Bhaibhiri Idzva rechiShona 2 Nhoroondo 12 Bible Online

2 Nhoroondo 12 - Bhaibhiri Idzva rechiShona bible

2 Nhoroondo 12

¹Umambo hwaRehobhoamu hwakati zvino hwasimba hwanyatsodzika midzi akakanda pasi zvomutemo waTenzi pamwechete neIsiraeri yose.

²Mugore rechishanu rokutonga kwamambo Rehobhoamu pamusana pokuti vakanga vasina kutendeseka kuna Tenzi, Shishaki mambo weIjipiti akauya kuzorwisa Jerusaremu

³aine ngoro dzehondo dzamabhiza chiuru chimwechete chine mazana maviri navachairi vadzo zviuru makumi matanhatu. Varwi vaakauya navo vakanga vasingaverengeki vaakabva navo kuIjipiti vaiti vaRibhiya navaSuki navaEtiopia.

⁴Akakurira maguta etsvingo okwaJudha ndokuenda akananga kuJerusaremu.

⁵Zvino muporofita Shemaya akasvika paiva pakaunganidzana Rehobhoamu navatungamiriri vokwaJudha vakanga vari muJerusaremu pamusana paShishaki, akati kwavari, “Zvanzi naTenzi, ‘Imi makandiramwaka imi! Zvino iniwo ndakuramwirai mumaoko aShishaki.’ ”

⁶Vatungamiriri veIsiraeri namambo vakazvirereka vakati, “Mwari ndiye mururami.”

⁷Tenzi paakaona kuti vazvirereka shoko raTenzi rakauya kuna Shemaya richiti, “Zvavazvirereka kudai ini handichavaparadza ndichavanunura. Zvokunge ndichashandisa Shishaki kuratidza kuvirukira kwangu Jerusaremu nehasha, handichaita.

⁸Asi zvokuva varanda vake, vachava varanda vake vagoona kusiyana kwakaita kushandireni nokushandira madzimambo edzinyika.”

⁹Ipapo Shishaki mambo weIjipiti akasvikorwisa Jerusaremu akapamba upfumi hwepamba yaTenzi noupfumi hwomumuzinda wamambo, akakukucha zvose. Akapambawo nhoo dzendarama dzakanga dzagadzirwa naSoromoni.

¹⁰Mambo Rehobhoamu akagadzira nhoo dzendarira panzvimbo yadzo. Akadziisa mumaoko avakuru vakuru vaichengetedza pamusuo womuzinda wamambo.

¹¹Nguva dzose dzaipinda mambo mumba yaTenzi vokuchengetedza ava vaiuya vodzibatira mumaoko vozodzidzosera zvavo mumba yevokuchengetedza.

¹²Paakazvininipisa Tenzi akarega kumuvirukira nehasha; saizvozvo, haana kubva amuparadza. Naichowo chiri chokwadi kuti maJudha zvinhu zvakanga zvakanaka.

¹³Mambo Rehobhoamu akadzika midzi muJerusaremu akatonga. Rehobhoamu akanga ava namakore makumi mana nerimwechete paakatanga kutonga. Akatonga kwamakore gumi nemanomwe ari muJerusaremu, guta rakasarudzwa naTenzi pamadzinza ose kuti aisepo zita rake. Zita raamai vake ndiNaama, muAmoni.

¹⁴Akaita zvakaipa nokuti haana kutsvaka Tenzi nomwoyo wose.

¹⁵Inga dzimwe nyaya dzezvaRehobhoamu kubvira pakutanga kusvika pokupedzisira dzakanyorwa muBhuku reNhoroondo dzomuporofita Shemaya nomuoni Idho. Hondo yakaramba ichingovapo pakati paRehobhoamu naJerobhoamu.

¹⁶Rehobhoamu akazovata oendawo kwakaenda vamwe, madzitateguru ake, akavigwa muguta raDhavhidhi. Mwanakomana wake Abhiya ndiye akazotonga panzvimbo pake.