Read Bhaibhiri Idzva rechiShona 2 Nhoroondo 13 Bible Online

2 Nhoroondo 13 - Bhaibhiri Idzva rechiShona bible

2 Nhoroondo 13

¹Mugore regumi nechisere rokutonga kwaMambo Jerobhoamu, Abhiya akava mambo wokwaJudha.

²Akatonga kwamakore matatu ari muJerusaremu. Amai vake vainzi Mikaya mwana waUrieri vokuGibheya. Paiva nehondo pakati paAbhiya naJerobhoamu.

³Abhiya akaenda kundorwa aina magamba chaiwo okurwa hondo namazana mana ezviuru zveshasha chaidzo dzokurwa hondo. Jerobhoamu akaronga varwi vake kuti achirwa naye, vaive vari mazana masere ezviuru zvamagamba chaiwo eshasha dzokurwa hondo.

⁴Abhiya akamira pamusoro pegomo reZemaraimu riri munyika yokwaEfuremu yamakomo, akadaidzira achiti, “Iwe Jerobhoamu nemi vaIsiraeri mose chimbonditeererai munzwe!”

⁵“Hamuzive here kuti Tenzi, Mwari weIsiraeri akapa narini wose umambo hwokwaIsiraeri kuna Dhavhidhi nokuvanakomana vokwake achizviita nepfirapo yechitenderano chomunyu?

⁶“Kunyange zvakadaro gurukota raSoromoni mwanakomana waDhavhidhi, Jerobhoamu mwanakomana waNebhati akasimuka akapandukira tenzi wake.

⁷Mamwewo madzenga avanhu vasina maturo vakaunganidzana kwaari, vakazvidza Rehobhoamu mwanakomana waSoromoni, izvozvo akanga achiri mudiki asina chivindi haana kugona kumirisana navo.

⁸Zvino ndopamungatiwo mumirisane nenyika yaTenzi yaarikutonga navanakomana vokwaDhavhidhi muchivimba nokuwanda kwamakaita uku nezvimhuru zvendarama zvamunazvo zvamakagadzirirwa naJerobhoamu kuti zvive vamwari venyu here.

⁹Hamuna here imi kudzinga vapristi vaTenzi, vanakomana vokwaAroni navaRevhi, mukazviitira vapristi sezvinongoitawo mamwe marudzi edzimwe nyika? Anoti nomunhu wose anenge angouyawo zvake nehandira ichiri duku kana nehondohwe nomwe ndizvozvo obva anzi atova mupristi wezvinhu zvisiri Mwari.

¹⁰Asi kwatiri isu, Tenzi ndiye Mwari wedu, uye hatina kumufuratira. Tine vapristi vanoshandira Tenzi, vari vanakomana vokwaAroni navaRevhi pabasa ravo irori.

¹¹Mangwanani oga oga namanheru oga oga, vanopira kuna Tenzi mipiro yokupisa norusenzi runonhuwirira vachironga chingwa chepana Mwari patebhuru yendarama yakachenurwa, vanoonawo nezvechigadzikiro chemwenje chendarama kuti marambi acho avheneke manheru oga oga nokuti isu tinochengeta zvakanzi naTenzi, Mwari wedu zviitwe, asi imi makamuramba.

¹²Chinzwai, Mwari anesu, ndiye ari kutungamirira, uye vapristi vake nemabhosvo engondo okurudzira kuti tichikurwisai. VaIsiraeri we-e regai kurwisa Tenzi, Mwari wemadzibaba enyu nokuti hamumbozvikwanisa.”

¹³Izvozvo Jerobhoamu akanga atotumira vokundovahwandira necheseri. Nokudaro vokwaJudha vakanga voti mberi vatarisana nehondo, shure kune vokuvahwandira vaye.

¹⁴VokwaJudha vakati cheu, onei kwachiti hondo mberi, nehondo shure.

¹⁵Vakachema kuna Tenzi, vapristi vakaridza mabhosvo. Kuvarwi vokwaJudha ngondo ikati yarira. Varwi vokwaJudha pavakaridza ngondo kudaro, Mwari akakurira Jerobhoamu nevokwaIsiraeri vose, Abhiya novokwaJudha vachiona.

¹⁶Varwi vokwaIsiraeri vakati ware kutiza vokwaJudha. Mwari ndokuvaisa mumaoko avo.

¹⁷Abhiya navarwi vakavaita murakatira kuuraya, kukafiwa nevokwaIsiraeri mazana mashanu ezviuru zveshasha chaidzo dzokurwa hondo.

¹⁸Saizvozvo vokwaIsiraeri vakakurirwa. Panguva iyoyo vokwaJudha vakakunda nokuti vakavimba naTenzi, Mwari wamadzibaba avo.

¹⁹Abhiya akaronda Jerobhoamu akamutorera maguta aya anoti Bhetieri nemisha yaro, neJeshama nemisha yaro neEfuroni nemisha yaro.

²⁰Jerobhoamu haana kuzovazve nesimba panguva yaAbhiya. Tenzi akazomurova akafa.

²¹Asi Abhiya akava nesimba, akaroora vakadzi gumi navana aivawo nevanakomana makumi maviri ana vaviri navanasikana gumi navatanhatu.

²²Inga dzimwe nyaya dzezvaAbhiya namaitiro ake nezvaakataura zvakanyorwa wani muBhuku romuporofita Idho.