Read Bhaibhiri Idzva rechiShona 2 Nhoroondo 14 Bible Online

2 Nhoroondo 14 - Bhaibhiri Idzva rechiShona bible

2 Nhoroondo 14

¹Saizvozvo Abhiya akazovata oendawo kwakaenda vamwe madzitateguru ake. Mwanakomana wake Asa ndiye akazotonga panzvimbo pake. Mumazuva ake nyika yakava norunyararo kwegumi ramakore.

²Asa akaita zvakarurama zvinodiwa naTenzi, Mwari wake.

³Akabvisa zveatari dzisiridzo nenzvimbo dzakatunhumara dzokuteurira akapwanya zvifananidzo zvokunamata, zvemabwe akatema-tema zvifananidzo zvokunamata zviAshera.

⁴Akaudza vokwaJudha kuti vachitsvaka Tenzi, Mwari wamadzibaba avo nokuchengeta mutemo nomurao.

⁵Akabvisawo mumaguta ose okwaJudha nzvimbo dzakatunhumara dzokuteurira. Mumaoko ake, nyika yakaita runyararo.

⁶Akavaka maguta etsvingo okwaJudha nokuti nyika yaiva murunyararo. Hakuna kumboitika hondo kwaari mumakore iwaya nokuti Tenzi akamupa zororo.

⁷Akati kune vokwaJudha, “Ngativakiridzei maguta aya tiapoteredze netsvingo nenharire nemisuo mikuru nezvihuri. Nyika iyi ichiri yedu pamusana pokuti takatsvaka Tenzi, Mwari wedu. Takamutsvaka akabva atipa runyararo kumativi kwose.” Naizvozvo vakavaka, vakabudirira.

⁸Asa uyu aiva nezviuru mazana matatu zvavarwi vaiva nezvombo zvehondo, namapfumo nenhoo, navarwi zviuru mazana maviri namakumi masere vokwaBhenjamini vari vokutakura nhoo nokupfura nemiseve. Vose ivava vaiva mvumba chaidzo dzamagamba okurwa hondo.

⁹Mumwe muEtiopia ainzi Zera akauya kuzovarwisa aine varwi vehondo zviuru zvinokwana chiuru chaicho, nengoro dzehondo mazana matatu akasvika kuMaresha ikoko.

¹⁰Asa akamubudira vakaronga hondo dzavo kuti vachirwa mubani rokwaZefata kuMaresha.

¹¹Asa akachema kuna Tenzi, Mwari wake achiti, “Tenzi we-e! Hakuna akaita semi angabatsire panenge pasangana vane simba navasina simba kudai. Tibatsireiwo Tenzi, Mwari wedu nokuti tinovimba nemi. Tauya kuzorwisa gurusvusvu ravanhu iri muzita renyu. Imi Tenzi ndimi Mwari wedu. Regai kuti munhu akukurirei.”

¹²Naizvozvo Tenzi akapa kuti vaEtiopia vakundwe naAsa nevokwaJudha. VaEtiopia vakati ware kutiza.

¹³Asa navanhu vaaiva navo akadzingirirana navo kusvikira kuGerari. VaEtiopia vakaita murakatira kufa pakasara pasisina mupenyu. VaEtiopia vakaitiswa chimwanda-mwanda naTenzi nehondo yake. VokwaJudha vakakukucha zvinhu zvizhinji zvokupamba.

¹⁴Vakarasha maguta ose emudunhu reGerari nokuti kutya Tenzi kwakanga kwavabata. Vakapamba zvinhu mumaguta ose iwayo. Zvokupamba zvakanga zvakawanda imomo.

¹⁵Vakaparadzawo matendhe avafudzi vemombe. Vakatakura matanga namatanga ehwai, nenghamera, ndokudzokera Jerusaremu.