Read Bhaibhiri Idzva rechiShona 2 Nhoroondo 15 Bible Online

2 Nhoroondo 15 - Bhaibhiri Idzva rechiShona bible

2 Nhoroondo 15

¹Mweya waMwari wakauya pana Azariya mwanakomana waOdhedhi.

²Akaenda kundosangana naAsa akati kwaari, “Iwe Asa nemi mose vokwaJudha novokwaBhenjamini imbonditeereraiwo munzwe, Tenzi anemi kana imi muinaye. Mukamutsvaka manomuwana. Asi imi mukamufuratira, anokufuratiraiwo.

³Kwakamboitika nguva ndefu Isiraeri isina Mwari wechokwadi isina mupristi wokuvadzidzisa isinawo mutemo.

⁴Asi pavakanga vava munhamo yavo vakatendeukira kuna Tenzi, Mwari weIsiraeri vomutsvaka zvino, vakamuwana.

⁵Mumazuva iwayo kwakanga kusina rugare zvokuti kufamba chaiko kwakanga kwava nenjodzi nokuti pakava namanyongori asingatauriki muvanhu vose venyika idzodzi.

⁶Umharadzi hwakanga hwapinda, rudzi rwakamukirana norudzi, guta richimukirana nerimwe guta pamusana pokuti Mwari aivapinza mumhando nemhando dzenhamo.

⁷Asi imi tsungai mwoyo musaregedzere maoko nokuti pabasa renyu iroro, muchapiwa mubayiro.”

⁸Asa paakanzwa mashoko iwaya okuporofita kwomuporofita wokwaOdhedhi, akatsunga mwoyo akabva abvisa zvifananidzo zvokunamata zvisingadiwi naMwari munyika yose yokwaJudha nokwaBhenjamini nokumaguta aakanga akurira kunyika yokwaEfuremu yamakomo. Akagadzira atari yaTenzi iya yaiva pamberi pekamba kepamusuo wemba yaTenzi.

⁹Akaunganidza vose vokwaJudha nevokwaBhenjamini nevokwaEfuremu nevokwaManase nevokwaSimeoni vakanga vava kugara kwake nokuti vanhu vazhinji vakatizira kwaari vachibva kwaIsiraeri paya pavakaona kuti Tenzi, Mwari wake anaye.

¹⁰Vakaunganidzwa muJerusaremu mumwedzi wechitatu wegore regumi nechishanu rokutonga kwaAsa.

¹¹Vakapira zvibayiro kuna Tenzi musi iwoyo zvavakatora pazvinhu zvokupamba zvavakanga vauya nazvo zvamazana manomwe emombe nezviuru zvinomwe zvehwai.

¹²Vakaita chibvumirano chokutsvaka Tenzi, Mwari wamadzibaba avo nomwoyo wavo wose nomweya wavo wose

¹³uye kuti: kuwana asingatsvake Tenzi, Mwari weIsiraeri anofanira kuurayiwa angave mukuru kana mudiki murume kana mukadzi.

¹⁴Vakatsidza nemhiko kuna Tenzi, Mwari weIsiraeri nezwi riri pamusoro vachiita zvokudaidzira, uye nebhosvo nehwamanda.

¹⁵VokwaJudha vose vakafarira mhiko iyi nokuti vakanga vatsidza nomwoyo wavo wose vamutsvaka nomwoyo unoda akawanikwa. Tenzi ndokubvawo avapa runyararo kumativi ose.

¹⁶Kunyange ambuya vake Maaka, mambo Asa akavabvisa pachigaro chavo chouhosi hwokwamambo nokuti vakanga vagadzira chifananidzo chokunamata chokumiririra Ashera chisingambodiwa zvacho naMwari. Asa akatemera pasi chifananidzo chavo ichocho akachityora-tyora akachipisira kukakova keKidhironi.

¹⁷Asi nzvimbo dzakatunhumara dzokuteurira hadzina kubviswa muIsiraeri. Zvakadaro zvazvo, Asa uyu aiva munhu ane mwoyo wakarurama mazuva ohupenyu hwake hwose.

¹⁸Akaunza mumba yaMwari zvipo zvakanga zvatsidzwa nababa vake kupa kuna Mwari nezvipowo zvake zvaakanga atsidza kupa kuna Mwari zvesirivha nendarama nemidziyo.

¹⁹Zvehondo zvakamboti zii kudzamara gore ramakumi matatu nechishanu rokutonga kwaAsa.