Read Bhaibhiri Idzva rechiShona 2 Nhoroondo 16 Bible Online

2 Nhoroondo 16 - Bhaibhiri Idzva rechiShona bible

2 Nhoroondo 16

¹Mugore ramakumi matatu nechitanhatu rokutonga kwaAsa, mambo wokwaIsiraeri akandorwisa kwaJudha akavakirira guta reRhama kuitira kuti awane marambidziro vanhu kubva kwaAsa mambo wokwaJudha kana kuendako.

²Asa akatora sirivha nendarama upfumi hwepamba yaTenzi nehwemuzinda wamambo akazvitumira kuna Bhenihadhadhi mambo weSiria aigara muDhamasikusi

³achiti, “Ngatiitei chibvumirano, imi neni, sezvakanga zvakaita baba venyu nababa vangu. Onai ndakutumirai sirivha nendarama iyo, imi moendawo muparadze chibvumirano chenyu naBhaasha mambo wokwaIsiraeri kuitira kuti kwangu kuno uku abve.”

⁴Bhenihadhadhi akabvumirana namambo Asa akabva atumira vakuru vakuru vehondo yake kundorwisa maguta okwaIsiraeri. Vakakurira Iyoni neDhani neAberomaimu nemaguta ose ematura okwaNafutari.

⁵Bhaasha paakazvinzwa akabva arega kuvakirira Rhama akabva amisa basa rake.

⁶Mambo Asa akatora vokwaJudha vose akandotakura mabwe okuRama namapango acho ainge achivakiswa. Akandovakirira nazvo Gebha neMizipa.

⁷Panguva iyoyo, muoni Hanani akasvika kuna Asa mambo wokwaJudha akati kwaari, “Pamusana pokuti iwe wakavimbaka iwe namambo weSiria ukarega kuvimba naTenzi, Mwari wako, hondo yamambo weSiria yakupunyuka mumaoko.

⁸Ko vaItiopia nevaRibhiya vakanga vasiri hondo huru kwazvo here vaine zararira chairo rengoro dzehondo dzemadzibaba nevachairi vadzo? Asi pamusana pokuti makavimba naTenzi, iye akavaisa mumaoko menyu.

⁹Chiripo ndechokuti ziso raTenzi rinotarisa kwose kwose pasi pano kuti asimbise nokunyaradza vasina chinovarovesa hama pana iye Tenzi. Zvamaita ipapa apa ndezvoupenzi nokuti kubvira nhasi, hondo hadzichazokubvai.”

¹⁰Asa akashatirirwa muoni uyu akamupfigira mujeri nokuti akanga amuvirukira nehasha pamusana paizvozvi. Panguva imwecheteyo Asa akabata vamwe vanhu noutsinye.

¹¹Inga dzimwe nyaya dzezvaAsa kubvira pakutanga kusvika pakupedzesera, dzakanyorwa wani muBhuku ramadzimambo okwaJudha neokwaIsiraeri.

¹²Mugore ramakumi matatu nechipfumbamwe Asa akaita chirwere chomutsoka, urwere hwake hwakazonyanyisa kwazvo. Kunyange nomuurwere hwake ihohu haana kutsvaka Tenzi, asi kuti akandotsvaka rubatsiro kun'anga.

¹³Asa akazovata oendawo kwakaenda vamwe madzitateguru ake akafa mugore ramakumi mana nechiposhi rokutonga kwake.

¹⁴Vakamuviga muguva rake raakazvicherera padombo muguta raDhavhidhi. Vakamuradzika pane chokurara chakanga chakazadzwa mhando nemhando dzetunonhuwirira twakagadzirwa nenyanzvi dzokugadzira mafuta okuzora. Vakaita zimoto guru kwazvo vachimuremekedza.