Read Bhaibhiri Idzva rechiShona 2 Nhoroondo 17 Bible Online

2 Nhoroondo 17 - Bhaibhiri Idzva rechiShona bible

2 Nhoroondo 17

¹Jehoshafati mwanakomana wake akatonga panzvimbo pake akazvigadzirira kurwisana nevokwaIsiraeri.

²Akaisa varwi vehondo mumaguta ose etsvingo okwaJudha, akaisa zvikwata zvavarwi munyika yokwaJudha nomumaguta okwaEfuremu akanga akurirwa nababa wake Asa.

³Tenzi aiva naJehoshafati nokuti aitevedza makwara okutanga ababa vake.[2] Haana kutsvaka vanaBhaari,

⁴asi aitsvaka Mwari wamadzibaba ake achitevedza mirao yake asingaite somuitiro wevokwaIsiraeri.

⁵Naizvozvo Tenzi akaita kuti umambo hudzike midzi mumaoko ake vokwaJudha; vose vaiunza mutero kuna Jehoshafati, iye akava noupfumi huzhinji achikudzwa kwazvo.

⁶Akanga akaisa mwoyo wake mune zvokunamata, Tenzi uyewo akabvisa maJudha nzvimbo dzakatunhumara dzokuteurira nezvifananidzo zvokunamata zviAshera.

⁷Mugore rechitatu rokutonga kwake akatuma machinda ake aya anoti Bhenihairi naObhadhiya naZekariya naNetaneri naMikaya kundodzidzisa mumaguta okwaJudha.

⁸Akavatuma pamwechete nevaRevhi ava vaiti Shemaya naNataniya naZebhadhiya naAsaeri naShemiramoti naJehonatani naAdhoniya naTobhiya naTobhadhoniya, pamwechete nevaRevhi ivava akatuma vapristi ava vanoti Erishama naJehoramu.

⁹Vakadzidzisa munyika maJudha vaine Bhuku roMutemo waTenzi. Vakatenderera nomumaguta ose okwaJudha vachidzidzisa muvanhu.

¹⁰Kutya Tenzi kwakawira madzimambo enyika dzakapoteredza Judha akarega kuzorwisa Jehoshafati.

¹¹Vamwe vechiFirisitia vakaigira Jehoshafati zvipo nesirivha yomutero. VaArabhu vakaunzawo kwaari zviuru zvinomwe zvina mazana manomwe ehondohwe nezviuru zvinomwe zvine mazana manomwe amakotora.

¹²Ukuru hwaJehoshafati hwakaramboenda mberi. Akavaka maJudha imomu maguta etsvingo neematura.

¹³Aiva nemirwi nemirwi yezvaakachengeta mumaguta okwaJudha. Aivawo nevarwi vehondo, magamba chaiwo okurwa hondo muJerusaremu.

¹⁴Mamiriro avakanga vakaita, dzinza nedzinza ndeaya: VokwaJudha: vatungamiriri vezviuru, paiti Adhina mutungamiriri wacho mukuru aina mazana matatu ezviuru zvavarume, mvumba chaidzo dzokurwa hondo

¹⁵achitevedzerwa nomumwe mutungamiriri mukuru, Johohanani aina mazana maviri anamakumi masere ezviuru.

¹⁶Achitevedzerwawo naAmasiya mwanakomana waZikiri aiva munhu akazvipira zvake kuita basa raTenzi aivawo namazana maviri ezviuru, mvumba chaidzo dzokurwa hondo.

¹⁷Kune vokwaBhenjamini: kwaiva naEriyadha mvumba chaiyo, gamba chairo rokurwa hondo aine mazana maviri ezviuru zvevarume vokurwa nemiseve nenhoo;

¹⁸achitevedzerwa naJehozabhadhi; aine vanhu zana rine makumi masere ezviuru vane zvombo zvehondo.

¹⁹Ivava vaishandira mambo pasingaverengerwe vaya vakanga vaiswa namambo mumaguta etsvingo munyika mose maJudha.