Read Bhaibhiri Idzva rechiShona 2 Nhoroondo 19 Bible Online

2 Nhoroondo 19 - Bhaibhiri Idzva rechiShona bible

2 Nhoroondo 19

¹Jehoshafati mambo wokwaJudha akadzokera kumuzinda kwake kuJerusaremu zvakanaka.

²Asi Jehu mwanakomana waHanani muoni akaenda kundosangana namambo Jehoshafati akati kwaari, “Ndizvo here kubatsira wakaipa muchida vanovenga Tenzi? Pamusana paizvozvi Tenzi akuvirukirai nehasha.

³Kunyange zvakadaro, kune zvimwe zvakanaka zvinowanika mamuri nokuti makaparadza zvifananidzo zvokunamata zviAshera munyika ino mukaisa mwoyo wenyu pakutsvaka Mwari.”

⁴Jehoshafati aigara muJerusaremu achiendazve muvanhu kubvira kuBheerishebha kusvikira kunyika yokwaEfuremu yemakomo achivadzosera kuna Tenzi, Mwari wamadzibaba avo.

⁵Akasarudza vatongi munyika umu mumaguta ose okwaJudha aiva netsvingo guta neguta.

⁶Akati kuvatongi, “Nyatsofungai zvamunoita nokuti hamutongere kufadza munhu asi Tenzi. Iye anemi pamunenge muchitonga.

⁷Saka zvino ivai vanhu vanotya Tenzi. Chenjererai zvamunoita nokuti muna Tenzi, Mwari wedu hamuna unyengedzi kana rusaruro kana kugamuchira pfumbamuromo.”

⁸NomuJerusaremuwo Jehoshafati akasarudza muvaRevhi nomuvapristi nomuvatungamiriri vedzimhuri dzeIsiraeri vamwe vavo kuitira kuti murao waTenzi uchengetwe nokugadziridza zvinenge zvanetsa. Vaigara muJerusaremu.

⁹Zvaakavatemera ndezvokuti, “Izvozvi ndizvo zvamuchaita mukutya Tenzi nomukutendeseka nomwoyo wose.

¹⁰Panenge mhosva yapirwa kwamuri ichibva kuhama dzenyu dzigere mumaguta adzo iri yokudeura ropa kana yokutyora mutemo kana murao nezvirevo nezvirongwa; munofanira kuvadzidzisa kuitira kuti varege kupara mhosva pana Tenzi uye kuti arege kuvirukira nehasha imi nehama dzenyu. Izvozvo ndozvamunofanira kuita mugorega kupara mhosva.

¹¹Chinzwai, mupristi mukuru Amariya ndiye anokutungamirirai mune zvinhu zvose zvaTenzi. Wokutarisa zvose zvokwamambo ndiZebhadhiya mwanakomana waIshimaeri mutongi wedzinza rokwaJudha. VaRevhi vachange varivo machinda enyu. Shingai muzviite, Tenzi ngaave zvake nomururami.”