Read Bhaibhiri Idzva rechiShona 2 Nhoroondo 21 Bible Online

2 Nhoroondo 21 - Bhaibhiri Idzva rechiShona bible

2 Nhoroondo 21

¹Jehoshafati akazovata oendawo kwakaenda vamwe madzitateguru ake akavigwa pamwechete namadzibaba ake muguta raDhavhidhi. Mwanakomana wake Jehoramu ndiye akatonga panzvimbo pake.

²Jehoramu aiva nevanun'una, vana vaJehoshafati ava vanoti: Azariya naMikaeri naJehieri naZekariya naAzariya naShefatiya. Vose ivava vana vaJehoshafati mambo wokwaJudha.

³Baba wavo vakavapa zvipo zvikuru zvesirivha nendarama nezvimwewo zvinhu zvakakosha pamwechete namaguta ane tsvingo okwaJudha. Asi umambo akapa kuna Jehoramu nokuti ndiye aiva dangwe.

⁴Jehoramu paakagara pachigara choumambo chababa vake zvino adzika midzi, akauraya nebakatwa vanun'una vake vose uyewo mamwe machinda eIsiraeri.

⁵Jehoramu akanga ava namakumi matatu amakore namakore maviri paakava mambo, akatonga ari muJerusaremu kwamakore masere.

⁶Iye akatevedzera makwara amadzimambo okwaIsiraeri sezvakanga zvaitwa nevemba yaAhabhu nokuti mudzimai wake aiva mukunda waAhabhu. Akaitawo zvakaipa zvisingadiwi naTenzi.

⁷Zvakadaro zvazvo Tenzi haana kuparadza imba yaDhavhidhi pamusana pechitenderano chaakanga aita naDhavhidhi sezvo akanga atsidzira kumupa mwenje unogara uchipfuta nokusingapere iye navanakomana vokwake.

⁸Panguva yake Edhomu yakapanduka ikaramba zvokutongwa nevokwaJudha ikazvigadzirawo mambo wayo.

⁹Uyu Jehoramu ndokuyambukirako aina vakuru vake vehondo nengoro dzose dzehondo. Akamuka nousiku akauraya vaEdhomu vakanga vamukomba iye navakuru vakuru vake vehondo.

¹⁰Nokudaro Edhomu yakapanduka ikaramba zvokutongwa nevokwaJudha kusvikira pari nhasi. Panguva iyoyo guta reRibhuna rakapandukawo rikarambawo zvokutongwa naye pamusana pokuti akanga afuratira Tenzi, Mwari wamadzibaba ake.

¹¹Uyewo akagadzira nzvimbo dzakatunhumara dzokuteurira munyika yokwaJudha yamakomo akakwezvera vagari vomuJerusaremu muunzenza hwokunamata zvinhu zvisiri Mwari akaendesa vokwaJudha mutome.

¹²Kwakauya tsamba kwaari ichibva kumuporofita Eriya ichiti, “Zvanzi naTenzi, Mwari watateguru wenyu Dhavhidhi, ‘Pamusana pokuti hauna kutevedza makwara ababa wako Jehoshafati kana makwara aAsa mambo wokwaJudha

¹³ukatotevedza zvako gwara remadzimambo okwaIsiraeri ukakwezvera Judha nevagari vomuJerusaremu muunzenza hwokunamata zvinhu zvisiri Mwari sokutungamirira kwakaita imba yaAhabhu vokwaIsiraeri mukusatendeka uyewo ukaurayaka iwe vanun'una vako vomumba vaitova vanhu vari nani kunewe,

¹⁴chinzwa, Tenzi achaunza denda guru kwazvo pavanhu vako nepavana vako nepavakadzi vako nepaupfumi hwako hwose.

¹⁵Iyewewo uchava nechirwere chakaipisisa kwazvo, chirwere chomudumbu kudzamara ura hwako hwongoramba kuchibuda pamusana pechirwere chacho zuva nezuva.’ ”

¹⁶Tenzi akaita kuti vaFirisitia nevaArabhu vari pedyo nevaItiopia vaite hasha vamukire Jehoramu.

¹⁷Vakavinga Judha vakairwisa vakakukucha zvinhu zvose zvavakawana zvomumuzinda wamambo uyewo nevana vake vakomana navakadzi vake zvokuti hapana mwana waakasiyirwa kunze kwaJehoahazi mwanakomana wake mudiki.

¹⁸Mushure mezvose izvozvi, Tenzi akamurova nedenda romudumbu risingarapiki.

¹⁹Nokufamba kwenguva, kwapera makore maviri, ura hwake hwakabuda pamusana pechirwere ichochi akafa achirwadziwa zvikuru. Vanhu vake havana kumuitira moto wokumuremekedza nawo semoto yaiitirwa madzibaba ake.

²⁰Paakatangisa kutonga akanga ava namakore makumi matatu namaviri. Akatonga kwemakore masere ari muJerusaremu. Paakashaya hapana akamuchema. Vakamuviga muGuta raDhavhidhi, kwete mumakuva emadzimambo.