Read Bhaibhiri Idzva rechiShona 2 Nhoroondo 23 Bible Online

2 Nhoroondo 23 - Bhaibhiri Idzva rechiShona bible

2 Nhoroondo 23

¹Kuzoti mava mugore rechinomwe, Jehoyadha akatsunga mwoyo akaita chitsidzirano navatungamriri vezana ava vanoti Azariya mwanakomana waJerohamu naIshimaeri mwanakomana waJehohanani naAzariya mwanakomana waObhedhi naMaaseya mwanakomana waAdhaya naErishafati mwanakomana waZikiri.

²Vakabvongodza nyika yokwaJudha vachikokorodza vaRevhi mumaguta okwaJudha ose navakuru vakuru vemadzinza eIsiraeri vakauya kuJerusaremu.

³Gungano rose rakaita chibvumirano namambo vari mumba yaMwari. Jehoyadha akati kwavari, “Hoyu mwanakomana wamambo! Regai achitonga sokutaura kwakaita Tenzi pamusoro pevanakomana vaDhavhidhi.

⁴Zvamunofanira kuzoita ndezvizvi: vapristi nevaRevhi vaya pazvikwata zvitatu zvinouya kuzoita basa musi weSabata; chikwata chimwechete ngachichengetedze pamisuo mikuru,

⁵chimwe chive pamuzinda wamambo, chimwe chiri paSuo Guru roUgaro, vanhu vose vave muzvivanze zvepamba yaTenzi.

⁶Ngakurege kuva nomunhu anopinda mumba yaTenzi kunze kwevapristi nevaRevhi vanoshandamo, vangapinde zvavo nokuti vanhu vakatsaurwa vatsvene. Asi vanhu vose ngavachengete zvakatemwa naTenzi.

⁷VaRevhi vanofanira kukuta vakatenderedza mambo mumwe nomumwe akabata mumaoko zvombo zvake zvehondo. Kuwana anenge angofemera kupinda mumba macho ngaauraiwe. Ivai namambo paanopinda napaanobuda.”

⁸VaRevhi nevose vokwaJudha vakaita zvose zvakanga zvanzi nomupristi Jehoyadha zviitwe. Mumwe nomumwe wavo akauya navanhu vake vakanga vasingafanire kuuya pabasa musi weSabata navaye vakanga vachifanira kuva pabasa musi weSabata pamusana pokuti mupristi Jehoyadha haana kunga ati zvikwata zvacho zviende.

⁹Mupristi Jehoyadha akaisa mumaoko avakuru vakuru vehondo nenhoo huru nediki dzaimbenge dziri dzamambo Dhavhidhi dzaiva mumba yaMwari.

¹⁰Akaronga vanhu vose kuti vachengetedze mambo, munhu wose akabata mumaoko chombo chake chehondo kubvira kumaodzanyemba kwemba kusvikira kuchamhembe kutenderedza atari nemba yamambo.

¹¹Akabva aburitsa mwanakomana wamambo akamudzika ngundu youmambo akamupa bumbiro romutemo akazivisa kuti ndiye mambo. Jehoyadha navanakomana vake vakabva vamuzodza mafuta vachimugadza vakati, “Mambo ngazvirambe zvakadaro!”

¹²Pakanzwa Atariya zhowezhowe ravanhu vaimhanya vachirumbidza mambo akaenda kumba yaTenzi kuvanhu.

¹³Paakatarisa akaona hoyo mambo amire pedyo nomusimboti wake kumusuo, vakuru vakuru vehondo nevokuridza mabhosvo vamire namambo, vanhu vose venyika iyi vachipembera kufara, mabhosvo achirira, vaimbi vachiridza midziyo yokuimbisa vachitotungamirira pakupemberera kwacho; Atariya akabvarura hanzu neshungu dzake akadaidzira achiti, “Kwapandukwa! Kwapandukwa!”

¹⁴Mupristi Jehoyadha akaudza vakuru vakuru vokutungamirira hondo kuti, “Mubvisei mumitsetse yevachengetedzi mumuburitse muuraye nebakatwa ani naani anenge woda kutsigirana naye.” Izvozvo mupristi aiti haafaniri kuurayirwa mumba yaTenzi.

¹⁵Nokudaro vakamubata akapfuura nepaSuo Guru reMabhiza repamuzinda wamambo vakamuurayirapo.

¹⁶Jehoyadha akaitisa chibvumirano pakati pake navanhu vose namambo chokuti vave vanhu vaTenzi.

¹⁷Vanhu vose ivavo vakaenda kumba yaBhaari vakaipaza. Atari dzake nezvifananidzo zvake vakazvipwanya-pwanya vakauraya Matani mupristi waBhaari pamberi peatari dzacho.

¹⁸Jehoyadha akabva aisa vokugaririra pamba paTenzi vachitungamirirwa navapristi vechiRevhi navaRevhi vakanga varongwa naDhavhidhi kuti vave vokuona nezvemba yaTenzi kuti vapote vachipira mipiro yokupisa kuna Tenzi sokunyorwa kwazvakaitwa mumutemo waMosesi vachipembera kufara nokuimba maererano nezvakanga zvanzi naDhavhidhi zviitwe.

¹⁹Akaisa vachengetedzi vepamisuo mikuru pamisuo mikuru yepamba paTenzi kuti parege kupinda ani zvake anenge akan'ora nenzira ipi neipi zvayo.

²⁰Akatora vakuru vakuru vehondo navamwe vakuru vakuru namasadunhu avanhu navanhu vose venyika iyi vakandotora mambo kumba yaTenzi vakadzika naye vakapfuura napasuo guru roKumusoro rokumuzinda wamambo. Vakagarisa mambo pachigaro choumambo.

²¹Vanhu vose venyika iyi vakapembera kufara, muguta mukava norunyararo mushure mokunge Atariya aurayiwa nebakatwa.