Read Bhaibhiri Idzva rechiShona 2 Nhoroondo 25 Bible Online

2 Nhoroondo 25 - Bhaibhiri Idzva rechiShona bible

2 Nhoroondo 25

¹Amaziya akanga ava namakore makumi maviri namashanu paakatanga kutonga. Akatonga kwamakumi maviri amakore ana makore mapfumbamwe ari muJerusaremu. Zita raamai vake rainzi Jehoadhani vomuJerusaremu.

²Iye akaita zvakarurama zvinodiwa naTenzi asi akanga asina kunyatsoti tsvikiti pamwoyo pake.

³Umambo pahwakanga zvino hwava mumaoko ake chaizvo akauraya makurukota akauraya mambo, baba vake.

⁴Asi haana kuuraya vana vavaurayi ava sokunyorwa kwazvakaitwa mubhuku romutemo waMosesi panonzi naTenzi, “Madzibaba haafaniri kuurayirwa mhosva dzavana. Vanawo havafaniri kuurayirwa mhosva dzamadzibaba. Munhu wose anofira mhosva yake iye pachake.”

⁵Amaziya akazokokorodza varume vokuhondo vokwaJudha akavaronga imba nemba vari pasi pevatungamiriri vezviuru nevemazana vari vose zvavo vokwaJudha nevokwaBhenjamini. Akaverenga vaiva namakore makumi maviri zvichikwira akawana vari zviuru mazana matatu zvavarume chaivo vakanyatsosarudzwa vanogona kuenda kuhondo vaigona kutakura nhoo nemapfumo.

⁶Akakokawo varwi vokwaIsiraeri mvumba chaidzo, magamba okurwa hondo zana rezviuru vaakaita zvokubvisira mari yesirivha inorema matani mana.

⁷Asi mumwe munhu waMwari akauya kwaari akati, “Mambo! Regai zvenyu kuendako nehondo yokwaIsiraeri nokuti Tenzi haasi nevokwaIsiraeri, uye haasiri navose vekwaEfuremu ava.

⁸Kunyange mukati ndoita chivindi chokurwa hondo, asi Mwari achakuputsirai pasi pamberi pevavengi vacho nokuti Mwari ane simba rokubatsira kana rokuumburudza munhu pasi.”

⁹Amaziya ndokuti kumunhu waMwari, “Zvino toita sei namatani mana esirivha andakapa kuhondo yokwaIsiraeri.” Munhu waMwari akapindura achiti, “Tenzi anogona kukupai yakawanda kutopinda iyoyo.”

¹⁰Ipapo Amaziya akakotonotsa hondo yakanga yauya kwaari yabva kwaEfuremu kuti vaende zvavo kumusha. Ivo vakabva vavirukira vokwaJudha nehasha kwazvo vakadzokera kumusha vakapaka kwazvo nadzo.

¹¹Asi Amaziya akatsunga mwoyo akabuda otungamirira vanhu vake akaenda kuBani roMunyu akauraya gumi rezviuru zvevanhu vokuSeiri.

¹²Varume vokwaJudha vakabata vamwe gumi rezviuru vari vapenyu vakaenda navo pamusoro peibwe, ndokuvatozomotsera pasi vose vakapwatikira pasi.

¹³Asi varwi vaye vehondo iya yokudzorwa naAmaziya asisavabvumire kuenda naye kuhondo vakarwisa maguta okwaJudha kubvira kuSamaria kudzamara kuBhetihoroni vakauraya zviuru zvitatu zvavanhu. Vakakukucha kupamba zvinhu.

¹⁴Kuzoti Amaziya adzoka kuya kwaakandouraya vaEdhomu akauya navamwari vokuSeiri akavamisa savamwariwo vake akabva ovanamata otopira zvake mipiro kwavari.

¹⁵Naizvozvo Tenzi akashatiririrwa Amaziya akamutumira muporofita akasvikoti kwaari, “Chawavakuendera kune vamwari vevanhu vechirudzi vasinakukwanisa kununura vanhu vavo mumaoko avo chii?”

¹⁶Asi achingunotaura kudaro mambo akamugamha achiti, “Zviye takakusarudza kuti uve jinda ramambo nhai? Chinyarara! Chowofirawo zvako chii ipapa?” Muporofita ndiye zii zvake asi akangoti, “Chandinoziva ini ndechokuti Mwari afunga zvokukuparadzai pamusana pezvamakaita uye nokusateerera zano rangu.”

¹⁷Amaziya mambo wokwaJudha akabvunza mazano akatuma nhume kuna Jehoashi mwanakomana waJehoahazi mwanakomana waJehu mambo wokwaIsiraeri achiti, “Uya timirisane.”

¹⁸Jehoashi mambo wokwaIsiraeri akatumawo nhume kuna Amaziya mambo wokwaJudha achiti, “Kananga kepaRebhanoni kakatumira nhume kumuti womusidhari wepaRebhanoni kachiti, ‘Rega mwanasikana wako aroorwe nomwanakomana wangu ave mukadzi wake.’ Chimwe chikara chomuRebhanoni chakapfuura nepo chikakatsikirira pasi.

¹⁹Unotika iwe wakakurira Edhomu chaizvo ukabva waita zenze kuzvikudza. Zvino iwe gara zvako kumba. Unodirei kuzvidenhera nhamo inokuridibura iwe pamwechete naJudha?”

²⁰Asi Amaziya haana kumbozviteerera nokuti zvaiva zvaMwari aida kuvaisa mumaoko avavengi vavo pamusana pokuti vakanga vavakunamata vamwari vechiEdhomu.

²¹Jehoashi mambo wokwaIsiraeri akakwirako, iye naAmaziya mambo wokwaJudha vakamirisana kurwa hondo kuBhetishemeshi rokwaJudha.

²²VokwaJudha vakakurirwa novokwaIsiraeri munhu wose rikava bararamhanya kutizira kumusha.

²³Jehoashi mambo wokwaIsiraeri akabata Amaziya mambo wokwaJudha mwanakomana waJoashi mwanakomana Ahaziya kuBhetishemeshi. Akaenda naye kuJerusaremu akapaza mbimbi yorusvingo rweJerusaremu inoita mamita mazana maviri kubvira pasuo guru raEfuremu kusvikira pasuo guru rapaKona.

²⁴Akapamba ndarama yose nesirivha nemidziyo yose yaiva mumba yaMwari zvainge zviri mumaoko aObhedoedhomu. Akapambawo upfumi hwomumuzinda wamambo. Akatorawo nhapwa ndokubva adzokera kuSamaria.

²⁵Amaziya mwanakomana waJoashi mambo wokwaJudha akagara makore gumi namashanu mushure mokufa kwaJoashi mwanakomana waJehoahazi mambo wokwaIsiraeri.

²⁶Inga dzimwe nyaya dzezvaAmaziya kubvira pakutanga kusvikira pokupedzesera dzakanyorwa wani muBhuku raMadzimambo okwaJudha neokwaIsiraeri.

²⁷Kubvira paakafuratira Tenzi, vakaita bangano rokumupandukira muJerusaremu, iye akabva atizira kuRakishi. Asi vakatuma vanhu kuRakishi vakamuurayira ikoko.

²⁸Vakauya naye vakamutakura nemabhiza akavigwa pamwechete namadzibaba ake muguta raDhavhidhi.