Read Bhaibhiri Idzva rechiShona 2 Nhoroondo 26 Bible Online

2 Nhoroondo 26 - Bhaibhiri Idzva rechiShona bible

2 Nhoroondo 26

¹Vanhu vose vokwaJudha vakatora Uziya akanga ava namakore gumi namatanhatu vakamugadza umambo panzvimbo pababa vake Amaziya.

²Akavaka guta reEroti akaridzosera kune vokwaJudha mushure mokunge mambo aendawo kwakaenda vamwe madzitatuguru ake.

³Uziya akanga ava namakore gumi namatanhatu paakatanga kutonga. Akatonga kwamakore makumi mashanu namaviri ari muJerusaremu. Zita raamai vake rainzi vaJekoriya vomuJerusaremu.

⁴Iyeyu akaita zvakarurama zvinodiwa naTenzi sezvakaitwa nababa vake Amaziya.

⁵Akaisa mwoyo mune zvokutsvaka Mwari mumazuva oupenyu hwavaZekariya vaimudzidzisa kutya Mwari achitsvaka Tenzi kudaro, Mwari akaita kuti abudirirewo.

⁶Akabudira vaFirisitia akandovarwisa akapaza rusvingo rweguta reGati norusvingo rweguta reJabhune norusvingo rweguta reAshidhodhi. Akavaka maguta mudunhu reAshidhodhi nokumwewo mukati mevaFirisitia.

⁷Mwari akamubatsira kurwisa vaFirisitia nevaArabhu vaigara kuGurubhaari uye kurwisa vechiMeuni.

⁸VaAmoni vaitera mutero kuna Uziya, mukurumbira wake ukasvika kumuganhu neIjipiti kwose nokuti akanga azova nemasimba kwazvo.

⁹Chimwe ndechokuti, Uziya akavaka nharire muJerusaremu pasuo guru repaKona nesuo guru rokuBani napakona pacho akadzivakirira norusvingo.

¹⁰Akavakawo nharire kurenje akafonon'ona mabwe kuita magaringiro mazhinji okuchengetedza mvura nokuti aiva namatanga namatanga emombe makuru kwazvo kunyika yamanhika yeShefera nokubani. Aivawo navarimi nevokuchengetedza migirepisi muzvikomo nomuminda ine vhu chairo rakanaka pamusana pokuti zvourimi izvi aizvida.

¹¹Chimwewo ndechokuti Uziya uyu akanga aine hondo yevarwi vaigona kuenda kuhondo vari chikwata nechikwata sokuverengwa kwavakaitwa vachirongwa nasamunyori mukuru Jeieri nerimwe jinda rainzi Maaseya vachitungamirirwa naHananiya mumwe wevatungamiriri vokwamambo.

¹²Vakuru vakuru vedzimhuri vaiva mvumba chaidzo, magamba okurwa hondo vose pamwechete vaiva zviuru zviviri zvine mazana matanhatu avanhu.

¹³Vaitungamirira hondo yavarwi yaiita zviuru mazana matatu ane zvinomwe ane vanhu mazana mashanu vaikwanisa kurwa hondo nesimba guru kwazvo vokubatsira mambo kurwisa muvengi.

¹⁴Uziya akagadzirira hondo yose nhoo nemapfumo nenguwani dzoutare nemademautare okuzvidzivirira nawo nouta namatombo okukanda nezvimviriri.

¹⁵MuJerusaremu akagadzirira michini yakanga yafungwa ikagadzirwa nedzimwe ngwazi dzavanhu kuti ishandiswe panharirire nepamakona yokukandisa miseve namatombo. Mukurumbira wake wakapararira kure kure nokuti akabatsirwa zvisina akamboona kudakara ava namasimba.

¹⁶Pakanga zvino Uziya ava namasimba kudaro akatanga kuzvikudza zvikazomuparadza. Chakaitika ndechokuti haana kuva pachokwadi naTenzi, Mwari wake. Akapinda mutemberi yaTenzi kundopisa rusenzi paatari yourusenzi.

¹⁷Asi mupristi Azariya pamwechete nevapristi vaTenzi vane chivindi makumi masere vakamuteveramo.

¹⁸Vakasvikira mambo Uziya vakamuti, “Uziya iwe zvokupisira rusenzi kuna Tenzi hazvisi zvenyuka izvi, asi ndezvevapristi vanakomana vokwaAroni vakateketererwa kuna Mwari kuti vapise rusenzi. Ibva munzvimbo inoera nokuti watotadzira Tenzi Mwari haambokuremekedza nazvo.”

¹⁹Uziya akashatirwa, izvozvo akanga akabata mumaoko bisiro rokupisira rusenzi. Ashatirirwa vapristi kudaro, akabva abuda maperembudzi pahuma pake, pana vapristi ipapo mumba yaTenzi pedyo neatari yorusenzi.

²⁰Azariya mupristi mukuru navapristi vose vakatarisa kwaari, onei atova nemaperembudzi pahuma. Vakamuburitsa nokukurumidza. Iyewo akakasika kubuda nokuti Tenzi akanga amurova neshamhu.

²¹Mambo Uziya akazogara ava munhu ana maperembudzi kudzimara musi wokufa kwake. Somunhuwo aiva nemaperembudzi kudaro aigara ari kwake oga mumba, pamusana pokuti akanga asisabvumirwe mumba yaTenzi. Mwanakomana wake Jotamu ndiye akava samusha womumuzinda wamambo achitonga vanhu munyikamo.

²²Dzimwe nyaya dzezvaUziya kubvira pakutanga kusvikira pakupedzesera dzakanyorwa nomuporofita Isaya, mwanakomana waAmozi.

²³Uziya akazovatawo oenda kwakaenda vamwe madzitateguru ake. Vakamuviga pamwechete nemadzibaba ake kunzvimbo yemakuva aivigwa madzimambo nokuti vakati, “Ane maperembudzi.” Mwana wake Jotamu ndiye akatonga panzvimbo pake.