Read Bhaibhiri Idzva rechiShona 2 Nhoroondo 29 Bible Online

2 Nhoroondo 29 - Bhaibhiri Idzva rechiShona bible

2 Nhoroondo 29

¹Hezekiya akatanga kutonga ava namakore makumi maviri namashanu, akatonga kwamakore makumi maviri namapfumbamwe ari muJerusaremu. Zita raamai vake rainzi Abhiya mwanasikana waZekariya.

²Hezekiya akaita zvakarurama zvinodiwa naTenzi sezvakaitwawo navasekuru vake Dhavhidhi.

³Mugore rake rechiposhi rokutonga, mumwedzi wokutanga akazarura misuo yapamba paTenzi akaigadzira.

⁴Akaunzawo vapristi navaRevhi akavaunganidza munhandare kumabvazuva

⁵akati kwavari, “Nditeererei munzwe imi vaRevhi! Chizvichenurai muchenurewo imba yaTenzi, Mwari wamadzibaba enyu mutakure tsvina iyi muibvise munzvimbo inoera.

⁶Nokuti madzibaba edu anga ari vanhu vasiri pachokwadi naMwari'ka vanga vachiita zvakaipa zvisingadiwe naTenzi, Mwari wedu. ZvaMwari, vakakanda pasi vakafuratira ugaro hwaTenzi vakamupa gotsi.

⁷Vakapfigawo misuo yakamba kepamusuo wokupinda muno, vakadzima marambi vakarega kupisira kuna Mwari weIsiraeri rusenzi kana kupira mipiro yokupisa munzvimbo inoera.

⁸Ndokusaka Tenzi akavirukira nehasha Judha neJerusaremu akabva adziita kuti dzive sechinhu chokuti ukaona unodedera nokutya, chinokatyamadza chichikushayisa neromuromo sezvamuri kungozvionerawo nameso enyu.

⁹Chitarisaika muone kuti madzibaba edu navana vedu vakomana navasikana vakaurayiwa namapakatwa uye vakadzi vedu vari kuhutapwa naizvozvi izvi.

¹⁰“Zvino chandafunga mumwoyo mangu ini kuita chitenderano naTenzi, Mwari weIsiraeri kuitira kuti achirega kutivirukira nehasha dzake dzinotyisa.

¹¹Vanangu regai kuva nechamuchaitira nungo nokuti Tenzi akasarudzemi kuti mupote muchimira paari muchimushandira muri vashandi vake muchimupisira rusenzi.”

¹²VaRevhi ava vakazosimuka, paiti: Mahati mwanakomana waAmasai naJoeri mwanakomana waAzariya vokuvanakomana vokwaKohati, pouya kuvanakomana vokwaMerari Paiti: Kishi mwanakomana waAbhudhi naAzariya mwanakomana waJeharereri poti kuvanakomana vokwaGerishoni Joa mwanakomana vaZima naEdheni mwanakomana waJoa

¹³kune vokwaErizafani paiti Shimuri naJeueri pozoti kuvanakomana vokwaAsafu paiva naZekariya naMataniya

¹⁴pachizoti kuvanakomana vokwaHemani paivawo naJehueri naShimei kuvanakomana vokwaJedhutuni paiti Shemaya naUzieri.

¹⁵Vakaunganidza hama dzavo vakazvichenura vakapinda sokutaurawo kwakanga kwaita mambo maererano neshoko raTenzi kundonatsa imba yaTenzi.

¹⁶Vapristi vakapinda mukati memba yaTenzi kundoinatsa. Vakaburitsa muruvanze rwemba yaTenzi zvose zvaiva zvakan'ora zvavakawana muTemberi yaTenzi. VaRevhi vakazvitora vakaenda nazvo kukakova keKidhironi.

¹⁷Vakatanga kuchenura uku musi wokutanga wemwedzi wechiposhi ndokubva pamusi wechisere wacho vasvika kukamba kaye kaTenzi, kwokumusuo, tichangobuda mumba yomukati. Vakazoita mamwe mazuva masere okuchenura imba yaTenzi, vakazopedza rava zuva regumi nechitanhatu romwedzi wechiposhi.

¹⁸Vakapinda maiva namambo Hezekiya vakamupira kuti, “Tanatsa imba yose yaTenzi neatari yokupirira mipiro yokupisa nemidziyo yayo yose netebhuru yechingwa chepana Mwari nemidziyo yayo yose.

¹⁹Midziyo yose yakanga yaraswa namambo Ahazi paakanga achiri kutonga ava munhu asisiri pakutendendeka taigadzira tikaichenura. Kutaura kuno zviri pamberi peatari yaTenzi.”

²⁰Mambo Hezekiya akamuka rungwanani akaunganidza vakuru vakuru veguta akakwira kuimba yaTenzi.

²¹Vanhu vakaunza handira nomwe nehondohwe nomwe nehwayana nomwe namakotora manomwe omupiro wokupfupira zvitadzo zvoumambo nenzvimbo inoera nenyika yokwaJudha, akati vapristi, vanakomana vokwaAroni vazviite zvibayiro paatari yaTenzi.

²²Saizvozvowo vakauraya handira dziye, vapristi vakasasa ropa radzo paatari. Vakaurayawo hondohwe dziye vakamwayawo ropa radzo kuatari vakazourayawo hwayana dziye vakasasa ropa radzo kuatari.

²³Makotora aye omupiro wokupfupira zvitadzo akauyiwa nawo kuna mambo negungano, vakaisa maoko avo paari.

²⁴Vapristi vakaauraya vakaita mupiro wokupfupira zvitadzo neropa rawo paatari kuripira Isiraeri yose nokuti mambo akanga atema kuti, mipiro yokupisa nemipiro yokupfupira zvitadzo ipirirwe Isiraeri yose.

²⁵Akaisa vaRevhi mumba yaTenzi vaine makwakwakwa outare nemadimbwa nezvipendani sokutemwa kwazvakaitwa naDhavhidhi nomuoni wokwamambo nomuporofita Natani pamusana pokuti mutemo wakanga wabva kuna Tenzi uchitaurwa navaporofita.

²⁶VaRevhi vakamira vaine zvokuimbisa zvokuridza zvaDhavhidhi, vapristi vaine mabhosvo.

²⁷Hezekiya ndokubva ati mipiro yokupisa ichipirwa paatari. Pakatanga kuitwa mupiro wokupisa ndopakabvawo patangwa kuimbira Tenzi rwiyo mabhosvo oridzwa zvino pamwechete nezvokuimbisa zvokuridza zvaDhavhidhi mambo weIsiraeri.

²⁸Gungano rose rakati pasi gwadagwa kupfugama, vaimbi mumhanzi vachiimba, uku mabhosvo achidandaura kudzamara mupiro wokupisa wapera kuti nho.

²⁹Pakazoti perei mupiro, mambo nevaaiva navo vakatiwo pasi gwadagwa kupfugamira.

³⁰Mambo Hezekiya namachinda vakati vaRevhi vaimbe nziyo dzokurumbidza Tenzi vachiimba namazwi aDhavhidhi neomuoni Asafu. Vakaimba dzimbo dzokurumbidza vachifara vakati pasi kota-kota vachipfugamira.

³¹Hezekiya akazoti, “Zvino zvamazviteketerera kuna Tenzi kudai, chiuyai muunze zvibayiro nemipiro yokutenda kumba yaTenzi.” Gungano iroro rakaunza zvibayiro nemipiro yokutenda nevamwewo vose vaiva nemwoyo wokupa vakaunza zvibayiro zvokupisa.

³²Uwandi hwemipiro yokupisa yakaunzwa negungano zvaiva makumi manomwe ehandira nehondohwe zana namazana maviri ehwayana. Dzose idzodzi dzaiva dzomupiro wokupisa wokupira kuna Tenzi.

³³Mipiro yakanga yakateketererwa kuna Mwari yaiva mazana matanhatu ehandira nezviuru zvitatu zvehwai.

³⁴Asi vapristi vaiva vashomanini zvokuti havana kugona kuvhiya mipiro yokupisa yose. Naizvozvo kusvikira vamwe vapristi vazozvichenurawo, ivo vainge vachitobatsirwa nehama dzavo dzokwaRevhi kusvikira basa iroro rapera pari pamusana pokuti vaRevhi ndovakanga vane mwoyo uri pachokwadi kupinda vapristi panyaya yokuzvichenura.

³⁵Tisingaverengere zvedu mipiro yokupisa yakawanda kwazvo paiva namafuta emipiro yokuwadzana paivawo nezvomupiro wokuteura nezvomupiro wokupisa. Ndokugadzirisa kwakaitwa kunamata pamba yaTenzi.

³⁶Hezekiya navanhu vose vakafara kwazvo nezvakanga zvaitirwa vanhu naMwari nokuti izvozvo zvakanga zvaitika nenguva isipi.