Read Bhaibhiri Idzva rechiShona 2 Nhoroondo 30 Bible Online

2 Nhoroondo 30 - Bhaibhiri Idzva rechiShona bible

2 Nhoroondo 30

¹Hezekiya akatumira shoko kwaIsiraeri kwose nokwaJudha akanyorerawo matsamba kwaEfuremu nokwaManase kuti vanhu vauye kumba yaTenzi kuJerusaremu kuzochengta Pasika yokupemberera Tenzi, Mwari weIsiraeri.

²Chakanga chaitika ndechokuti, mambo namachinda ake negungano rose romuJerusaremu, vakanga varangana kuchengeta Pasika mumwedzi wechipiri

³pamusana pokuti havaikwanisa kuichengeta panguva yayo nechikonzero chokuti uwandi hwavapristi vaifanira kuzvichenura hwakanga husati hwakwana uyewo vanhu vakanga vasina kuungana kuJerusaremu.

⁴Mambo negungano rose iroro vakaonawo zano irori riri zano rakanaka.

⁵Nokudaro vakasunga chisungo chokuti shoko riende muIsiraeri yose kubvira kuBheerishebha kusvikira kwaDhani rokuti vanhu vose vanofanira kuuya kuzochengeta Pasika yokupemberera Tenzi Mwari weIsiraeri kuJerusaremu sezvo vakanga vasina kuichengeta nouwandi hwakanga hwatemwa.

⁶Sokutema kwakanga kwaita mambo, vanhu vokumhanya vakaenda kwaIsiraeri kwose nokwaJudha namatsamba aibva kuna mambo namachinda achiti, “Vanhu veIsiraeri dzokerai kuna Tenzi, Mwari waAbhurahamu, Mwari waIsaki, Mwari waIsiraeri kuti iyewo acheukezve katsama kenyu kavanhu vakasara vakapunyuka mumaoko amadzimambo eAsiria.

⁷Musaite samadzibaba enyu nehama dzenyu vakarega kutendeka kunaTenzi, Mwari wamadzibaba avo zvokuti akazovaita sechinhu chokuti ukaona chinokudederesa nokutya.

⁸Zvino chiregai kuomesa musoro sezvakanga zvakaita madzibaba enyu asi zviisei pasi paTenzi muuye kunzvimbo yake inoera yaakaeresa nokusingapere munamate Tenzi, Mwari wenyu kuti achirega kukuvirukirai nehasha.

⁹Chinondidariso ndechokuti kana imi mukadzokera kuna Tenzi, hama dzenyu navana venyu vachanzwirwa tsitsi navakavatapa vakadzokera kunyika ino nokuti Tenzi, Mwari wenyu ane mwoyochena netsiye nyoro uye haazokufuratirai kana imi madzokerawo kwaari.”

¹⁰Saka vokumhanya neshoko vaya vakabvongodza maguta nyika yose yokwaEfuremu naManase kusvikira kwaZebhuruni asi ivo vakatovapfida kuseka vakavazvidza nokuvasveeredza.

¹¹Vanhu vashomanini vokwaAsheru nevokwaManase nevokwaZebhuruni vakazvidukupisa vakauya kuJerusaremu.

¹²Simba raMwari rakavawo nevokwaJudha rikavapa mwoyo mumwechete vakaita zvakarehwa namambo namachinda ake sokutaura kwaTenzi.

¹³Vanhu vazhinji vakaungana muJerusaremu kuzochengeta Mazuva Makuru eChingwa Chisina Mbiriso, mumwedzi wechipiri. Gungano racho raiva gungano guru kwazvo.

¹⁴Vakatangisa basa, vakabvisa atari dzaiva muJerusaremu neatari dzokupisira rusenzi vakandodzikanda mukakova keKidhironi.

¹⁵Vakauraya hwayana yePasika pazuva regumi nechina remwedzi wechipiri. Vapristi nevaRevhi vakanyara nazvo zvikazoita kuti vazvichenurewo vakatozouyawo nemipiro yokupisa mumba yaTenzi.

¹⁶Vakandomira panzvimbo dzavo dzavanofanira kumira maererano nomurawo waMosesi, munhu waMwari. Vapristi vakasasa ropa ravakatambidzwa nevaRevhi

¹⁷nokuti kwakanga kuine vazhinji mukati megungano, vakanga vasina kuzvichenura. Ipapo vaRevhi ndivo vakatenge votourayira hwayana yePasika vose vakanga vasina kuzvichenura kuti iereserwe Tenzi.

¹⁸Zvakadaro zvazvo vanhu vakawanda, vazhinji vavo vari vokwaEfuremu nokwaManase nokwaIsakari nokwaZeburuni havana kunge vazvichenura, asi havana kudya Pasika samanyorerwo azvakanga zvakaitwa. Bva Hezekiya akavanamatira achiti, “Tenzi makanaka regereraiwo munhu wose

¹⁹aita mwoyo wokutsvaka Tenzi Mwari, Mwari wemadzibaba ake kunyange zvazvo asina kutevedza murao yokuchenurwa yomunzvimbo inoera.”

²⁰Tenzi akanzwa Hezekiya akabva aporesa vanhu ivavo.

²¹Vanhu veIsiraeri vakanga vari muJerusaremu vakachengeta Mazuva Makuru eChingwa Chisina Mbiriso kwemazuva manomwe vachifara kwazvo. Izvozvo vaRevhi navapristi vainorumbidza Tenzi zuva nezuva vachiimbira Tenzi vaine zvokuridzira Tenzi nazvo mumhanzi zvine simba.

²²Hezekiya akataurawo zvakafadza mumwoyo vaRevhi vose vainge vari vanhu vainyatsonzwisisa zvokwaTenzi. Vanhu vakadya chokudya cheMazuva Makuru iwayo kwemazuva manomwe vachipira zvibayiro zvokuwadzana vachitenda Tenzi, Mwari wemadzibaba avo.

²³Gungano rose rakazowirirana kuchengeta mamwe mazuva manomwe seMazuva Makuru nokudaro vakaita mamwe mazuva manomwe vachichengeta Mazuva Makuru iwayo.

²⁴Chakavadariso ndechokuti Hezekiya mambo wokwaJudha akapa gungano iroro ravanhu chiuru chehandira nezviuru zvinomwe zvehwai dzokupira. Machindawo akapawo kugungano chiuru chehandira nehwai gumi rezviuru. Vapristi vakazozvichenura vakawanda kwazvo.

²⁵Gungano rose rokwaJudha rakapembera kufara pamwechete navapristi nevaRevhi negungano rose raibvawo kwaIsiraeri nevaigara kwaJudha navatorwa vose vaibva kwaIsiraeri, navatorwa vaibva kwaJudha vakafara kwazvo.

²⁶Saizvozvo kwakafarwa zvikuru kwazvo muJerusaremu zvokuti kubvira panguva yaSoromoni mwanakomana waDhavhidhi mambo weIsiraeri hazvina kumboitika muJerusaremu.

²⁷Vapristi nevaRevhi vakasimuka vakakomborera vanhu, chichemo chavo chakanzwikwa, munamato wavo ukasvika kumuzinda unoera wokudenga.