Read Bhaibhiri Idzva rechiShona 2 Nhoroondo 33 Bible Online

2 Nhoroondo 33 - Bhaibhiri Idzva rechiShona bible

2 Nhoroondo 33

¹Manase akanga ava namakore gumi namaviri paakatangisa kutonga. Akatonga kwamakore makumi mashanu ane mashanu ari muJerusaremu.

²Akaita zvakaipa zvisingadiwi naTenzi achitevedzera tsika dzinosemesa kwazvo dzaiitwa namarudzi akadzingirwa vanhu vechiIsiraeri naTenzi

³nokuti akavakazve nzvimbo dzakatunhumara dzokuteurira dziye dzakanga dzamboparadzwa nababa wake Hezekiya. Iye akavakirawo vanaBhaari atari akagadzirawo zvifananidzo zvokunamata zviAshera. Akapfugamira gurusvusvu rezvinhu zvose zvomudenga achizvinamata.

⁴Akavakawo dziatari mumba yaTenzi yakanga yanzi naTenzi, “PaJerusaremu ndipo pachava nezita rangu nokusingaperi.”

⁵Akavakira atari gurusvusvu rezvinhu zvose zvomudenga muzvivanze zviviri zvemba yaTenzi.

⁶Akapisa vana vake vakomana sezvibayiro mubani remwanakomana wokwaHinomu.[5] Manase akanga apindawo mune zvokufembera nemaminimini nezvoun'anga hwokududzira mashura nokuromba mishonga kumasvikiro nokun'anga. Akaita zvakaipa zvakanyanya kwazvo zvisingadiwe naTenzi akamuvirutsa nehasha.

⁷Chifananidzo chokunamata chaakagadzira chiya akachimisa mumba yaMwari iya yakanga yanzi naMwari kuna Dhavhidhi nokumwanakomana wake Soromoni, “Pamba iyi neJerusaremu pandakasarudza mumadzinza ose eIsiraeri ndipo pandichaisa zita rangu narini wose

⁸uyewo kuti handizoita kuti tsoka yomuIsiraeri ibude kunze vadzungairezve vari kunze, kwenyika yandakasarudzira madzibaba avo. Ndokunge chete vachenjerera kuita zvose zvandakati vaite uye nezvose zviri pamutemo nemirao nezvirevo zvavakapiwa nokuna Mosesi.”

⁹Manase akafurira vokwaJudha pamwechete nevagari vomuJerusaremu zvokuti vakaita zvakaipa zvaitopfuura zvakaitwa namarudzi aye akaparadzwa naTenzi achiadzingira vanhu veIsiraeri.

¹⁰Tenzi akataura kuna Manase nokuvanhu, asi havana kuzviteerera.

¹¹Naizvozvo Tenzi akavaunzira vatungamiriri vehondo vokwamambo weAsiria. Vakasvikobata Manase nezvikochekero vakamusunga nengetani dzendarira vakaenda naye kuBhabhironi.

¹²Ari munhamo yake iyoyi akateterera kuna Tenzi, Mwari wake kuti amucheukewo. Akazvidukupisa kwazvo pana Tenzi, Mwari wemadzibaba ake.

¹³Akanamata kwaari, Mwari akagamuchira chichemo chake akanzwa chikumbiro chake akabva amudzosera kuJerusaremu paumambo hwake. Ndopakazoziva Manase kuti Tenzi ndiye Mwari.

¹⁴Mushure macho akavakira Guta raDhavhidhi rumwe rusvingo nechokunze kumadokero kweGihoni mubani, uye rwekumusuo wokupinda kusuo guru reHove. Akapoterera narwo nokuOfero. Akarurebesa kwazvo kuenda mudenga. Akaisa vatungamiriri vehondo mumaguta ose etsvingo okwaJudha.

¹⁵Akabvisa mumba maTenzi, vamwari vasirivo nechifananidzo chokunamata chiya neAtari dzose dzaakambenge avaka pagomo reimba yaTenzi nomuJerusaremu. Akazvirasira kunze kweguta.

¹⁶Akagadziridzawo atari yaTenzi akapirirapo zvibayiro zvomipiro yokuwadzana neyokutenda. Akatemera vokwaJudha kuti vanamate Tenzi, Mwari waIsiraeri.

¹⁷Kunyange zvakadaro vanhu vakaramba vachipira zvibayiro panzvimbo dzakatunhumara dzokuteurira dziya asi vachipira kuna Tenzi, Mwari wavo chete.

¹⁸Inga dzimwe nyaya dzezvaManase nomunamato wake waakaita kuna Mwari wake nemazwi avaoni vakataura kwaari muzita raTenzi, Mwari weIsiraeri dzirimo muNhoroondo dzaMadzimambo eIsiraeri.

¹⁹Kwouyawo munamato wake nokugamuchirwa kwakaitwa chichemo chake naMwari, nechitadzo chaakapara, nokusava munhu ari pachokwadi kwaakaita nemaakavakira nzvimbo dzokuteurira dzokunamatira akamisa zvifananidzo zviAshera nezvimwewo zvifananidzo zvokunamata asati azvidukupisa, zvakanyorwa wani muNhoroondo dzavaoni.[6]

²⁰Saizvozvo Manase akavata oenda kwakaenda vamwe madzitateguru ake vakamuviga mumba make. Mwanakomana wake Amoni ndiye akazotonga panzvimbo pake.

²¹Amoni akanga ava namakore makumi maviri namaviri paakatangisa kutonga. Akatonga kwemakore maviri ari muJerusareumu.

²²Akaita zvakaipa zvisingadiwi naTenzi sezvakaitwa nababa wake Manase. Amoni akapira zvibayiro kuzvifananidzo zvose zvokunamata zvakanga zvagadzirwa naManase baba vake akazvinamata.

²³Haana kuzvidukupisa pana Tenzi sezvakaita Manase baba vake akazvidukupisa. Amoni iyeyu akaramba achingopara dzimwe mhosva.

²⁴Makurukota ake akaita bangano rokumupandukira vakamuuraya mumba make.

²⁵Vanhuwo venyika iyoyo vakauraya vose vakanga vapandukira mambo Amoni wacho. Vanhu vomunyika imomo vakagadza Josiya mwanakomana wake umambo panzvimbo pake.