Read Bhaibhiri Idzva rechiShona 2 Nhoroondo 36 Bible Online

2 Nhoroondo 36 - Bhaibhiri Idzva rechiShona bible

2 Nhoroondo 36

¹Saka vanhu venyika iyoyo vakazotora Jehoahazi mwanakomana waJosiya vakamugadza umambo muJerusaremu panzvimbo yababa vake.

²Jehoahazi akanga ava namakore makumi maviri ana matatu paakatangisa kutonga. Akatonga kwemwedzi mitatu ari muJerusaremu.

³Mambo weIjipiti akamubvisa paumambo muJerusaremu akateresa nyika mutero wematani matatu esirivha ane makirogiramu mazana mana nendarama yaiita makirogiramu makumi matatu ane mana.

⁴Neko mambo weIjipiti akaita Eriyakimu munun'una waJehoahazi mambo weJudha neJerusaremu akabva amusandura zita omupa rimwe rokuti Jehoyakimu, asi akatakura mukoma wake Jehoahazi akaenda naye kuIjipiti.

⁵Jehoyakimu akanga ava namakore makumi maviri namashanu paakatangisa kutonga. Akatonga kwamakore gumi nerimwechete ari muJerusaremu. Akaita zvakaipa zvisingadiwe naTenzi, Mwari wake.

⁶Nebhukadhineza mambo weBhabhironi akauya kuzomurwisa. Akamusunga nengetani akaenda naye kuBhabhironi.

⁷Nebhukadhineza akatakurawo mimwe midziyo yepamba paTenzi akaenda nayo kuBhabhironi akandoiisa mumuzinda wake muBhabhironi.

⁸Dzimwe nyaya dzezvaJehoyakimu nezvimwe zvakaipisisa kwazvo zvaakaita netumwewo twaaiita twakazobuda zvakanyorwa wani muBhuku raMadzimambo okwaIsiraeri neokwaJudha. Mwanakomana wake Jehoyakini ndiye akazotonga panzvimbo yake.

⁹Jehoyakini akanga ava namakore gumi namasere paakava mambo, akatonga kwemwedzi mitatu negumi ramazuva ari muJerusaremu. Akaita zvakaipa zvisingadiwe naTenzi.

¹⁰Muchirimo panguva yepfumvudza mambo Nebhukadhineza akatumira shoko rokuti aunzwe kuBhabhironi pamwechete nemidziyo inokosha yomumba yaTenzi akabva aita munun'una wake Zedhekiya mambo wokwaJudha neJerusaremu.

¹¹Zedhekiya akanga ava namakore makumi maviri nerimwechete paakava mambo, akatonga kwemakore gumi nerimwechete ari muJerusaremu.

¹²Akaita zvakaipa zvisingadiwe naTenzi, Mwari wake. Haana kuzvininipisa pamberi pomuporofita Jeremiya, aitaura zvaibva mumuromo waTenzi.

¹³Akapandukira mambo Nebhukadhineza akanga aita kuti apike naTenzi mhiko. Akaomesa musoro akaomesa mwoyo wake pane zvokudzokera kuna Tenzi, Mwari weIsiraeri.

¹⁴Vakuru vakuru vose pavapristi pamwechete navanhu zvakanga zvangova zvimwechetezvo zvokurega kuva pachokwadi zvatonyanyisa kwazvo votevedza zviito zvakaipisisa kwazvo zvaiitwa nevechirudzi vachin'oresa imba yaTenzi yaakanga aeresa muJerusaremu

¹⁵Tenzi, Mwari wamadzibaba avo akatuma-atumazve nhume dzake kwavari neshoko pamusana pokuti ainzwira tsitsi vanhu vake nenzvimbo yake yokugara.

¹⁶Asi vakaramba vachinyomba nhume dzaMwari vachitozvidza zvavo mashoko ake vachitafurira vaporofita vake kudzamara Tenzi amukira vanhu vake nehasha kusvikira pasisina chokuzvigadziridza nacho.

¹⁷Naizvozvo akavamutsira mambo wavanhu vechiKaredhea vakauraya namapakatwa majaya avo mumba yavo macho menzvimbo inoera pasina kana zvokumbonzwira tsitsi kuti majaya here kana kuti mhandara kunyange kuti murume mukuru kana kuti munhu achembera; akaisa vose mumaoko ake.

¹⁸Midziyo yose yomumba yaMwari mikuru nemidiki noupfumi hwomumba yaTenzi noupfumi hwamambo nehwemachinda ake akakukucha zvose izvozvi akaenda nazvo kuBhabhironi.

¹⁹Vakapisa imba yaTenzi vakapazira pasi rusvingo rweJerusaremu vakapisa mizinda chaiyo yose yedzimba vachiparadza midziyo yose yakakosha yaivamo.

²⁰Akatapa vakanga vapunyuka mapakatwa vakabva vava varanda kwaari iye navanakomana vake kusvikira pakazomirawo umambo hwokuPezhiya.

²¹Nyika yakambofara kuwana maSabata okutombozororawo zvayo nguva yose iyoyo yamakanga munyika makati hwa musina munhu kusvikira makore makumi manomwe akwana kuzadzikisa shoko raTenzi rakataurwa nomuromo waJeremiya.

²²Mugore rechiposhi rokutonga kwaKoreshi mambo wePezhiya, zvichizadzikisa shoko raTenzi raakataura nomuromo waJeremiya, Tenzi akapinza imwe pfungwa mumwoyo waKoreshi[7] mambo wePezhiya zvokuti akatemera vanhu chirevo nyika dzose dzoumambo hwake; akaitawo zvokuchinyora chokuti,

²³“Zvanzi naKoreshi mambo wePezhiya, Tenzi, Mwari Wedenga akandipa umambo hwenyika dzose dzapasi pano akandipawo basa rokuti ndimuvakire imba kuJerusaremu maJudha. Ani naani pakati penyu anenge ari wavanhu vake vose zvavo, Tenzi, Mwari wake ngaave naye akwireko.”