Read Bhaibhiri Idzva rechiShona 2 Nhoroondo 8 Bible Online

2 Nhoroondo 8 - Bhaibhiri Idzva rechiShona bible

2 Nhoroondo 8

¹Mushure memakore makumi maviri okunge Soromoni avaka dzimba idzi dziri mbiri dzinoti imba yaTenzi nomuzinda wake,

²iye Soromoni akavaka maguta aakanga apiwa naHuramu akandogarisa vanhu veIsiraeri maari.

³Soromoni akazoenda kuHamatizobha akarikurira.

⁴Akavaka Tadhimori kurenje, namaguta ose okuchengetera zvinhu aakavaka muHamati.

⁵Akavakawo Bhetihoroni rokumusoro neBhetihoroni renyasi ari maguta akavakirirwa netsvingo aine misuo mikuru nezvihuri.

⁶Akavakawo Bhaarati namamwe maguta ose okuchengetera zvinhu aakanga ainawo iye Soromoni namaguta ose engoro dzake dzehondo dzamabhiza namaguta avachairi vadzo uyewo nezvimwe zvose zvaaida kuvaka muJerusaremu nokuRebhanoni nomunyika yose yaaitonga.

⁷Vanhu vose vasiri vechiIsiraeri vakasara pakati pevaHiti navaAmori navaPerizi navaHivhi navaJebhusi,

⁸zvizukuru zvakasara zvaivapo munyika imomo mushure mavo zvisina kutsakatiswa nevaIsiraeri, ivava ava ndivo vakapinzwa mubasa rechibharo naSoromoni, ndozvavari nanhasi uno.

⁹Asi vechiIsiraeri Soromoni haana kuvaita varanda vebasa rake. Ndivo vaiva varwi vehondo namakurukota ake navatungamiriri vehondo navakuru vakuru vomungoro dzake dzehondo dzamabhiza navachairi vadzo.

¹⁰Ivava ndiwo makurukota makuru okwamambo Soromoni vari mazana maviri namakumi mashanu vaiva nebasa rokutonga vamwe.

¹¹Soromoni akatamisa mukunda waFarao kuguta raDhavhidhi akamuendesa kumba yaakanga amuvakira. Raaiva naro nderokuti, “Mudzimai wangu uyu haangagare mumuzinda waDhavhidhi mambo weIsiraeri pamusana pokuti pose pakambosvikwa nebhokisi raTenzi rechitenderano, panoera.”

¹²Soromoni aipira mipiro yokupisa kuna Tenzi paatari yaTenzi yaakanga avakira pamberi pekamba kapamusuo petembere

¹³maererano nezvaidiwa zuva nezuva achitevedza mutemo waMosesi wemaSabata nowokugara kwemwedzi newemazuva makuru matatu aya anoti mazuva makuru echingwa chisina mbiriso, nezuva guru rokupemberera mavhiki namazuva makuru amatumba.

¹⁴Sezvirongwa zvababa wake akarongera mapato avapristi basa rawo rokuita. Akarongerawo vaRevhi basa ravo rokurumbidza nerokushanda navapristi sezvaidikanwa zuva nezuva. Akarongerawo vokuchengetedza misuo mukuru muzvikwata zvavo zvokuchengetedza misuo mukuru yacho nokuti ndozvakanga zvanzi nomunhu waMwari Dhavhidhi zvizoitwa.

¹⁵Hapana chavakatsaudzira kuita pane zvakanzi namambo vapristi nevaRevhi vaite zvainangana nechipi nechipi zvacho kana nezvemaichengeterwa upfumi.

¹⁶Ndiko kupedzeswa kwakaitwa basa rose raSoromoni iri kubvira zuva rakatangwa kuvakwa ugaro hwemba yaTenzi kusvikira yapera. Saka imba yaTenzi yakabva yapera kuvakwa.

¹⁷Soromoni akaenda kuEzionigebheru nokuEroti riri mumahombekombe megungwa kunyika yeEdhomu.

¹⁸Huramu akamutumira machinda ake nengarava namachinda nyanzvi dzezvokufamba mugungwa vakaenda kuOfiri pamwechete namachinda aSoromoni. Vakandounza ndarama inorema makirogiramu anopfuura zviuru gumi nezvishanu vakauya nayo kuna mambo Soromoni.