Read Bhaibhiri Idzva rechiShona Ezira 6 Bible Online

Ezira 6 - Bhaibhiri Idzva rechiShona bible

Ezira 6

¹Mambo Dhariusi akabva azopawo chirevo, kukatsvakwa muBhabhironi mumba mokuchengetera zvinyorwa macho makanga machengeterwa zvinyorwa izvozvo.

²Zvakazowanika muEkibhatana guta guru renyika yeMedhia bhuku rokumunonora pakanga pakanyorwa kunzi, “Chiyeuchidzo!

³Mugore rechiposhi rokutonga kwamambo Sairosi akatema chirevo chakanangana nezvemba yaMwari iri kuJerusaremu. Imba iyoyo ngaivakwe zvakare, nzvimbo yokupirira zvibayiro kuna Mwari kunounzwawo mipiro yokupisa. Kureba kuenda mudenga makumi maviri amamita anamamita manomwe, kufara kwayo kuchiita mamita makumi maviri anamamita manomwe.

⁴Inofanira kuva nemitsara inoravana ichiti mitsara mitatu yamabwe makuru yoteverwa nomutsara mumwechete wamapango. Mari inodiwa ikoko inofanira kubva munochengeterwa upfumi hwamambo.

⁵Pamusoro paizvozvo midziyo yendarama neyesirivha yomumba maMwari iya yakambotorwa naNebhukadhineza muTemberi iri kuJerusaremu ikaendeswa kuBhabhironi inofanira kudzoserwa iendeswe kwakare kutemberi iri Jerusaremu mumwe nomumwe panzvimbo pawaiva muirongedze mumba yaMwari imomo.”

⁶“Zvino imi vana Tatenai, zisadunhu renyika iri Mhiri kweRwizi rwaYufuratesi naShetaribhozenai navamwe venyu masadunhu echikwata chenyu muri kunyika iri Mhiri kweRwizi rwaYufuratesi, siyanai nazvo.

⁷Zvebasa remba yaMwari izvo siyanai nazvo. Regai sadunhu wavaJudha navakuru vakuru vavaJudha vavake zvakare imba yaMwari payaiva.

⁸Chimwe ndechokuti ndatotema chirevo chezvinofanira kuitirwa vakuru vakuru vavaJudha maererano nokuvakwazve kwemba yaMwari chokuti mari yacho inodiwapo inofanira kubhadharwa varume ivava yose zvayo yakadaro pasina zvokunonoka ichibva kumari yokwamambo pamutero wenyika yokuMhiri kweRwizi rwaYufuratesi.

⁹Chose zvacho chinenge chichizodiwa sezvakaita handira dzichiri duku nehondohwe kana hwai dzemipiro yokupisira Mwari Wedenga kunyange koroni nomunyu newaini kana mafuta eorivhi, zvichadiwa zvacho navapristi kuJerusaremu; izvozvi izvi vanofanira kuti vapiwe zuva nezuva pasina zvokukundikana,

¹⁰kuitira kuti vapire zvibayiro zvinofadza Mwari Wedenga, vagonamatirawo upenyu hwamambo nohwevana vake.

¹¹Ndatotemazve chimwe chirevo chokuti: Kuwana anongosandura chirevo ichochi, pamba pake ngapavhomorwe bango apaikirwe pariri, imba yake iitwe murwi wamarara.

¹²Iye Mwari akaita kuti zita rake riiswe ipapo ngaaparadze mambo kana vanhu vanenge vane chavangaite kusandura izvi kana kuparadza imba yaMwari iri muJerusaremu. Izvozvi ngazvinyatsoitwa nomazvo chaimo. Chirevo ichochi chatemwa neni. Ndini Dhariusi.”

¹³Tatenai zisadunhu renyika dzokuMhiri kwoRwizi rwaYufuratesi naShetari Bhozenai nevechikwata chavo vakanyatsoita naimomo chaimo makarehwa neshoko rakatumirwa naDhariusi.

¹⁴Izvozvo vakuru vakuru vevaJudha vainge vachivaka zvavo zvichibudirira nokuporofita kwomuporofita Hagai naZekariya mwanakomana waIdho. Vakapedza kuvaka imba yavo sezvakanga zvanzi zviitwe naMwari weIsiraeri uye maererano nechirevo chaSairosi naDhariusi naAtakizesesi mambo wePezhiya.

¹⁵Imba iyoyi yakapedzeswa pazuva rechitatu romwedzi waAdhari, muri mugore rechitanhatu rokutonga kwamambo Dhariusi.

¹⁶Vanhu veIsiraeri, vapristi nevaRevhi navamwe vose vokudzoka kuutapwa, vakaita zuva guru rokuteketerera kuna Mwari imba yaMwari iyi vachipembera kufara.

¹⁷Pakuteketerera imba yaMwari uku vakapira zana rehandira nehondohwe mazana maviri uye hwayana mazana mana pamwechete nomupiro wokupfupira zvitadzo zveIsiraeri yose zvayo wamakotora gumi namaviri zvichienderanawo nouwandu hwamadzinza avaIsiraeri.

¹⁸Vakabvawo varonga vapristi muzvikwata zvavo, vaRevhiwo namajana kuitira basa raMwari muJerusaremu sokunyorwa kwazvakaitwa muBhuku raMosesi.

¹⁹Pazuva regumi nechina romwedzi wokutanga, vokudzoka vaye vokumbenge vatamiswa vachiendeswa kusiri kwavo vakachengeta Pasika

²⁰nokuti vapristi navaRevhi pamwechete vakanga vazvinatsa vose vava vanhu vakazvichenura. Saka vakazviurayira ivo pachavo hwayana yePasika navaye vokudzoka vaya vokumbotamisirwa kusi kwavo nevamwe vavo vapristi.

²¹Yakadyiwa navanhu vechiIsiraeri vakanga vadzoka kwavakanga vatamisirwa kusi kwavo pamwechete nomunhu wose akanga abatanawo navo achizvitsaura mune zvakan'ora zvavanhu vechirudzi vomunyika imomu kuitira kuti vazotsvaka Tenzi, Mwari weIsiraeri.

²²Vakachengeta mazuva makuru echingwa chisina mbiriso kwemazuva manomwe vachifara nokuti Tenzi akanga avafadza kwazvo aitawo kuti mambo weAsiria apinduke mwoyo, uve kwavari avabatsire basa remba yaMwari, Mwari weIsiraeri.