Read Bhaibhiri Idzva rechiShona Ezira 7 Bible Online

Ezira 7 - Bhaibhiri Idzva rechiShona bible

Ezira 7

¹Mushure maizvozvi izvi, panguva yokutonga kwaAtakizesesi mambo wePezhiya, Ezira mwanakomana waSeraya Seraya aberekwa naAzariya Azariya ari mwana waHirikiya

²Hirikiya mwanakomana waSharumu Sharumu wokuberekwa naZadhoki Zadhoki mwana waAhitubhu

³Ahitubhu ari mwana waAmariya Amariya ari mwanawo waAzariya Azariya aberekwa naMeraoti

⁴Mearaoti wokuberekwa naZerahiya Zerahiya mwanakomana waUzi Uzi aberekwa naBhuki

⁵Bhuki wokuberekwa naAbhishua Abhishua mwana waFinehasi mwana waErizeri mwana waAroni mupristi mukuru.

⁶Ezira wacho iyeyu akasimukawo kubva kuBhabhironi. Akanga ari munyori nyanzvi chaiyo yomutemo waMosesi wakapiwa naTenzi, Mwari weIsiraeri. Mambo akamupa zvose zvaakanga akumbira pamusana pokuti ruoko rwaTenzi, Mwari wake rwaiva paari.

⁷Kwakasimukawo vamwe vanhu vechiIsiraeri navapristi nevaRevhi navaimbi navachengetedzi vepamisuo mikuru navashandi vomutemberi vakaendawo kuJerusaremu, mugore rechinomwe rokutonga kwamambo Atakizesesi.

⁸Zvino iye akasvika Jerusaremu mumwedzi wechishanu muri mugore rechinomwe rokutonga kwamambo uyu.

⁹Nokuti pazuva rechiposhi romwedzi wokutanga ndipo paakatangisa rwendo rwokubva kuBhabhironi; kuzoti pava pazuva rechiposhi remwedzi wechishanu, akasvika muJerusaremu pamusana pokuti ruoko rutsvene rwaMwari wake rwaiva paari

¹⁰nokuti Ezira akanga azvipira nomwoyo wose kudzidza mutemo waTenzi nokuuchengeta nokudzidzisawo zvirevo zvake nemirao yake muIsiraeri.

¹¹Tsamba yakapiwa namambo Atakizesesi kumupristi Ezira munyori uya, muzivisisi wezvemitemo nemirao yaTenzi yaakapa Isiraeri; ndeyiyi yaiti:

¹²“Ini Atakizesesi mambo wemadzimambo ndiri kukunyorera iwe Ezira mupristi nyanzvi yomutemo waMwari Wedenga.

¹³Zvino ndatema chirevo chokuti: Ani naani zvake wechiIsiraeri kunyange mupristi kana muRevhi munyika mangu anozvipira zvake kuenda kuJerusaremu ngaaende zvake newe.

¹⁴Sezvo ini namakurukota angu manomwe tirisu tiri kukutumai kundoongorora nezvemutemo waMwari wenyu uri mumaoko enyu kwaJudha nomuJerusaremu

¹⁵uye muendewo nesirivha nendarama yakapiwa zvayo namambo namakurukota ake sechipo kuna Mwari weIsiraeri ane musha wake muJerusaremu

¹⁶pamwechete nesirivha nendarama yamuchawana munyika yose yeBhabhironi pamwechetewo nomupiro wokupa zvavanotsidza zvavo kupirira imba yaMwari wavo iri kuJerusaremu.

¹⁷“Munyatsoona kuti nemari iyoyi manyatsotengawo handira nehondohwe nehwayana pamwechete nemipiro yazvo yembesanwa nemipirowo yazvo yokuteura. Munofanira kupira izvozvo paatari yepaimba yaMwari wenyu iri muJerusaremu.

¹⁸Zvamunenge maonawo imi nehama dzenyu kuti zvakanaka kuitwa nesirivha nendarama inenge yasara, itai zvenyu maererano nezvinenge zvichidiwa naMwari wenyu.

¹⁹Midziyo yamakapiwa yokushandisa mumba yaMwari wenyu, mundozviturira kuna Mwari weJerusaremu.

²⁰Kana pane chimwezve chingadiwe pamba yaMwari wenyu chinenge chichifanira kuti imi mubvise munotora zvenyu mudzimba dzinochengeterwa upfumi hwokwamambo.

²¹“Zvino ini mambo Atakizesesi ndatemera chirevo vanasahomwe vose vari kunyika yokuMhiri kweRwizi rwaYufuratesi chokuti: chose zvacho chinenge charehwa kwamuri nomupristi vaEzira, nyanzvi yomutemo waMwari wedenga nyatsochiitai nomazvo chaimo;

²²sirivha ngaive ingasvike zvayo matani mana ane makirogiramu mazana mana chete; koroni ivewo ingasvike gumi rezviuru zvemakirogiramu chete; waini ive zvayo inosvika zviuru zviviri zvemarita chete; mafuta eorivhi avewo zvawo angasvike zviuru zviviri zvemarita chete; munyu uve usina muganhu.

²³Chose chinenge charehwa naMwari wedenga chepamba yaMwari iyeyo nyatsochiitai nokukurumidza angadaro akavirukira umambo hwangu nehwavanakomana vangu nehasha.

²⁴Tinokuzivisaiwo kuti vapristi nevaRevhi kana vaimbi kana vachengetedzi vepamisuo mikuru kunyange vashandi vepaTemberi kana vamwe vashandi zvavo vepaTemberi yaMwari hamuchabvumirwa nomurao kuvabvisisa mutero kana zvirehwarehwa zvokwamambo kunyange mutero wenzira.

²⁵Zvino iwe Ezira maererano noungwaru hwaMwari hwako hwaunahwo, sarudza vokutonga dzimhosva navatongi vakuru vanotongera vanhu vose venyika iri Mhiri kweRwizi rwaYufuratesi, vose zvavo vanoziva mitemo yaMwari wako, vasingaizive wovadzidzisawo.

²⁶Ani naani zvake anongorega chete kuteerera mutemo waMwari wako nomutemo wamambo ngaatongwe zvakaomarara kungave kunzi aurayiwe kana kudzingwa munyika kunyange kunzi atorerwe zvinhu zvake zvaanazvo kana kuiswa muusungwa.”

²⁷“Ngaarumbidzwe Tenzi, Mwari wemadzibaba edu akaisa izvozvi zvakadai izvi mupfungwa dzamambo zvokushongedza imba yaTenzi iri muJerusaremu

²⁸akaita kuti mwoyochena wake usvikewo kwandiri ndionekwewo somunhu namambo namakurukota ake ndionekwewo somunhu nevakuru vakuru chaivo vepamusoro vokwamambo. Zvakabva zvandikurudzirawo nokuti ruoko rwaTenzi Mwari wangu rwaiva pandiri ndikakokorodza varume vechiIsiraeri vakuru vakuru ndikakwira kuenda navo.”