Read Bhaibhiri Idzva rechiShona Ezira 9 Bible Online

Ezira 9 - Bhaibhiri Idzva rechiShona bible

Ezira 9

¹Mushure mokunge izvi zvaitwa, vakuru vakuru vakauya kwandiri vakati, “Vanhu vechiIsiraeri navapristi nevaRevhi havana kuzvitsaura kune vechirudzi vedzinyika idzi nokune zvakaipa zvadzo zvisingadiwe naMwari kune vechiKanani nevaHiti nevaPerizi nevaJebhusi nevaAmoni nevaMoabhu nevechiIjipiti nevaAmori

²nokuti vakatora zvavo vakadzi pane vamwe vevanasikana vavo vavanhu ava vakatoroorerawo vanakomana vavo, zvokuti rudzi rutsvene urwu rwangova mvenge-mvenge nevechirudzi. Panyaya yokurega kuva pachokwadi iyika, makurukota acho nevakuru vakuru vacho chaivo ndovakanga vava nhungamiri.”

³Pandakazvinzwa ndakabvarura neshungu hembe yangu negemenzi rangu ndikazvigera ndebvu nevhudzi rangu mumusoro ndikati pasi go ndadumbirwa nazvo.

⁴Zvino vose vaye vaidedera shoko raMwari weIsiraeri pamusana pokurega kuva pachokwadi kwevokudzoka vaye vakanga vatapwa vakatamisirwa kusi kwavo vakaunganidzana pandiri ini ndigere ndadumbirwa nazvo kudaro kusvikira panguva yechibayiro chemanheru.

⁵Panguva yechibayiro chemanheru ndakasimuka kubva pandaitsanya nehanzu dzangu nejasi rangu zvakabvaruka. Ndakapfugama ndikasumudza maoko angu kuna Tenzi, Mwari wangu

⁶ndichiti, “Mwari wangu ndinonyara, zvabva zvandishayisa pokuda kuti ndisumudzewo uso kutarisa kwamuri Mwari wangu pamusana pokuti uipi hwedu hwareba pamusoro zvokutotipfuurira. Mhosva dzedu dzavirikidzana kusvika kudenga chaiko iko.

⁷Kubvira mumazuva amadzibaba edu, kusvikira pari nhasi tanga tichingova mumhosva huru. Zvino pamusana pouipi hwedu ihwohwo, isu nemadzimambo edu navapristi vedu takaiswa mumaoko amadzimambo edzinyika idzi kumapakatwa nokuutapwa nomukupambwa nomukunyadziswa chaiko sezvazviri nhasi uno.

⁸Asi zvino tanga tambonzi itirwei mwoyo wakanaka kwechinguva nemi Tenzi, Mwari wedu mukatisiyirawo chitsama chevanhu vakasara nokutipawo hoko yepokugara pakachengeteka munzvimbo yenyu inoera kuitira kuti imi Mwari wedu mutivhenekere meso edu nokutimutsirudza muutapwa hwedu

⁹nokuti tanga tiri varanda asi Mwari wedu hamuna kutisiya tiri varanda kudaro. Asi makaratidza mwoyochena wenyu kwatiri pamberi pemadzimambo ePezhiya mukatimutsurudza mwoyo kuti timise imba yaMwari wedu nokuvakiridza matongo ayo mukaita sorusvingo kwatiri muJudhea nomuJerusaremu.

¹⁰“Ko zvino nhai Mwari wedu tingange tichati kudii pakadai apa nokuti takafuratiraka isu mitemo yenyu

¹¹yamakareva nomuromo wevaranda venyu vaporofita muchiti, ‘Nyika yamava kupinda kundoita yenyu iyi, inyika yakan'oreswa nouipi hwevanhu venyika idzodzo nezviito zvavo zvakaipa zvisingadiwe naMwari zvakazara kunze nokunze nokun'ora kwavo.

¹²Naizvozvo musaroodze vanasinaka venyu kuvanakomana vavo kana kuroorera vanakomana venyu vanasikana vavo. Musambofa makatsvaka zvenyu kuwirirana navo kana kuvabatsira kubudirira kuitira kuti musimbe mudyewo zvakanaka zvomunyika iyoyo muchizoisiyirawo vana venyu senhaka narini wose.’

¹³Mushure meizvozvi zvose zvakadai kutiwira pamusana pezviito zvedu zvakaipa uye nemhosva yedu huru tichionawo kuti imi Mwari wedu hamuna kutiranga sezvataikodzera uye makatotipawo zvenyu chitsama chavanhu vakasara sechichi;

¹⁴ndipo here patingatyore zvakare mitemo yenyu tichiroorerana nevanhu vanoita zvakaipa zvisingadiwe nemi Mwari? Hazvingakushatirisei here mukatosvika pakutiparadza zvokutozosara pasisina chitsama chevanhu vanosara kana kuwana anopunyuka?

¹⁵Imi Tenzi, Mwari weIsiraeri, imi makarurama nokuti takatosiyirwawo chitsama chevanhu vakasara chakatopunyuka sezvazviri nhasi. Hezvika takadai kuva pamuri kunyange pasina angagone kumira pamuri tiine mhosva pamusana paizvozvi.”