Read Bhaibhiri Idzva rechiShona Nehemiya 13 Bible Online

Nehemiya 13 - Bhaibhiri Idzva rechiShona bible

Nehemiya 13

¹Pazuva iroro vakaverengera vanhu bhuku raMosesi vachizvinzwa. Mubhuku iroro vakawana pakanga pakanyorwa kuti, hakuna munhu wechiAmoni kana wechiMoabhu anobvumirwa kupinda mugungano raMwari,

²nokuti havana kundochingura vaIsiraeri nechingwa nemvura asi kutoti vakatovakokera Bhiriamu kuti avarengerere achivashurikidzira rushambwa. Zvakadaro zvazvo Mwari wedu akapindura kurengerera nokuvarengerera rushambwa ikoko achikuita kuti kuve chikomborero.

³Vanhu pavakanzwa mutemo iwoyo vakabvisa muIsiraeri vanhu vose vechirudzi.

⁴Zvisati zvaiitika izvozvi, mupristi Eriyashibhu ndiye akasarudzirwa basa rokuchengetedza dzimba dzomumba yaMwari. Ainzwanana naTobhiya.

⁵Akagadzirira Tobhiya imba huru maaiisa mbesenwa dzomupiro norusenzi nemidziyo nechegumi chembesanwa nechewaini nechamafuta eorivhi zvakanga zvakatemwa nomutemo kuti zvipiwe vaRevhi navaimbi navachengeti vapamisuo mikuru nemipirowo yaipiwa kuvapristi.

⁶Paiitika zvose izvozvi, ini ndakanga ndisiri muJerusaremu, nokuti mugore ramakumi matatu nechipiri rokutonga kwaAtakizesesi, mambo weBhabhironi ndakaenda kwamambo iyeyo. Kwati perei mazuva akati kuti ndakakumbira mambo kuti ndichimbosuduruka zvangu,

⁷ndokubva ndadzokera kuJerusaremu. Ndopandakachizoziva uipi hwakanga hwaitwa naEriyashibhu hokugadzirira Tobhiya imba munhandare dzemba yaMwari.

⁸Zvakandishatirisa kwazvo, ndikakanda kunze kwemba iyoyo midziyo yose yaTobhiya yomumba.

⁹Ndakaudza vanhu kuzochenura dzimba idzodzo ndokuzodzoreramo kwandakaita midziyo yemba yamwari pamwechete nomupiro wembesanwa newerusenzi.

¹⁰Chimwewo chandakaona ndechokuti, vaRevhi vakanga vasina kupiwa migove yavo zvokuti vaRevhi navaimbi vanoita basa vakanga vatotizira kuminda yavo.

¹¹Nokudaro ndakapopotera vakuru vakuru ndichivabvunza kuti, “Ko imba yaMwari yavakushairwa hanya kudai seiko?” Ndokubva ndaunganidza vaRevhi[4] ndikavaisa panzvimbo dzavo.

¹²Vose vokwaJudha vakaunza zvegumi zvavo zvembesanwa nezvewaini nezvemafuta erorivhi maichengeterwa zvinhu.

¹³Ndakasarudza vanhu vandakapa basa rousahomwe ava vanoti: mupristi Sheremiya naZadhoki nyanzvi yomutemo naPedhaya muRevhi. Mutevedzeri wavo aiva Hanani mwanakomana waZakuri mwanakomana wokwaMataniya nokuti vaizivikanwa kuti vanhu vakatendeka. Basa ravo raiva rokugovera zvinhu kuhama dzavo.

¹⁴Mwari wangu ndiyeukeiwo pane zvizvi murege kupfudza zvandakaita zvakanaka zvandakaitira imba yaMwari wangu nebasa rake.

¹⁵Pamazuva iwayo ndakaona vamwe varume vokwaJudha vachisvina zvavo waini muchisviniro nomusi weSabata vachitounza zvavo mirwi yembesanwa vachidzitakudza pamadhongi avo, vaitakurawo waini namagirepisi namakuyu nemimwewo mitoro yakasiyana — siyana yavaiuya nayo muJerusaremu musi weSabata. Ndakavatsiura nezvezuva ravaitengesa zvokudya.

¹⁶Vamwe vanhu vokuTire vaigara muguta umu vaiuyawo nehove nezvimwewo zvinhu vachizvitengesa nemusi weSabata kuvanhu vokwaJudha muJerusaremu.

¹⁷Ndakapopotera vokumbahuru vokwaJudha ndikavati, “Zviiko zvamuri kuita, zvakaipa zvakadai zvinon'oresa Sabata?

¹⁸Handizvo here zvakaitwa namadzibaba enyu izvozvi? Mwari wedu haana kuunza here zvose zvakaipa izvi patiri nokuguta rino, asi imi ndopamava kutopinza Isiraeri mumhosva huru nokun'oresa Sabata.”

¹⁹Kwakati kwava kuda kusvipa, pamisuo mikuru yeJerusaremu, Sabata ravakusvika ndakatiwo misuo inofanira kuzarirwa; ndikati haifaniri kuzarurwa kusvikira Sabata rapera. Ndakapa vamwe vashandi vangu basa rokuchengetedza pamisuo mikuru kuitira kuti pasave nezvinhu zvinotakurwa zvichipindwa nazvo pamusi weSabata.

²⁰Vemhindu dzokutengesa zvinhu navatengi vakatomborara kunze kweJerusaremu kamwechete kana kaviri kose.

²¹Ndakavayambira ndichiti, “Chamunorarira muberere memasvingo chii? Mukapamhidzazve ndinokutumirai vokukubatai.” Kubvira ipapo havana kuzouyazve nomusi weSabata.

²²Ndakaudza vaRevhi kuti vanofanira kuzvichenura vogouya vochengetedza pamisuo mikuru kuitira kuti Sabata riereswe. Mwari wangu mundiyeukewo pamusana penyaya iyi mundiitirewo mwoyochena wenyu.

²³Ndakaonawo pamazuva iwayo, vaJudha vakanga varoora vakadzi vokuAshidhodhi, nokwaAmoni nokuMoabhu.

²⁴Chimwe chikamu chavana vavo chaitaura mutauro wokuAshidhodhi kana mumwewo mutauro wamamwe marudzi, asivasingakwanisi kutaura chiJudha.

²⁵Ndakavatsiura ndikavarengerera rushambwa ndikarova vamwe varume pakati pavo, ndikavadzura vhudzi. Ndakaita kuti vapike mhiko muzita raMwari yokuti, “Hamufaniri kuroodza vanasikana venyu kuvanakomana vavo kana kuzviroorera imi pachenyu

²⁶Soromoni haana kutadza here pamusana pevakadzi vakadai? Kunyange pakati pamarudzi akawanda kwakanga kusina mambo akaita saiye uye aidiwa kwazvo naMwari wake. Mwari akamuita mambo weIsiraeri yose, asi vakadzi vechirudzi vakamuita kuti kunyange iyeyu atadze.

²⁷Tinzwe here zvakare kuti, imiwo mavakuita zvinhu zvakaipa zvikadai! Hamuchatendeki kuna Mwari wedu nokuroora kwamava kuita vakadzi vechirudzika imi?”

²⁸Mumwe wavana vaJoyadha mwanakomana waEriyashibhu mupristi mukuru akanga achitova zvake mukuwasha waSanibharati muHoroni. Naizvozvo ndakamudzinga pandiri.

²⁹Varangarirei, Mwari wangu pamusana pokuti vakan'oresa upristi nechitenderano choupristi nechavaRevhi.

³⁰Naizvozvo ndakavachenesa kuzvinhu zvose zvisiri zvechiJudha ndikatema mabasa avapristi navaRevhi kuti mumwe nomumwe ave nebasa rake.

³¹Ndakaronga zvokuuiswa kwehuni dzomupiro panguva dzakatarwa uye nezvemichero yokutanga. Ndiyeukeiwo Mwari wangu mundizivewo.