Read Bhaibhiri Idzva rechiShona Nehemiya 5 Bible Online

Nehemiya 5 - Bhaibhiri Idzva rechiShona bible

Nehemiya 5

¹Zvino kwakazvomuka kuchema-chema kukuru kwazvo vanhu navakadzi vavo vachigunun'unira hama dzavo dzechiJudha.

²Kwaiva navamwe vaiti, “Pamwechete navana vedu vakomana navasikana kudai, tawanda isu. Dai tawanawo mbesanwa dzokudya tidyewo tigorarama.”

³Kukava nevamwewo vaiti, “Minda yedu nemisha yedu neminda yedu yemugirepisi tiri kutoiita rubatso kuti tiwanewo mbesanwa pamusana penzara iyoyi iyi.”

⁴Kwaivawo navamwe vaitiwo, “Isu takatokwereta mari yeminda yedu neyemindawo yedu yemigirepisi kundoteresa mutero wokwamambo.

⁵Isu tiri vanhu veropa rimwechete nehama dzedu idzodzo. Vana vedu vanongovawo vana vavo. Asi tava kutomanikidzira vana vedu vakomana navasikana kutopinda muuranda. Vamwe vanasikana vedu vakatopinda muuranda. Asi isu chokuti tiite hapana nokuti minda yedu nemindawo yedu yemigirepisi yatova zvayo yevamwe.”

⁶Ndakashatirwa kwazvo pandakanzwa kugunun'una kwavo pamwechete namazwi iwaya.

⁷Ndakazvibvunza mumwoyo zano rokuita, ndikatongesa vokumba huru namakurukota. Ndakati kwavari, “Muri kuita chimbadzo imi kuhama dzenyu, mose zvenyu iyemi.” Ndakavaunganidzira dare guru kwazvo ravanhu,

⁸ndikavati, “Isu takaedzawo napatinogona kununura hama dzedu dzechiJudha dzakanga dzatengeswa kune vechirudzi, asi imi ndopamava kutotengesa zvenyu hama dzenyu kuti isu titoita zvokuvatenga zvakare!” Vakati mwiro-o romuromo vakarishaya.

⁹Ndokubva ndati, “Zvamuri kuita izvi hazvina kunaka. Hamufaniri here kutevedza gwara rokutya Mwari kuitira kuti tirege kushorwa neveChirudzi vavengi vedu.

¹⁰Ini nehama dzangu nevashandi vangu tinovakweretesawo wani mari nembesanwa. Zvechimbadzo izvi, ngatiregei.

¹¹Vadzoserei iye nhasi uno chaiye minda yavo nemindawo yavo yemigirepisi neminda yavo yemiorivhi nemisha yavo pamwechete nechikamu chechizana chemari nechembesanwa nechewaini namafuta eorivhi zvechimbadzo chamanga muchireva kwavari.”

¹²Ivo vakati, “Tichadzosera izvozvo pasina nechatichareva kwavari. Zvamareva ndozvatichaita.” Ndakadaidza vapristi ndichiitisa vatungamiri ivavo mhiko yokuti vaizoita sezvavakanga vatsidza.

¹³Ndakazunzawo hanzu yangu ndikati, “Mwari ngaazunze saizvozvi munhu wose anenge asina kuchengeta chitsidzo ichochi achimubvisa pamba pake nepane twake twose twaakashanda. Ngaazunzwe saizvozvo asare asisina nechinhu chose.” Dare rose rakati, “Ameni,” rikarumbidza Tenzi. Vanhu vakaita sezvavakanga vatsidza.

¹⁴Chimwe ndechokuti kubvira panguva yandakasarudzwa kuva gavhuna wavo munyika yokwaJudha kubvira pagore rechimakumi amviri kusvikira pagore rechimakumi matatu nepiri rokutonga kwamambo Atakizesesi; kwamakore gumi namaviri iwayo ini nehama dzangu hatina kumbenge tichidya zvokudya zvainge zvichifanira kupiwa gavhuna.

¹⁵Magavhuna akanditangira akanga achitakudza vanhu mitoro inorema vachitovatorera zvokudya newaini pamwechete namakumi mana emari yesirivha yamashekeri. Kunyangova vashandi vavo, vaitoremedzawo kwazvo vanhu. Asi ini handaiita saizvozvo pamusana pokutya Mwari.

¹⁶Ndakangotiwo sika sika nebasa rorusvingo urwu ndikarega kuzviwanirawo munda. Vashandi vokwangu vose vakangawo vakaunganidzana ikoko kubasa iroro.

¹⁷Chimwewo ndechokuti vaidya pamwechete neni pateburu yangu, vaiva varume zana namakumi mashanu vechiJudha namakurukota pamwechete navaiuya kwatiri vokumarudzi akanga akatipoteredza.

¹⁸Zvino pazuva paibayiwa izvi zvinoti: mombe imwechete nehwai nhanhatu dzakakora. Ndaibayirwawo huku ndichiwaniswa maguchu amatehwe ewaini yakawanda kwazvo pazuva roga roga rechigumi. Asi kunyange zvakadaro zvazvo handina kumboti nditopiwawo chete zvokudya zviya zvainge zvichifanira kupiwa gavhuna pamusana pokuti vanhu vainge vachitova kare nemutoro inorema.

¹⁹Ndiyeukeiwo ini Mwari kuti zvinhu zvindifambirewo zvakanaka pamusana pezvandakaitira vanhu ava.