Read Bhaibhiri Idzva rechiShona Nehemiya 9 Bible Online

Nehemiya 9 - Bhaibhiri Idzva rechiShona bible

Nehemiya 9

¹Kuzoti wava musi wechimakumi maviri nechina womwedzi iwoyu, vaIsiraeri vakaungana kuzotsanya vakapfeka masaga vakazvidira ivhu.

²VaIsiraeri vakazvitsaura kuvanhu vechirudzi vakasimuka vakareurura zvitadzo zvavo nouipi hwamadzibaba avo.

³Vakamira munzvimbo dzavo vakaverenga muBhuku roMutemo waTenzi, Mwari wavo kwamaawa matatu pazuva. Kwamamwe maawa matatu acho vakareurura vakapfugamira Tenzi, Mwari wavo.

⁴Pakakwirira paya pevaRevhi, pakanga pakamira ava vanoti: Jeshua naBhani naKadhimieri naShebhaniya naBhuni naSherebhiya naBhani naKenani vakachema vachiita zvokudaidzira kuna Tenzi, Mwari wavo.

⁵VaRevhi ava vanoti: Jeshua naKadhimieri naBhani naHashabhuneya naSherebhiya naHodhiya naShebhaniya naPetahiya vakati, “Simukai murumbidze Tenzi, Mwari wenyu. Murumbidzei narini narini wose kusvikira nokusingaperi. Ngarirumbidzwe zita renyu rina mukurumbira Riri pamusorosoro chaipoipo pazvose zvinokudzwa kana kurumbidzwa.”

⁶“Imi moga ndimi Tenzi. Ndimi makasika matenga nedenga rokumatengatenga negurusvusvu nezvinhu zvaro, nyika nezvose zviri mairi makungwa nezvose zviri maari Imi ndimi munozvichengeta, gurusvusvu romudenga rinokugwadamirai.

⁷“Imi Tenzi Mwari ndimi makasarudza Abhuramu, mukamuburitsa kuUru yevechiKaradhea mukazoti zita rake rinzi Abhurahamu.

⁸Pamakaonawo kuti iye, munhu ane mwoyo uri pachokwadi kwamuri makaita chitenderano naye chokupa vana vake nyika yavanhu vechiKanani navaHiti navaAmori navaPerizi navachiJebhusi navaGirigashi. Makazadzisa chitsidzo chenyu pamusana pokuti imi makarurama.

⁹“Makaona nhamo yakaona madzibaba edu muIjipiti mukanzwa kuchema kwavo paGungwa Dzvuku.

¹⁰Makaitira Farao zviratidzo nezvishamiso pamwechete namakurukota ake navanhu vomunyika make nokuti imi maizviziva kuti vaiitira madzibaba edu zenze rokuzvikudza mukabva mazviwanira zita kusvikira pari nhasi.

¹¹Gungwa makariti nepakati tsemu vakatarisa vakapfuura vachitotsika zvavo pasi pakaoma pakati paro gungwa. Makakanda vaivaronda muhwenje hwemvura sedombo mumvura zhinji ine simba.

¹²Masikati makavatungamirira negore usiku mukavatungamirira neshongwe yemoto yokuvavhenekera nzira yokufamba nayo.

¹³Makaburuka imi pagomo reSinai mukataura navo imi muri kudenga. Makavapa zvirevo zvakarurama nemitemo iri pachokwadi. Makavapawo zvirongwa nemitemo yakanaka.

¹⁴Makavadzidzisa nezveSabata renyu dzvene, makavapa mirao nezvirongwa nemitemo nokuna Mosesi muranda wenyu.

¹⁵“Panzara yavo makavapa chingwa chokudya Kupodza nyota yavo, makavapfachurira mvura ichibva padombo. Makavati vapinde kundotora nyika iya, nyika yamakatsidzira kuvapa.

¹⁶“Asi ivo namadzibaba edu vakazvitutumadza, Vakaomesa musoro, mirao yenyu vakaramba kuchengeta.

¹⁷Vakaramba kuteerera, vakakangamwa zvishamiso zvenyu, zvishamiso zviya zvamakavaitira. Vakaomesa misoro vakatosarudza mutungamiriri wokudzokera naye kuIjipiti kuuranda. Asi imi muri Mwari anoregerera, Mwari ane nyasha netsitsi Muno mwoyo murefu nomwoyochena mukuru Hamuna kuda kuvafuratira.

¹⁸Kunyange pavakazviumbira chimhuru choutare hwokunyungurusa Vakati, ‘Uyu ndiye Mwari wenyu Akakuburitsai kuIjipiti.’ Vakakushonhai zvikuru.

¹⁹Asi imi pamusana petsitsi dzenyu dzakawanda hamuna kuvafuratira murenje. Shongwe yegore yaivatungamirira masikati haina kuvasiya Shongwewo yomoto yaivavhenekera mberi nzira yavaifanira kufamba nayo usiku haina kuvasiya.

²⁰Makavapa Mweya wenyu wakanaka wokuvadzidzisa, Mana yenyu yokuti vadye hamuna kuvanyima Makavapawo mvura yokupodza nyota yavo.

²¹Kwamakore makumi mana makavariritira murenje. Hapana chavaishaya. Hanzu dzavo hadzina kusakara. Makumbo avo haana kuzvimba.

²²“Makavapa ndudzi dzavanhu nenyika dzokutonga mukavagovanisa nyika, mativi ose, nezvo vakatora kuita yavo nyika yaSihoni mambo weHeshibhoni nenyikawo yaOgi mambo weBhashani.

²³Makavapa vana vakawanda senyenyedzi dzedenga mukauya navo munyika yamakanga matsidzira madzibaba kuzopindamo vachiita yavo.

²⁴“Saizvozvo vana vavo vakapinda munyika iyoyi vakaiita yavo. Makavaisira pasi pavo vagari venyika iyi vechiKanani mukavaisa mumaoko avo pamwechete namadzimambo avo navanhu vechirudzi vomunyika imomo kuti vaite zvavanoda navo.

²⁵Vakakurira maguta etsvingo nenyika yakapfuma. Vakatora kuita zvavo dzimba dzizere nezvinhu zvose zvakanaka namatsime akaitwa zvokuchenwa padombo neminda yamagirepisi nemindawo yemiorivhi nemiti yemichero yakawanda kuita machiri. Zvokudya vakadya, zvakawanda chaizvo vakanyatsoguta zvokuita miviri chaiyo Vakaita mutambaratede vagere zvavo mune zvakanaka kwazvo zvamunovapa.

²⁶“Kunyange zvakadaro zvazvo havana kuteerera, vakakupandukirai. Mitemo yenyu vakakanda pasi, vakauraya vaporofita venyu vaivakurudzira kuti vatendeukire kwamuri; vakaita zvikuru zvokukushonhai.

²⁷Naizvozvo imi makavaisa mumaoko avavengi vavo vakavaonesa nhamo. Panguva yenhamo yavo iyoyo vakachema kwamuri, muri kudenga ikoko makavanzwa. Netsiye dzenyu nyoro dzakawanda makavapa vanunuri vakavanunura mumaoko evavengi vavo.

²⁸Asi vaiti vakange vava murugare vodzokerazve mukukutadzirai. Imi ndopamaivaisa mumaoko avavengi vavo kuti vagovatonga. Asi pavainge vazopinduka vochema kwamuri mainzwa kudenga ikoko. Netsiye dzenyu nyoro maivanunura kakawanda kwazvo.

²⁹Makayambira kuitira kuti vadzokere kumutemo wenyu; ivo ndopavakazvitutumadza zvavo vakarega kuteerera mirao yenyu vakatoita zvitadzo zvokukanganisa zvirevo zvenyu zvokuti anenge achizvichengeta anorarama; vakava tsvuuramuromo kutogwikura mapendekete kuramba. Vakaomesa musoro vachiramba kuteerera.

³⁰Kwemakore mazhinji maingovaitira mwoyo murefu muchingovayambira noMweya wenyu nomuromo wevaporofita venyu asi hazvina kumbovapinda munzeve. Naizvozvo imi makavaisa mumaoko emarudzi edzinyika idzi.

³¹Kunyange zvazvo zvakadaro netsiye dzenyu nyoro dzakawanda hamuna kubva mavatsakatisa kana kuvafuratira nokuti imi muri Mwari ane ngoni ane tsitsi.

³²“Saka zvino Mwari wedu, iyemi mukuru Samasimbaose, Mwari anotyisa anochengeta chitenderano, Samwoyochena; musaone sechinhu chiduku nhamo dzakawira isu namadzimambo edu navatungamiri vedu navapristi vedu navaporofita vedu namadzibaba edu navanhu venyu vose kubvira panguva yamadzimambo eAsiria kusvikira pari nhasi.

³³Kunyange zvakadaro zvazvo, makangoramba muri mururami pane zvose zvakadai kutiwira pamusana pokuti imi makaita zviri pachokwadi asi isu takaita zvakaipa.

³⁴Madzimambo edu navatungamiriri vedu navapristi vedu namadzibaba edu havana kuchengeta mutemo wenyu kana kumboita hanya nomurao wenyu kana yambiro dzamakavayambira nadzo.

³⁵Kunyange pavainge vari muumambo hwavo havana kukushandirai, vari mune zvakanaka kwazvo zvamaivapa, muzidhandanda renyika yakapfuma yamakatovaisira zvenyu pamberi pavo kupa; asi zvokusiyana nemabasa avo akaipa, havana.

³⁶Hezvi nhasi uno tiri varanda kudai munyika yamakapa madzibaba edu kuti vanakirwe zvavo nemichero yayo nezvipo zvayo zvakanaka, chionai zvino, tangova varanda.

³⁷Zvakawanda kwazvo zvainobereka zvinoenda zvazvo kumadzimambo amakatiisira kuti atitonge pamusana pezvitadzo zvedu. Vanotovawo nesimba rokutonga iyesu vanhu pamwechete nezvipfuwo zvedu sepamadiro avo zvavo. Tayaura isu nenhamo.”

³⁸Pamusana paizvozvi zvose tinosunga chitenderano tigochinyora, vatungamiriri vedu nevaRevhi navapristi vaise pachiri chidhindo chavo choumbo.