Read Bhaibhiri Idzva rechiShona Kubuda 26 Bible Online

Kubuda 26 - Bhaibhiri Idzva rechiShona bible

Kubuda 26

¹“Unofanira kugadzira tendhe rinoera sezvizvi: unotora machira gumi makuru okudzikatirisa ugadzire tendhe rinoera. Machira ngaave erineni akanaka akarukirirwa newuru yeruvara rwedenga neyeruvara rwehute netsvuku worukira mifananidzo yamakerubhu pamachira iwayo.

²Machira acho ose ngaave akaenzana, kureba kwejira rimwe nerimwe ngakuite mamita gumi namaviri, kufara kwaro kuite mamita maviri.

³Pamachira okudzikatirisa iwayo, mashanu acho ngaasonanidzwe pawo oga, mamwewo mashanu asonanidzwewo ari pawo oga.

⁴Usungewo zvishwe zvomucheka woruvara rwedenga pamupendero wejira rokunzekunze pamachira aye okutanga, uite saizvozvo pamupendero wejira rokunzekunze pamachira echipiri aya.

⁵Unosunga makumi mashanu ezvishwe pamupendero wejira rokunzekunze pamachira okutanga aya, wosungawo zvimwe zvishwe makumi mashanu pamupendero wejira rokunzekunze pamachira aye echipiri, zvishwe izvozvo zvisungirirwe zvakatarisana.

⁶Unozogadzira zvokukochekeresa zvendarama makumi mashanu, ukochekedze machira maviri aya okudzikatirisa ave tendhe rimwechete.

⁷“Denga retendhe unorigadzirira machira makuru emvere dzembudzi okuisapo, unoagadzira ari machira okudzikatirisa gumi nerimwechete.

⁸Machira acho ose ari gumi nerimwechete, ngaave akaenzana. Kureba kwejira rimwe nerimwe ngakuite mamita gumi namatatu, kufara kwaro kuite mamita maviri.

⁹Pamachira iwayo, mashanu acho ngaasonanidzwe pawo oga, matanhatu acho asonanidzwewo ari pawo oga. Jira rechitanhatu rinopfuurira nechepamusuo petendhe ngaripeterwe padenga ruviri.

¹⁰Unosunga makumi mashanu ezvishwe pamupendero wejira rokunzekunze pamachira okutanga aya, usungewo zvimwe zvishwe makumi mashanu pamupendero wejira rokunzekunze pamachira aya echipiri.

¹¹Unozogadzira zvokukochekeresa nazvo makumi mashanu zvendarira, ukochekedze machira maviri aye muzvishwe ave rimwechete.

¹²Rimwe jira riya rinosara rakapfuurira mamwe ngarirembere necheseri kwetendhe.

¹³Jira rapadenga rinofanira kupfuurira hwasha hwedenga richiti uku ropfuurira namasendimita makumi mashanu, ukuwo ropfuurira namasendimita makumi mashanu rorembera kumativi maviri kuti rifukidze tendhe rinoera.

¹⁴“Uyewo wozoita madahunha maviri, rimwe racho riite ramatehwe ehwai akasukwa akatsvukiswa, rimwe riri ramatehwe etahashi.

¹⁵“Unofanira kuveza mapango omuunga okumisa chengo chetendhe rinoera.

¹⁶Mapango acho ngaave mamita mana kureba, aine upamhi makumi matanhatu amasendimita ane masendimita matanhatu.

¹⁷Unotema zviga zviviri pabango roga roga zvinobatsira kuti mapango anyatsoti gedye gedye kubatana. Ndizvo zvaunofanira kuita namapango ose etendhe rinoera.

¹⁸Unogadzirawo mapango makumi maviri okumisisa tendhe rinoera kumaodzanyemba,

¹⁹woita zvigadzikiro zvesirivha makumi mana zvokumisa mapango iwayo. Pabango rimwe nerimwe ngapave nezvigadzikiro zviviri. Zvigadzikiro izvozvo ngazvigumane musana pasi pezviga zviya zvamapango.

²⁰Kudivi rechipiri, kuchamhembe kwetendhe rinoera, ngakumiswe mapango makumi maviri

²¹ane zvigadzikiro zvawo zvesirivha zvinokwana makumi mana, pabango roga roga zvigadzikiro zviviri.

²²Kuseri kwetendhe rinoera nechokumadokero ngakuvezerwewo mapango matanhatu.

²³Unofanira kuveza mapango maviri maviri okuisa pamakona maviri okuseri kwetendhe.

²⁴Pamakona iwayo, mapango maviri epo, nechepasi, ngaarege kuti kwati kwati, kumusoro kwawo ngaabatane paringi rokutanga, ndozvaachange akaita ose ari maviri, ndiwo achave pamakona ose iwayo ari maviri.

²⁵Saka kuseri kwetendhe kuchava namapango masere ane zvigadzikiro zvawo zvesirivha gumi nezvitanhatu akati, bango iri nezvigadzikiro zvaro zviviri, iriwo nezvigadzikiro zvaro zviviri.

²⁶“Unofanira kugadzira mbariro dzomuunga, shanu ngadzive dzokubatanidza mapango orutivi rumwechete rwetendhe,

²⁷dzimwe shanu dzive dzokubatanidza mapango orumwe rutivi, kwouyawo dzimwe shanu dzokubatanidza mapango okumadokero kuseri kwetendhe.

²⁸Rumbariro rwapakati ngarutenderere namapango ose nechapakati napakati pawo, kusvika kunze nokunze.

²⁹Mapango ose nembariro dzose ngazvinamirirwe nendarama. Maringi endarama anopfekerwa mbariro ngaaiswe pamapango iwayo.

³⁰Saka unofanira kugadzira tendhe rinoera iroro usingasiyanise nezvandakuratidza mugomo muno.

³¹“Unofanira kutora machira erineni yakanakisisa ugadzire jira rechidzikatiro, urirukire uchirishongedza newuru yeruvara rwedenga neyeruvara rwehute netsvuku. Ushongedze jira iroro uchirirukira zvakanakisisa makerubhu.

³²Jira rechidzikatiro unoriturika pamapango mana omuunga akanamatidzwa ndarama, ane zvipikiri zvendarama nechokumusoro, dzinomiswa pazvigadzikiro zvina zvesirivha.

³³Unorembedza jira rechidzikatiro pane zvokukochekera izvozvo, uise bhokisi rechitenderano mutendhe rinoera munzvimbo iri kuseri kwejira rechidzikatiro. Jira rechidzikatiro ndiro richakamuranisa tendhe kuita nzvimbo mbiri dzinoti: nzvimbo inoera nenzvimbo inoeresesa.

³⁴Unozoisa hwidibiro pabhokisi rechitenderano riri munzvimbo inoeresesa,

³⁵woisawo teburu munzvimbo inoera nechokuchamhembe. Chigadzikiro chomwenje uchiise pakatarisana neteburu iyoyo nechokumaodzanyemba.

³⁶“Unofanira kugadzira jira rokudzikatirisa rokuisa pamusuo wetendhe. Ngarigadzirwe namachira erineni akanakisisa akarukirwa achishongedzwa newuru yeruvara rwedenga neyeruvara rwehute netsvuku.

³⁷Unogadzira mapango mashanu omuunga okubata jira iroro, wonamirira mapango acho ndarama. Ngaave nezvipikiri zvawo zvendarama nezvigadzikiro zvishanu zvendarira.