Read Bhaibhiri Idzva rechiShona Kubuda 29 Bible Online

Kubuda 29 - Bhaibhiri Idzva rechiShona bible

Kubuda 29

¹“Izvi ndizvo zvauchaita kuna Aroni navanakomana vake paunovateketerera kwandiri kuti vandiitire basa roupristi. Unotora handira ichiri duku imwechete nehondohwe mbiri dzisina chinoshoreka padziri,

²wotorawo chingwa chisina mbiriso, nechimwe chingwa chisina mbiriso choupfu hwakakanywa namafuta, nechingwa chakati fatata chisina mbiriso chakazorwa mafuta. Ngachive chakabikwa noupfu hwekoroni hwakanyatsokuyiwa.

³Unozviisa mutswanda, wouya nazvo zviri mutswanda imomo, uuyewo nehandira nehondohwe mbiri dziya.

⁴“Unofanira kuzounza Aroni navanakomana vake kumusuo wetendhe rokusanganira uvati vashambe nemvura,

⁵utore hanzu dziya upfekedze Aroni hanzu inoda kusvika mumabvi negemenzi reefodhi, neefodhi, nenyembe yapadundundu, umusunge muchiuno nomundya wakanyatsorukwa uya weefodhi.

⁶Unomupfekedza ngundu iya mumusoro, womoneredza ngundu iyoyo nekarata kanoera kaya,

⁷utore mafuta okuzodza woadira pamusoro wake, uchimuzodza.

⁸“Unofanira kuunzawo vana vake vakomana uvapfekedze hanzu dzinoda kusvika mumabvi,

⁹usunge vanakomana ivavo mindya muchiuno uvapfekedze nguwani. Basa iroro roupristi richava ravo narini narini. Uku ndiko kugadza kwauchaita Aroni navanakomana vake.

¹⁰“Unofanira kuzounza handira iya kumusuo wetendhe rokusanganira, Aroni navanakomana vake vaise maoko avo pamusoro wayo,

¹¹ubayire handira iyoyo paneni Tenzi kumusuo wetendhe rokusanganira.

¹²Unozotora rimwe ropa rehandira iyoyo, unyike munwe wako urizore pane zvinenge nyanga zviri paatari. Ropa rose rinenge rasara ngaridururirwe pasi munyasi meatari.

¹³Mafuta ari pane zvomukati mehandira atore pamwechete nechinyama chepachiropa netsvo dziri mbiri pamwechete namafuta ari padziri, uzvipise paatari.

¹⁴Asi nyama yehandira iyoyo nedehwe rayo nechinzvinzvi chayo, ngazvipisirwe kunze kwamatendhe nokuti chibayiro ichochi chibayiro chokupfupira zvitadzo.

¹⁵“Unozotorawo imwe yehondohwe dziya, Aroni navana vake vakomana vaise maoko avo pamusoro wayo.

¹⁶Unouraya hondohwe iyoyo, wotora ropa rayo, worisasa paatari yose uchiitenderera.

¹⁷Unocheka-cheka hondohwe iyoyo, wosuka zvose zvomukati mayo namazondo ayo, woisa izvozvo zvose pamwechete namapandi enyama pamusoro wayo.

¹⁸Hondohwe yose iyoyo woipisa paatari, chibayiro ichochi, chibayiro chokupisireni Tenzi, chinonhuwira zvinondifadza, chinopirwa kuna Tenzi chichiita zvokupiswa nomoto.

¹⁹“Imwe hondohwe iya, unozofanira kuitora, Aroni navana vake vakomana vaise maoko avo pamusoro wayo.

²⁰Unobaya hondohwe iyoyo, wotora rimwe ropa rayo, woriisa kwokupedzisira kwenzeve yokurudyi yaAroni, nekwokupedzisira kwenzeve dzavanakomana vake dzokurudyi, woisawo ropa pazvara zvavo zvokurudyi napazvigunwe zvavo zvikuru zvokurudyi. Ropa rose rinenge rasara unorisasa paatari yose uchiitenderera.

²¹Unozotora rimwe ropa riri paatari namamwe mafuta okuzodza, wozvisasa Aroni napahanzu dzake, wozvisasawo vanakomana vake vaanavo napahanzu dzavo. Aroni navanakomana vake vaanavo vacho vanobva vava vatsvene pamwechete nehanzu dzavo.

²²“Unofanirawo kutora mafuta ehondohwe, nomuswe wayo wakakora, namafuta ezvomukati nechinyama chapachiropa netsvo dziri mbiri pamwechete namafuta ari padziri nechidya chokurudyi nokuti (hondohwe iyoyo ndiyo inopirwa pakugadzwa kwavapristi.)

²³Mutswanda ine zvingwa zvisina mbiriso zvakapirwa kuneni Tenzi, unotora chingwa zvacho chimwechete nechimwe chakabikwa namafuta, nechimwe chakati fatata.

²⁴Zvose izvozvo unozviisa mumaoko aAroni navana vake vakomana, vazvivheyese vachiita mupiro wokuvheyesa kwandirini Tenzi,

²⁵wozozvitora mumaoko avo wozvipisira paatari kuwedzera chibayiro chokupisa chiya. Chibayiro ichochi chinonhuhwira zvinofadzeni Tenzi, chinopirweni Tenzi chichiita zvokupiswa nomoto.

²⁶“Unofanira kutora chityu chehondohwe yokugadzwa kwaAroni, wochivheyesa uchiita mupiro wokusimudzira kuna Tenzi, ichocho ndiwo mugove wako.

²⁷“Unoteketerera kwandiri chityu chehondohwe yokugadza ichocho chinenge chavheyeswa chomupiro wokusimudzirwa kuna Mwari nechidya chayo chomugove wavapristi nokuti ndezvaAroni navana vake vakomana.

²⁸Zvichava zvaAroni navanakomana vake somugove wavo narini narini unobva kuvaIsiraeri nokuti mupiro unopirwa uchiita zvokusimudzirwa unobva pane zvinopirwa navaIsiraeri pamipiro yavo yokuwadzana, iwoyu mupiro wavo kuna Tenzi.

²⁹“Hanzu dzinoera dzaAroni dzaanenge asiya, afa, dzichava dzavanakomana vake kuti vadzipfeke pavanozodzwa vachigadzwa upristi.

³⁰Mwanakomana waAroni anenge azotora nzimbo yake youpristi, anenge achizopinda mutendhe rokusanganira kuti ashande ari munzvimbo inoera, anofanira kupfeka hanzu idzodzo kwamazuva manomwe.

³¹“Unofanira kutora nyama yehondohwe inopirwa pakugadzwa kwavapristi uibikire panzvimbo inoera,

³²Aroni navanakomana vake vadyire nyama iyoyo pamwechete nechingwa chiya chakasara chiri mutswanda, kumusuo kwetendhe rokusanganira.

³³Vanodya zvokudya izvozvo zvomupiro wokupfupira zvitadzo unopirwa pavanoteketererwa kwandiri vachigadzwa. Mumwe munhuwo zvake haabvumirwi kuzvidya nokuti zvinoera.

³⁴Kana nyama nechingwa zvapaugadzo ihwohwo zvikafuma mangwana zvichiripo, ngazvipiswe nomoto. Ngazvirege kudyiwa nokuti zvinoera.

³⁵“Ndozvauchaita pakugadza Aroni navanakomana vake uchitevera zvose zvandakuudza. Kuvagadza kwaunoita kunofanira kutora mazuva manomwe.

³⁶Unopira handira yechibayiro chokupfupira zvitadzo pazuva roga roga, uyezve mupiro wokupfupira zvitadzo wokunatsa atari, woizodza mafuta okuieresa.

³⁷Kwamazuva manomwe, pira zvibayiro zvokupfupira atari uchiitira kuti ive inoera. Atari ichava inoera kwazvo. Chii zvacho chinenge chazogunzvana neatari chinobva chava chinoera.

³⁸“Zvamunofanira kuramba muchipira paatari ndezvizvi: hwayana mbiri dzine gore rimwechete pazuva roga roga.

³⁹Imwe unoipira mangwanani, imwewo wozoipira kumanheru.

⁴⁰Hwayana yokutanga unoipira pamwechete noupfu hwekoroni hwakanyatsokuyiwa hunorema kirogiramu rimwechete, hunenge hwakakanyiwa namafuta okusvina eorivhi anoita rita rimwechete, udire rita rimwechete rewaini uve mupiro wokuteura.

⁴¹Hwayana yechipiri unoipira manheru pamwechete noupfu hwomupiro wembesanwa newaini yomupiro wokuteura sezvinenge zvaitwa pamupiro wamangwanani nokuti mupiro iwoyu unonhuhwirira zvinofadza, unopirwa kuna Tenzi uchiita zvokupiswa nomoto.

⁴²Garai muchipira mupiro wokupisa wakadai pazvizvarwa zvenyu zvose muchiuitira kumusuo wetendhe rokusanganira paneni Tenzi kwandichasangana nemi kuzotaura newe.

⁴³Ndikowo kwandichasangana navaIsiraeri, ichava nzvimbo inoera pamusana pokupenya kwokuvapo kwangu.

⁴⁴Ndichaita kuti tendhe rokusanganira neatari zvive zvinhu zvinoera. Ndichaitawo kuti Aroni navanakomana vake vave vanhu vanoera, vandishandire savapristi.

⁴⁵Ini ndichagara pakati pavaIsiraeri, ndiri Mwari wavo.

⁴⁶Ipapo vachazoziva kuti ini Tenzi ndini Mwari wavo akavaburitsa munyika yeIjipiti kuti ndigare pamwechete navo. Ndini Tenzi, Mwari wavo.