Read Bhaibhiri Idzva rechiShona Kubuda 35 Bible Online

Kubuda 35 - Bhaibhiri Idzva rechiShona bible

Kubuda 35

¹Mosesi akakokera musangano wegungano rose ravaIsiraeri akati, “Hezvinoi zvinhu zvanzi naTenzi muite:

²Kwamazuva matanhatu ita zvako basa rako rose, asi zuva rechinomwe iSabata rinoera rokunyatsozorora rinoereserwa Tenzi. Kuwana anoshanda pazuva iroro ngaaurayiwe.

³Musabatidze moto mumisha yenyu pazuva reSabata.”

⁴Mosesi akataurirawo gungano rose ravaIsiraeri kuti, “Hechinoi chirevo chakatemwa naTenzi chinoti:

⁵Ipai kuna Tenzi mipiro yezvinhu zvinobva kwamuri. Ani naani ane mwoyochena wokupa ngaauye zvake nechipo kuna Tenzi. Zvinhu zvaanogona kupa ndezvizvi; ndarama nesirivha nendarira,

⁶kwouya machira erineni akanakisisa, newuru yeruvara rwedenga neyeruvara rwehute netsvuku namachira akagadzirwa nemvere dzembudzi,

⁷kwouyawo matehwe ehondohwe akasukwa akatsvukiswa, namatehwe etahashi, namatanda omuunga,

⁸kwoti mafuta omumarambi, netwokubikisa tunonhuhwira namafuta okuzodza, norusenzi runonhuhwira,

⁹kwozoti tumabwe tweonikisi, notumwe tumabwe twokuisa pahanzu yeefodhi, netwapanyembe yepadundundu.

¹⁰“Nyanzvi dzose dzine ruzivo rwokuita mabasa ngadziuye kuzogadzira zvose zvakanzi naTenzi zviitwe zvinoti;

¹¹tendhe rinoera pacharo, namachira anovakiswa tendhe racho needenga raro, nezvikochekero zvaro, namapango aro akavezwa nembariro dzaro, namapango aro nezvigadzikiro zvawo,

¹²kwouya bhokisi rechitenderano namapango okuritakurisa, nehwidibiro yaro nejira rechidzikatiro,

¹³kwoti teburu namapango ayo okuitakurisa, nemidziyo yayo yose nechingwa chokuisa pana Mwari,

¹⁴kwozoti chigadzikirowo chomwenje wokuvhenekesa nemidziyo yacho, namarambi acho, namafuta awo,

¹⁵uye atari yokupisira rusenzi, namapango ayo okuitakurisa, namafuta okuzodza, norusenzi runonhuhwira, nejira rokudzikatirisa pamusuo wetendhe rinoera,

¹⁶uyezve atari yokupisira zvibayiro, namapango ayo okuitakurisa nemidziyo yayo, nesefa yayo yendarira, namapango ayo okuitakurisa nedhishi rokushambira nechigadzikiro charo,

¹⁷uyewo machira okukomberedza nhandare yayo, namapango awo, nezvigadzikiro zvamapango acho, nejira rokudzikatirisa pasuo guru renhandare,

¹⁸poti hoko dzetendhe rinoera, nehoko dzamachira okukomberedza nhandare, netambo dzacho,

¹⁹pozoti hanzu dzakanyatsorukwa dzokushanda nadzo munzvimbo inoera, hanzu dzinoera dzomupristi Aroni, nehanzu dzavanakomana vake dzokushanda nadzo savapristi.”

²⁰Gungano rose ravaIsiraeri rakazokotonoka richibva paiva naMosesi.

²¹Mumwe nomumwe akanga abatwa mwoyo neakanga achinzwa mumwoyo make shungu dzokupa, akaunza chipo kuna Tenzi kuti chishandiswe pabasa romutendhe rokusanganira napabasa rose remo nokushandisa pahanzu dzinoera.

²²Naizvozvo vanhurume navanhukadzi vaiva nomwoyo wokupa vakaunza mabhurukwa embirichisi namakoza, nemhete namaringi omumaoko, nezvimwe zvakasiyana-siyana zvendarama, mumwe nomumwe achipira chipo chake kuna Tenzi.

²³Ainge aine wuru yoruvara rwedenga kana kuti yeruvara rwehute kana kuti tsvuku, neainge aine jira rerineni rakanakisisa kwazvo nejira remvere dzembudzi, kana matehwe ehondohwe akatsvukiswa, namatehwe etahashi, akauya nazvo.

²⁴Munhu wose aikwanisa kuunza chipo chesirivha kana chendarira akachiunza sechipo kuna Tenzi. Munhu wose ainge ane mapango omuunga aigona kuitiswa basa raimomo akauya nawo.

²⁵Vanhukadzi vose vainge vari nyanzvi dzokuruka vakagadzira machira erineni akanyatsogadzirwa newuru yeruvara rwedenga neyeruvara rwehute netsvuku vakauya nazvo.

²⁶Vanhukadzi vose vaingewo vaine chido mumwoyo mavo, uyewo vari nyanzvi dzokuruka vakagadzira machira emvere dzembudzi.

²⁷Vakuru vakuru vakaunzawo tumabwe tweonikisi notumwe tumambwe twokuisa pahanzu yeefodhi napanyembe yapadundundu,

²⁸vakaunzawo twokubikisa tunonhuhwira namafuta amarambi namafuta okuzodza norusenzi runonhuhwira.

²⁹VaIsiraeri vose, varume navakadzi, vakanga vachinzwa mumwoyo mavo shungu dzokupa zvinhu zvokushandisa mubasa rose rakanga raudzwa Mosesi naTenzi kuti riitwe, vakauya nezvipo zvavo kuna Tenzi.

³⁰Mosesi akaudza vaIsiraeri kuti, “Chinzwaika, Tenzi akadoma nezita Bhezarieri, mwanakomana waUri, muzukuru waHuru wedzinza rokwaJudha, akamusarudza.

³¹Akamuzadza noMweya waMwari, akamupawo kunzwisisa uye nenjere noruzivo kuti agove noumhizha hwose

³²hwokugona kufanotara mifananidzo yezvinhu zvingade kuzopfurwa zvendarama nezvesirivha nezvendarira

³³uye kuveza tumabwe tunokosha twokuisa pazvinhu, nokuvezawo miti nokuitawo mamwe mabasa oumhizha.

³⁴Akamupa, iye naOhoriabhu mwanakomana waAhisamaki wedzinza rokwaDhani, mwoyo wokuda kudzidzisa vamwe.

³⁵Akavapa unyanzvi hwezvokupfura noumhizha mumabasa, nokugona kushongedza vachirukira wuru yeruvara rwedenga neyeruvara rwehute netsvuku uye machira erineni akanakisisa. Akavapawo unyanzvi hwokuruka nohwokuita mabasa ose zvawo, neokufanotara mamiriro ezvingade kuitwa.