Read Bhaibhiri Idzva rechiShona Kubuda 36 Bible Online

Kubuda 36 - Bhaibhiri Idzva rechiShona bible

Kubuda 36

¹“Bhezarieri naOhoriabhu vanofanira kushanda navose vakapiwa naTenzi ruzivo noungwaru hwokuita mabasa ose okuvaka Nzvimbo Inoera, sezvakanzi naTenzi zviitwe.”

²Mosesi akadaidza Bhezarieri naOhoriabhu nenyanzvi dzose dzakanga dzapiwa njere naTenzi dzaivawo nechido chokubatsira pabasa, kuti vazoita basa.

³Vakagamuchira zvipo zvose izvozvo kuna Mosesi zvakanga zvaunzwa navaIsiraeri kuzoitisa basa romuNzvimbo Inoera. Izvozvo vaIsiraeri vainge vachingofumouya nazvo.

⁴Nokudaro nyanzvi dzamabasa akasiyana-siyana dzakauya kubasa romuNzvimbo Inoera dzichibva kumabasa adzo akare.

⁵Nyanzvi idzodzi dzakazotaurira Mosesi kuti, “Vanhu vari kungoramba vachiunza zvipo zvebasa rakanzi naTenzi riitwe, asi zvipo zvacho zvawandisa.”

⁶Mosesi akatuma chirevo mumatendhe chokuti, “Ngapachirega kunge pachave nomurume kana mukadzi anouya nechipo chokushandisa muNzvimbo Inoera.” Naizvozvo vanhu vakarega kuunza zvipo izvozvo,

⁷nokuti zvipo zvakanga zvaunzwa kare zvakanga zvatokwana kuitisa basa iroro, zvichitopfuuridza.

⁸Varume vose vaiva noruzivo rwokuita mabasa pakati penyanzvi dzakanga dzauya, vakagadzira tendhe rinoera vachiritenderedza namachira makuru okudzikatirisa gumi namaviri, erineni akanakisisa newuru yeruvara rwedenga neyeruvara rwehute netsvuku, akarukirirwa zvakanakisisa makerubhu.

⁹Machira acho ose akanga akaenzana, urefu hwawo hwaiita mamita gumi namaviri, hwasha hwawo huchiita mamita maviri.

¹⁰Pamachira iwayo, akasonanidza mashanu pawo oga, akasonanidzawo mamwe acho mashanu ari pawo oga.

¹¹Akaita zvishwe zvomucheka weruvara rwedenga pamupendero wejira rokunzekunze pamachira aye okutanga, akaitawo saizvozvo pamupendero wokunzekunze pamachira aye echipiri.

¹²Akaita zvishwe makumi mashanu pamachira aye okutanga, akaitawo zvimwe zvishwe makumi mashanu pamupendero wejira rokunzekunze pamachira echipiri. Zvishwe izvozvo zvaiva pamachira iwayo zvakanga zvakatarisana.

¹³Akagadzira zvikochekero zvendarama makumi mashanu, ndokubatanidza machira makuru okudzikatirisa maviri aye nezvikochekero izvozvo rikava tendhe rimwechete.

¹⁴Akagadzirawo machira okudzikatirisa gumi nerimwechete emvere dzembudzi okuisa padenga retendhe rinoera.

¹⁵Akagadzira machira acho ose akaenzana, kureba kwawo kwaiva mamita gumi nematatu, hwasha hwawo hwaiva mamita maviri.

¹⁶Akabatanidza pamwechete machira mashanu pawo oga, ndokubatanidzawo pamwechete mamwe machira matanhatu pawo oga.

¹⁷Akaita zvishwe makumi mashanu pamupendero wejira rokunzekunze pamachira aye okutanga, akaitawo zvimwe zvishwe makumi mashanu pamupendero wejira rokunzekunze pamachira aye echipiri.

¹⁸Akagadzira zvikochekero makumi mashanu zvomundarira zvokubatanidza nazvo machira maviri iwayo pamwechete kuita zijira rimwechete.

¹⁹Akagadzira dahunha repadenga retendhe rinoera namatehwe ehondohwe akasukwa akatsvukiswa, neetahashi.

²⁰Akaveza mapango omuunga okumisa chengo chetendhe rinoera.

²¹Urefu hwebango rimwe nerimwe hwaiva mamita mana, hwasha hwaro huchiita masendimita makumi matanhatu.

²²Bango roga roga raiva nezviga zviviri zvokuribatanidza nerimwe. Akaita izvozvi namapango ose etendhe rinoera.

²³Aya ndiwo mavezero aakaita mapango etendhe rinoera. Akaveza mapango makumi maviri okumisa divi retendhe rinoera rokumaodzanyemba.

²⁴Akagadzirawo zvigadzikiro zvesirivha makumi mana zvokumisa mapango iwayo. Pabango rimwe nerimwe paiva nezvigadzikiro zviviri, zvakanga zvakagumana musana pasi pezviga zviya zvamapango.

²⁵Kudivi rimwe retendhe, rokuchamhembe, akagadzira makumi maviri amapango okumisa tendhe,

²⁶akagadzirawo zvigadzikiro zvawo zvesirivha makumi mana achiisa zvigadzikiro zviviri pasi pebango roga roga.

²⁷Akaveza mapango matanhatu okumisa chengo chetendhe cheseri chokumadokero.

²⁸Akaveza mapango maviri maviri okumisa mumakona maviri eshure kwetendhe.

²⁹Mapango maviri akaamisa asina kubatana nechepasi pawo, asi kumusoro akaabatanidza necheparingi rokutanga, ndozvaakaaita ose ari maviri maviri pamakona iwayo maviri.

³⁰Saka chengo chetendhe cheshure chaiva namapango akavezwa masere aiva nezvigadzikiro zvawo zvesirivha gumi nezvitanhatu zviri zviviri zviviri pasi pebango roga roga.

³¹Akagadzira mbariro dzomuunga shanu dzorumwe rutivi,

³²shanu dzorumwewo rutivi, neshanu dzorumwewo rutivi rweseri kwetendhe rinoera kumadokero.

³³Akagadzira rumbariro rwokuisa pakati napakati pamapango akavezwa ruchiapoteredza kusvika kunze nokunze.

³⁴Akanamira ndarama mapango iwayo nembariro ndokuisa maringi endarama pamapango okubata mbariro idzodzo ndokunamira mbariro idzodzo ndarama.

³⁵Akagadzira jira rokudzikatirisa nerineni yakanakisisa yeruvara rwedenga neruvara rwehute nerutsvuku yakarukirirwa makerubhu.

³⁶Akarigadzirira mapango mana akavezwa omuunga akaanamira nendarama, nezvipikiri zvawo zvendarama akaagadzirira zvigadzikiro zvawo zvina zvesirivha.

³⁷Akagadzirawo jira rokudzikatirisa pamusuo wetendhe rinoera, rerineni rakanakisisa rakarukirirwa zvakanakisisa newuru yeruvara rwedenga neyeruvara rwehute netsvuku.

³⁸Akagadzirawo mapango aro mashanu akaanamira ndarama pane zvapamusoro pawo, zvipikiri zvawo zvaiva zvendarama. Asi zvigadzikiro zvawo zvishanu zvaiva zvendarira.