Read Bhaibhiri Idzva rechiShona Kubuda 38 Bible Online

Kubuda 38 - Bhaibhiri Idzva rechiShona bible

Kubuda 38

¹Akaveza mapango omuunga akagadzira atari. Kureba kwayo kwaiita mamita maviri ana masendimita makumi maviri, upamhi hwayo hwaiva mamita mazana maviri ana masendimita makumi maviri, kukwira kwayo kwakanga kuchiita mita imwechete, ina masendimita makumi matatu. Mativi mana eatari akanga akaenzana.

²Akaveza zvainge nyanga zvina zvapamusoro pamakona mana eatari, zvakanga zvakavezwa zvakabatana neatari yacho. Akanamirira atari iyoyo noutare hwendarira.

³Akagadzirawo midziyo yose yokushandisa paatari inoti: migomo yokubvisira dota namafoshoro nembenge namaforogo okubayisa nyama namagwati okutapisa moto nemimwe midziyo yayo yose. Midziyo iyoyi yose yakagadzirwa nendarira.

⁴Akagadzirira atari sefa yendarira yakaita somumbure. Akaisa sefa yacho pazasi pomupendero wapamusoro peatari, ichirembera kusvika pakati.

⁵Akagadzirawo maringi mana endarira akaaisa pamakona mana esefa iyoyo yendarira mokupfekera mapango okutakurisa atari.

⁶Akaveza mapango omuunga akaanamirira nendarira.

⁷Akapfekera mapango iwayo mumaringi apamativi maviri eatari okuwana matakuriro. Akaigadzira namapuranga iine zimhango risina chinhu.

⁸Akagadzira dhishi rendarira rokushambira rine chigadzikiro charo chendarira yaibva kuzviringiriro zvavakadzi vaishanda kusuo guru retendhe rinoera.

⁹Akagadzira nhandare: machira okuikomberedza nawo okuchamhembe erineni akanakisisa aiva noupamhi hunoita mamita makumi mana ana mamita mana. Iwayo aiita mamita makumi mana ana mana.

¹⁰Akaita mapango awo makumi maviri nezvigadzikiro zvawo zvendarira makumiwo maviri. Asi zvipikiri nembariro dzokupfekera machira iwayo zvakanga zviri zvesirivha.

¹¹Kuchamhembe, kwaiva nourefu hwaiita mamita makumi mana ana mamita mana, akaita mapango awo makumi maviri, nezvigadzikiro zvawo zvendarira makumiwo maviri. Asi zvipikiri nembariro dzokupfekera machira iwayo zvakanga zviri zvesirivha.

¹²Kumadokero, kwaiva namachira ane upamhi hunoita mamita makumi maviri ana mamita maviri, namapango awo gumi ane zvigadzikiro zvawo gumi; mbariro nezvipikiri zvawo zvaiva zvesirivha.

¹³Kumusuo wayo, kumabvazuva kwaiva neane mamita makumi maviri ana mamita maviri.

¹⁴Machira okudzikatirisa edivi rimwechete rokusuo guru aiva mamita matanhatu ana masendimita makumi matanhatu namapango awo matatu nezvigadzikiro zvawo zvitatu,

¹⁵rimwewo divi raikoko raivawo namachira akanga aina mamita matanhatu ana masendimita matanhatu nemapango awo matatu nezvigadzikiro zvawo zvitatu.

¹⁶Machira ose okudzikatirisa aikomberedza nhandare yacho akanga akagadzirwa namachira erineni akanakisisa.

¹⁷Zvigadzikiro zvemapango zvaiva zvendarira. Asi zvipikiri zvemapango nembariro dzawo zvaiva zvesirivha, pamusoro pawo pakaputirwawo nesirivha. Mapango ose omunhandare yaro akanga akabatanidzwa nembariro dzesirivha.

¹⁸Jira rokudzikatirisa pasuo rokupinda muruvanze macho rakanga rakarukwa namachira erineni akanakisisa. Rakanga rakarukirirwa richishongedzwa newuru yeruvara rwedenga neyeruvara rwehute netsvuku urefu hwaro huchiita mamita mapfumbamwe, kureba kwaro mudenga kuchiita mamita maviri sezvakangoita machira okudzikatirisa enhandare iyoyo.

¹⁹Mapango awo akanga ari mana, aine zvigadzikirowo zvawo zvendarira zvina. Zvipikiri zvawo zvaivawo zvesirivha, zvapamusoro dzawo nembariro dzawo zviri zvesirivha.

²⁰Hoko dzose dzetendhe rinoera nedzenhandare yakanga yakaripoteredza dzaiva dzendarira.

²¹Zviri pano apa ndizvo zvose zvakashandiswa mutendhe rinoera, tendhe rechitenderano, sokuverengwa kwazvakaitwa zvichitungamirirwa naItamaru, mwanakomana womupristi Aroni, sokuudzwa kwaakanga aitwa naMosesi.

²²Bhezarieri, mwanakomana waUri, muzukuru waHuri wedzinza rokwaJudha, akagadzira zvose zvakanga zvarehwa naTenzi kuna Mosesi

²³aina Ohoriabhu, mwanakomana waAhisamaki wedzinza rokwaDhani. Ohoriabhu aiva nyanzvi yokunyora pasimbi napazvivezwa, aiziva kufanotara mifananidzo yezvinhu zvingade kuzoitwa. Aigona kurukirira machira erineni newuru yoruvara rwedenga neyoruvara rwehute netsvuku.

²⁴Ndarama yose yakashandiswa pabasa rokuvaka Nzvimbo Inoera yakanga yapirwa kuna Mwari, yairema chiuru chamakirogiramu maererano neshekeri romuNzvimbo Inoera.

²⁵Sirivha yakaunzwa negungano ravanhu vakanga vaverengwa yairema zviuru zvitatu zvamakirogiramu zvina mazana mana ana makumi matatu amakirogiramu ari pamwero wemari yeshekeri yomuNzvimbo Inoera,

²⁶bheka pamunhu, zvichireva hafu yeshekeri romuNzvimbo Inoera pamunhu mumwe nomumwe akanga averengwa pakuverenga vanhu ikoku, kubvira kuna vaiva namakumi maviri amakore zvichikwira. Yaiva yavarume mazana matanhatu ezviuru ane zviuru zvitatu namazana mashanu ane makumi mashanu avanhu.

²⁷Pasirivha iyoyo, makirogiramu akagadziriswa zvigadzikiro zvamapango eNzvimbo Inoera, needzejira rechidzikatiro, zviuru zvitatu namazana mana.

²⁸Pamakirogiramu makumi matatu esirivha akasara, Bhezarieri akaagadzirisa zvipikiri zvamapango nokunamirira misoro yamapango dzokushandisa pambariro.

²⁹Ndarira yomupiro wokuvheyeswa yairema makirogiramu zviuru zviviri zvine mazana mana ana makumi maviri amakirogiramu namakirogiramu mashanu.

³⁰Ndiwo aakatora akagadzira zvigadzikiro zvamapango dzapamusuo wetendhe rokusanganira, akagadzirawo nawo atari yendarira nesefa yayo yendarirawo nemidziyo yose yeatari iyoyo;

³¹kwouyawo zvigadzikiro zvaitenderedza nhandare yose, nezvigadzikiro zvapasuo guru raro nehoko dzose dzetendhe rinoera, nedzamachira okudzikatirisa aikomberedza nhandare yaro yose.