Read Bhaibhiri Idzva rechiShona Kubuda 39 Bible Online

Kubuda 39 - Bhaibhiri Idzva rechiShona bible

Kubuda 39

¹Vakatora wuru yeruvara rwedenga neyeruvara rwehute netsvuku vakagadzira hanzu dzavapristi dzaipfekwa pakuita basa romunzvimbo inoera. Vakagadzira hanzu dzinoera dzaAroni, sokuudzwa kwakanga kwaitwa Mosesi naTenzi.

²Akagadzira hanzu yeefodhi namachira erineni akanakisisa. Akairukira newuru yeruvara rwedenga neyeruvara rwehute netsvuku neshinda yendarama.

³Vakapfura ndarama vachiita mapape. Vakacheka-cheka mapape endarama iwayo vachiita tutseta tutetetete, twakazorukirwa mumachira erineni akanakisisa newuru yeruvara rwedenga neyeruvara rwehute netsvuku.

⁴Vakagadzirira efodhi zvipenga zviviri zvepamapfudzi zvikasonererwa pairi,

⁵nomundya wayo wokuisungisa wakanga wakanyatsorukwa nejira rakafanana nerayo, rerineni rakanakisisa, wakarukirwa neshinda yendarama newuru neyeruvara rwedenga noruvara rwehute netsvuku, sezvakanga zvaudzwa Mosesi naTenzi.

⁶Akatora mabwe eonikisi, akaaisa patusefa twesimbi twendarama akanyora paari sezvinoitwa pachidhindo, mazita avanakomana vaVaIsiraeri.

⁷Akaisa mabwe iwayo pazvipenga zvapamapfudzi peefodhi kuti ave okuyeuka nawo vanakomana vaIsiraeri, sokuudzwa kwakaitwa Mosesi naTenzi.

⁸Akagadzira nyembe yepadundundu yakanyatsogadzirwa yakaitwa sezvakaitwa efodhi. Yakagadzirwa nejira rerineni rakanakisisa, rakarukirirwa neshinda yendarama newuru yeruvara rwedenga neyeruvara rwehute netsvuku.

⁹Yaive yakapetwa ruviri, iine mativi mana akaenzana. Kureba nokufara kwayo kuchiita masendimita makumi maviri ana masendimita maviri.

¹⁰Akaisa pairi mitsara mina yetumabwe tunokosha. Mutsara wokutanga wakanga uine katombo kerubhi netopazi neganeti.

¹¹Mutsara wechipiri waiva nekeemeradhi nesafaya nedhaimondi.

¹²Mutsara wechitatu waiva neketekoizi neagati neametesiti.

¹³Mutsara wechina waiva nekebheriri neonikisi nejasipa. Twakanga twakaiswa patusefa twesimbi twendarama.

¹⁴Paiva notumatombo gumi netuviri tune mazita anofambirana namazita avanakomana vavaIsiraeri. Twakanga twakanyorwa mazita amadzinza gumi namaviri evaIsiraeri, katombo koga koga kaine zita rako.

¹⁵Vakagadzira tucheni tuviri twakakoswa twendarama chaiyo yakanakisisa vakatuisa panyembe iye yapadundundu.

¹⁶Vakagadzirawo tusefa twesimbi tuviri twendarama twokunamatidza mabwe, namaringi endarama maviri, vakasonera maringi maviri iwayo pamakona maviri okumusoro kwenyembe yepadundundu.

¹⁷Vakasungirira tucheni tuviri twendarama twakakoswa tuye pamaringi maviri epanyembe yepadundundu.

¹⁸Vakasungirira tucheni tuviri twokumusoro tuye patusefa twesimbi twendarama twuya twapamapfudzi tukava nechepamberi pezvipenga zviviri zveefodhi zvapamapfudzi.

¹⁹Vakagadzirawo maringi maviri endarama vakaasonera nechomukati menyembe yapadundundu pamakona ezasi pedyo neefodhi.

²⁰Vakagadzirawo mamwe maringi maviri endarama vakaasonera nechemberi, pamakona ezasi ezvipenga zviviri zvepamapfudzi zviya zveefodhi pedyo nomupendero wayo pamusoro pomundya uya wakanyatsorukwa.

²¹Vakasunga nyembe yapadundundu nomumaringi acho, nomundya weruvara rwedenga vachisunganidza maringi epanyembe yapadundundu namaringi epaefodhi. Nokudaro nyembe yapadundundu yakagara yakasimba iri nechokumusoro kwomundya womuchiuno, kuitira kuti nyembe irege kubva paefodhi, sezvakanga zvaudzwa Mosesi naTenzi.

²²Akagadzirawo gemenzi reefodhi, rakarukwa rose zvaro riri rweruvara rwedenga.

²³Raiva nehuro pakati paro pokupinza napo musoro. Paiva nomupendero wakarukwa uchipoteredza huro iyoyo kuti rirege kubvaruka.

²⁴Pamupendero wegemenzi iroro wose wezasi vakasonera zvinenge michero yemapomegiraneti zveruvara rwedenga nezveruvara rwehute nezvitsvuku nejira rerineni rakanakisisa.

²⁵Vakagadzirawo tumadare twendarama chaiyo yakanakisisa. Pamupendero wakatenderedza gemenzi iroro vakasonerera kadare pakati peainge mapomegiraneti maviri oga oga.

²⁶Vakazvisonerera zvichitsinhanha zvichiti apa kadare apa kanenge muchero wemapomegiraneti; apa kadare apa kanenge muchero wemapomegiraneti zvakatenderera mupendero wose wegemenzi rokushandisa pabasa raMwari, sokuudzwa kwakaitwa Mosesi naTenzi.

²⁷Vakagadzirirawo Aroni navanakomana vake hanzu dzinenge dzoda kusvika mumabvi dzejira rerineni rakanakisisa,

²⁸kwouya ngundu yejira rerineni rakanakaisisa nenguwani dzejira rerineni rakanakisisa kwazvo, namabhurukwa ejira rerineni rakanakisisa,

²⁹kwoti mundya wejira rerineni rakanakisisa rakarukirirwa newuru neyeruvara rwedenga neruvara rwehute netsvukutsvuku, sokuudzwa kwakaitwa Mosesi naTenzi.

³⁰Vakagadzira karata kechiremba kanoera kendarama chaiyo yakanakisisa vakanyorapo sezvinoitwa pachidhindo mazwi anoti, “Nyakutsaurirwa Tenzi.”

³¹Vakasungirira tambo yebhuruu pakarata ikako yokukasungirira nayo pangundu iya, nechapamusoro payo sokuudzwa kwakaitwa Mosesi naTenzi.

³²Ndokupedza kwakaitwa basa rose rokugadzira tendhe rokusanganira. VaIsiraeri vakagadzira izvozvo zvose sokuudzwa kwakaitwa Mosesi naTenzi.

³³Vakaunza kuna Mosesi izvi zvinoti: tendhe rinoera, machira etendhe racho nemidziyo yaro yose, nezvikochekero zvaro namapango aro akavezwa, nembariro dzaro namapango aro nezvigadzikiro zvawo,

³⁴kwouya dahunha repadenga ramatehwe ehondohwe akasukwa akatsvukiswa uye nerimwe dahunha repo ramatehwe etahashi, nejira rechidzikatiro,

³⁵kwouyawo bhokisi rechitenderano namapango aro, nehwidibiro yaro;

³⁶kwoti teburu nemidziyo yayo yose, nechingwa chokuisa pana Mwari,

³⁷nechigadzikiro chomwenje chendarama chaiyo namarambi acho, nemidziyo yacho yose namafuta emarambi;

³⁸kuchizoti atari yendarama namafuta okuzodza nawo, norusenzi runonhuhwirira, namachira okudzikatirisa pamusuo wetendhe rinoera;

³⁹kwozouya atari yendarira nesefa yayo yendarira namapango ayo nemidziyo yayo yose nedhishi rokushambira nechigadzikiro charo;

⁴⁰kwozouyawo machira okukomberedza nhandare yayo namapango aro nezvigadzikiro zvawo, namachira okudzikatirisa pasuo raro guru, netambo dzaro nehoko dzaro nemidziyo yaro yokushandisa mutendhe rinoera rokusanganira;

⁴¹pachizouya hanzu dzinoera dzokushandisa munzvimbo inoera dzakanyatsorukwa, dzomupristi Aroni, nehanzu dzavanakomana vake dzokushandisa savapristi.

⁴²VaIsiraeri vakaita basa iroro rose maererano nezvakaudzwa Mosesi naTenzi.

⁴³Mosesi akatarisa zvose zvakanga zvagadzirwa akaona kuti zvakanga zvaitwa naimomo chaimo makanga manzi naTenzi muitwe nomo. Mosesi akavapa chikomborero.