Read Bhaibhiri Idzva rechiShona Kubuda 4 Bible Online

Kubuda 4 - Bhaibhiri Idzva rechiShona bible

Kubuda 4

¹Mosesi akapindura achiti, “Ko, kana vaIsiraeri vakaramba kubvuma zvandichareva vasinganditeereri vachiti, ‘Inhema, Tenzi haana kuzviratidza kwauri, panozoitwa sei?’ ”

²Tenzi akamuti, “Ko chii chaunacho muruoko icho?” Akati, “Itsvimbo.”

³Mwari ndokuti, “Ikande pasi.” Akaikanda pasi ikasanduka ikava nyoka Mosesi ndokubva ava kuitiza.

⁴Tenzi akati kuna Mosesi, “Tambanudza ruoko rwako uibate nokumuswe kwayo.” Mosesi akaibata ikava tsvimbo zvakare.

⁵Mwari ndokuti, “Kana ukandoita izvozvi vaIsiraeri vachabvuma kuti ndakazviratidza kwauri ini Tenzi, Mwari wamadzibaba enyu. Ndini Mwari waAbhurahamu naMwari waIsaki, naMwari waJakobho.”

⁶Tenzi akatizve, “Isa ruoko rwako muhanzu dzako nechapadundundu pako.” Mosesi akaisa ruoko rwake muhanzu nechapadundundu. Paakaruburitsa, akaona rwangoti mbe-e kuchena, rwava namaperembudzi.

⁷Mwari akati, “Isazve ruoko rwako muhanzu dzako nechapadundundu pako.” Mosesi akaita saizvozvo, akazoruburitsa wanei rwanyatsopora, rwaita sezvakangoitawo muviri wake.

⁸Mwari akati, “Kana vachinge varamba kubvuma zvauchareva, kana kugamuchira chiratidzo chokutanga, zvimwe vachanzwa zvinoreva chiratidzo chechipiri.

⁹Kana vakaramba kugamuchira zviratidzo izvi zviri zviviri, kana kuramba kunzwa zvauchareva, teka mvura muna Nairi uidururire pasi pakaoma mvura iyoyo yaunenge wateka muna Nairi ichasanduka kuva ropa pasi ipapo.”

¹⁰Mosesi akati kuna Tenzi, “Tenzi wangu, ini handigoni kunyatsotaura. Hazvisi zvanhasi chete, ndakangobvira kare ndakadai, kanawo pamanga muchitaura neni ndizvo ndizvo. Ini ndinondandama nokutaura ndichikakama.”

¹¹Tenzi akati kwaari, “Ko ndianiko akasika muromo womunhu? Ko ndiani anoita kuti munhu ave mbeveve kana matsi? Ndiani anopa munhu maziso, kana kumupofomadza? Handiti ndini iyeni Tenzi here?

¹²Saka zvino chienda. Ini ndichakubatsira pakutaura kwako. Ndichakurayiridza zvokutaura.”

¹³Asi Mosesi akati, “Ndapota zvangu Tenzi wangu, tumai zvenyu mumwe munhu!”

¹⁴Ipapo Tenzi akashatirirwa Mosesi akati, “Inga mukoma wako Aroni, muRevhi, ariko wani! Ndinoziva kuti iye anogona kutaura zvakanaka. Chiteerera unzwe, izvozvi ari kutouya kuzokuchingura, paachakuona achafara zvikuru.

¹⁵Iwe unofanira kumuudza zvokundotaura. Paunenge uchitaura iwe, napaanenge achitaurawo iye, ndichakubatsirai ndichikurayiridzai zvokuita.

¹⁶Ndiye anenge achikusvitsira mashoko kuvanhu, ari iye muromo wako. Iwe unenge wakaita saMwari kwaari.

¹⁷Chienda wakabata tsvimbo iyi, ndiyo yauchaita nayo zviratidzo zvinoshamisa.”

¹⁸Mosesi akadzokera kuna vatezvara vake vaJetero ndokusvikoti, “Ndibvumireiwo kudzokera kuIjipiti kundoona hama dzangu kuti vapenyu here.” Jetero akati kuna Mosesi, “Zvakanaka, enda hako.”

¹⁹Mosesi paakanga achiri kunyika yeMidhiani, Tenzi akataura kwaari achiti, “Chidzokera zvako kuIjipiti nokuti vanhu vose vaida kukuuraya vakafa.”

²⁰Nokudaro Mosesi akatora mudzimai wake navana vake vakomana akavakwidza padhongi, ndokubva vapinda munzira kudzokera kuIjipiti. Mosesi akatora tsvimbo yaMwari akaenda akaibata muruoko.

²¹Tenzi akati kuna Mosesi, “Zvino kana wadzokera kuIjipiti, ibva wandoitira Farao pameso pake zvishamiso zviya zvose zvandakakupa simba rokuita. Asi ndichaita kuti Farao aomese mwoyo, arege kubvumira vaIsiraeri kubva munyika make.

²²Iwe unofanira kundotaurira Farao kuti, ‘Zvanzi naTenzi: Isiraeri ndiye mwanakomana wangu wedangwe.

²³Zvino ndinoti rega mwanakomana wangu Isiraeri aende kundondinamata. Asi iwe uri kuramba. Chinzwa, ini ndichaurayawo mwanakomana wako wedangwe.’ ”

²⁴Vari pane imwewo nzvimbo pavakavata vachiri murwendo, Tenzi akasangana naMosesi akada kumuuraya.

²⁵Ipapo Zipora mudzimai waMosesi akatora ibwe rinopinza akadzingisa mwanakomana wake. Akagunzva kumakumbo kwaMosesi nenhengo yaakanga abvisa pakudzingisa ikoku achiti, “Zvechokwadi ndichinemi somurume wangu nokuda kweropa iri.”

²⁶Mwari ndokubva amuregera. Chakakonzera mudzimai uyu kuti ati, “Ndichinemi somurume wangu nokuda kweropa iri,” kwaiva kudzingisa ikoku.

²⁷Tenzi akataurira Aroni kuti, “Enda undochingura Mosesi kurenje.” Aroni akandosangana naMosesi pagomo raMwari, akamukwazisa achimutsvoda.

²⁸Mosesi akaudza Aroni mashoko aTenzi aakatumwa nawo kuIjipiti, akamutaurirawo zviratidzo zvose zvaakaudzwa kundoita.

²⁹Mosesi naAroni vakaenda vakandokokorodza vakuru vakuru vose vavaIsiraeri.

³⁰Ipapo Aroni akavaudza mashoko ose akanga ataurirwa Mosesi naTenzi, akaita zviratidzo zvose zviya vaIsiraeri vachiona,

³¹Vanhu vakabva vabvuma. Pavakanzwa kuti Tenzi akashanyira vaIsiraeri, akaonawo kutambudzika kwavo, vakakotamisa misoro kwaari vakapfugama kumunamata.