Read Bhaibhiri Idzva rechiShona Kubuda 40 Bible Online

Kubuda 40 - Bhaibhiri Idzva rechiShona bible

Kubuda 40

¹Tenzi akati kuna Mosesi,

²“Pazuva rokutanga romwedzi wokutanga, unofanira kumisa tendhe rinoera rokusanganira,

³uise bhokisi rechitenderano mutendhe imomo; uisewo jira rechidzikatiro rokudzikatidza bhokisi rechitenderano.

⁴Unofanira kuuya neteburu iya mutendhe imomo, urongedze pairi midziyo yayo. Uunzewo chigadzikiro chomwenje uise marambi acho pachiri.

⁵Unouyawo neatari yendarama yokupisira rusenzi uiise pakatarisana nebhokisi rechitenderano, uise jira rokudzikatirisa pamusuo wetendhe rinoera.

⁶Unofanira kuisa atari yokupisira zvibayiro kumusuo, mutendhe rinoera rokusanganira;

⁷ugadzike dhishi rokushambira pakati petendhe rinoera neatari inopisirwa zvibayiro uriise mvura.

⁸Unozomisa machira okudzikatirisa ukomberedze nhandare yose yetendhe rinoera, uturike machira okudzikatirisa pasuo guru rokupinda munhandare.

⁹“Ndopaunozotora mafuta okuzodza wozodza tendhe rinoera nezvose zvirimo, uriteketerere kwandiri pamwechete nemidziyo yaro yose, richabva rava chinhu chinoera.

¹⁰Unofanirawo kuzodza atari yemipiro yokupisa nemidziyo yayo uriteketerere kwandiri. Atari iyoyo ichabva yave inoeresesa kwazvo,

¹¹uzodzewo dhishi rokushambira nechigadzikiro charo, uriteketerere kwandiri.

¹²“Unofanira kuzouya naAroni navana vake vakomana kumusuo wetendhe rokusanganira uvati vashambe nemvura,

¹³wobva wapfekedza Aroni hanzu dzinoera, umuzodze mafuta aye, umuteketerere kwandiri kuti andishandire basa roupristi.

¹⁴Vanakomanawo vake uuye navo, uvapfekedze hanzu dzinenge dzoda kusvika mumabvi,

¹⁵uvazodzewo sokuzodza kwaunenge waita baba vavo, kuti vandiitire basa roupristi. Nokuzodzwa ikoku vachava vapristi nokusingaperi pazvizvarwa zvavo zvose.”

¹⁶Ndozvakazoitwa naMosesi, akaita zvose naimomo chaimo maakanga audzwa naTenzi.

¹⁷Naizvozvo pazuva rokutanga, romwedzi wokutanga, wegore rechipiri rokubuda kwevaIsiraeri muIjipiti, tendhe rinoera rakamiswa.

¹⁸Mosesi akamisa tendhe rinoera, akaronga zvigadzikiro zvaro, akamisa mapango aro akavezwa, akaisawo mbariro dzaro, akamisa mbiru dzaro.

¹⁹Akawarira tendhe padenga retendhe rinoera, akazoisawo tendhe rokufukidza pamusoro paro sokuudzwa kwaakaitwa naTenzi.

²⁰Mosesi akatora mafendefa amabwe echitenderano aye akaaisa mubhokisi rechitenderano. Akapfekera mapango okutakurisa bhokisi iroro ndokuripfiga nehwidibiro yaro.

²¹Akaunza bhokisi iri mutendhe rinoera ndokuturika jira rechidzikatiro rikadzikatidza bhokisi rechitenderano, sokuudzwa kwaakanga aitwa naTenzi.

²²Mosesi akaisa teburu mutendhe rokusanganira kuchamhembe kwetendhe rinoera, nechekunze kwejira rechidzikatiro.

²³Akarongawo chingwa pana Tenzi sokuudzwa kwaakaitwa naTenzi.

²⁴Mosesi akaisa chigadzikiro chomwenje mutendhe rokusanganira, chakatarisana neteburu iye kumaodzanyemba, mutendhe rinoera.

²⁵Akagadzikira marambi acho pana Tenzi sokuudzwa kwaakanga aitwa naTenzi.

²⁶Mosesi akaisa atari yendarama mutendhe rinoera nechepamberi pejira rechidzikatiro,

²⁷ndokupisa rusenzi runonhuhwira pairi sokuudzwa kwaakanga aitwa naTenzi.

²⁸Akaturika jira rokudzikatirisa pamusuo wetendhe rinoera.

²⁹Akaisa atari yokupisira mipiro yokupisa kumusuo kwetendhe rinoera rokusanganira, akapira pairi mupiro wokupisa akapirawo upfu hwomupiro wembesanwa, sokuudzwa kwaakanga aitwa naTenzi.

³⁰Mosesi akagadzika dhishi rokushambira pakati petendhe rokusanganira neatari, akariisa mvura yokushamba

³¹yokuti iye Mosesi kwouya Aroni navanakomana vake vapote vachishamba maoko namakumbo avo,

³²pakupinda mutendhe rokusanganira napakuenda paatari, vaishamba sokuudzwa kwaakanga aitwa naTenzi.

³³Mosesi akamisa machira aye okudzikatirisa akakomberedza nhandare yetendhe rinoera, neatari ndokumisawo machira okusuo guru rokupinda munhandare. Naizvozvo Mosesi akapedza kuita basa iroro rose.

³⁴Ipapo gore rakakwidibira tendhe rokusanganira, kupenya kwokuvapo kwaTenzi kukazadza tendhe rinoera.

³⁵Mosesi haana kukwanisa kupinda mutendhe rokusanganira pamusana pegore rakanga rakati kwidiba pariri uyewo nokupenya kwokuvapo kwaTenzi kwakanga kwakazadza tendhe rinoera.

³⁶Murwendo rwavo rwose, vaIsiraeri vaiti kana gore rasimuka, rabviswa patendhe rinoera, vaibva vasimudzirawo rwendo rwavo.

³⁷Asi kana gore iroro rainge risina kubviswapo, havaizosimudzira rwendo rwavo kusvikira zuva rarainge rabviswapo,

³⁸nokuti vaIsiraeri vose murwendo rwavo irworwo rwose vaiona gore raTenzi rainge riri pamusoro petendhe rinoera masikati, usikuwo painge paine moto.