Read Bhaibhiri Idzva rechiShona Kubuda 6 Bible Online

Kubuda 6 - Bhaibhiri Idzva rechiShona bible

Kubuda 6

¹Asi Tenzi akapindura Mosesi achiti, “Zvino chirega zvako uone zvandichaita kuna Farao iyeyu. Achavaburitsa aona simba roruoko rwangu. Pamusana pesimba rangu iroro achatoita zvokuvadzinga munyika yake.”

²Mwari akazotaurirazve Mosesi achiti, “Ndini Tenzi,

³ndakazviratidza kuna Abhurahamu naIsaki naJakobho ndichizviti Aripagomo, asi handina kunge ndavaudza zita rangu rokuti Yahweh.

⁴Ini ndakaitawo chitenderano changu navo ndichiti, ‘Ndichavapa nyika yeKanani mavaimboita zvokugara vachiti apa garei, tamei apa garei tamei.’

⁵Ndanzwawo kudandaura nenhamo kuri kuita vaIsiraeri vari kuitiswa uranda navaIjipiti ndokubva ndarangarira chitenderano changu.

⁶Naizvozvo udza vaIsiraeri kuti, ‘Ini ndini Tenzi uye ndini ndichakusunungurai pajoko rinorema ramuri kutakudzwa navaIjipiti.’ Ndichakununurai muuranda ihwohwo. Ndichakudzikinurai nesimba rangu guru, ndichiranga vaIjipiti zvinorwadza.

⁷Ndichakuitai vanhu vangu, ini ndichivawo Mwari wenyu. Kana ndakununurai muuranda muIjipiti, ndipo pamuchaziva kuti ndini Tenzi, Mwari wenyu.

⁸Ndichakuunzai kunyika yandakatsidzira Abhurahamu naIsaki naJakobho ndichiti ndichazovapa, naizvozvo ndichakupai nyika iyoyo kuti ive nhaka yenyu. Ndini Tenzi.”

⁹Mosesi akandoudza vaIsiraeri saizvozvo, asi havana kumuteerera nokuti mwoyo yavo yakanga yasviba pamusana penhamo yavaioneswa muuranda.

¹⁰Tenzi akataurira Mosesi kuti,

¹¹“Enda undotaurazve namambo weIjipiti kuti ngaarege vaIsiraeri vabude munyika yake vaende zvavo.”

¹²Asi Mosesi akataura pana Tenzi achiti, “Ko inga vaIsiraeri chaivo havana kunditeerera wani? Zvino iye Farao ndopaangabva anditeererawo iyeniwo zvangu ndisingagoni kutaura!”

¹³Tenzi ndokutaurira Mosesi naAroni achiti, “Udzai vaIsiraeri namambo weIjipiti kuti ndini ndakakutumai kuzoburitsa vaIsiraeri muIjipiti.”

¹⁴Ava ndivo vakuru vakuru vedzimba dzamadzibaba avo, vanakomana vaRubheni dangwe raJakobho ndiHanoki naParu naHezironi naKarimi. Iwaya ndiwo madzitateguru omudzinza rokwaRubheni.

¹⁵Vanakomana vaSimeoni ndiJemueri naJamini naOhadhi naJakini naZohari naShauro mwanakomana womudzimai wake wechiKanani. Ndivo madzitateguru omudzinza rokwaSimeoni.

¹⁶Haanoi mazita avanakomana vaRevhi vakazova madzitateguru omudzinza ravo: Kunoti Gerishoni naKohati naMerari. Revhi akazofa ava namakore zana namakumi matatu ana manomwe.

¹⁷Vanakomana vaGerishoni ndiRibhini naShimei vari mhuri nemhuri.

¹⁸Vanakomana vaKohati ndiAmuramu naIzhari naHebhuroni naUzieri. Kohati akagara zana ramakore rina makore makumi matatu ana matatu.

¹⁹Vanakomana vaMerari ndiMahiri naMushi. Ivava ndivo madzitateguru omudzinza rokwaRevhi.

²⁰Amuramu akaroora Jokebhedhi vatete vake. Ndivo vakamuberekera Aroni naMosesi. Amuramu akagara zana ramakore rina makore matatu ana manomwe.

²¹Vanakomana vaIzhari ndiKora naNefegi naZikiri.

²²Vanakomana vaUzieri ndiMishaeri naErizafani naSitiri.

²³Aroni akaroora Erishebha, hanzvadzi yaNahishoni mwana waAminadhabhu. Ndiye akamuberekera Nadhabhu naAbhihu naEreazari naItamaru.

²⁴Vanakomana vaKora ndiAsiri naErikana naAbhiasafu. Ivava ndivo madzitateguru omumhuri yokwaKora.

²⁵Ereazari mwanakomana waAroni akaroora mwana waPutieri ndokubereka Finehasi. Ivava ndivo madzitateguru omudzinza rokwaRevhi mhuri nemhuri.

²⁶Ivava ndivo vanaAroni naMosesi vacho vakatumwa naTenzi kundoburitsa vaIsiraeri munyika yeIjipiti.

²⁷Ivava, ndivo vanyakutaura naFarao, mambo weIjipiti kuti aregedze vaIsiraeri vaende, Mosesi iyeyu naAroni wakareyu.

²⁸Tenzi paakataura naMosesi munyika yeIjipiti,

²⁹akati, “Ndini Tenzi! Enda undoudza Farao mambo weIjipiti zvinhu zvose zvandinokutaurira.”

³⁰Asi Mosesi akataura ipapo pana Tenzi achiti, “Tarisaika muone kuti ini kutaura handinyatsogona. Zvino munoti Farao anganditeererewo here?”