Read Bhaibhiri Idzva rechiShona Kubuda 7 Bible Online

Kubuda 7 - Bhaibhiri Idzva rechiShona bible

Kubuda 7

¹Tenzi akataurira Mosesi achiti, “Ini ndakuita saMwari kuna Farao. Mukoma wako Aroni achava somuporofita wako.

²Iwe uchange uchitaurira mukoma wako Aroni zvose zvandinokuudza, iye achitaurirawo Farao, kuti arege vaIsiraeri vabude muIjipiti.

³Ini ndichaita kuti Farao aomese mwoyo wake zvokuti kunyange ndikaita zviratidzo nezvishamiso zvakawanda zvikadii zvazvo munyika yeIjipiti,

⁴Farao acharamba kunzwa zvamunoreva. Ndipo pandicharova Ijipiti ndichiiranga neshamhu inorwadza kwazvo ndichizoburitsa muIjipiti hondo dzangu dzavanhu, vanhu vangu vaIsiraeri.

⁵Pandinorova Ijipiti ndichibvisa vaIsiraeri pakati pavo, vaIjipiti ndipo pavachazoziva kuti ndini Tenzi.”

⁶Mosesi naAroni vakaita sokuudzwa kwavakanga vaitwa naTenzi, vakaita naimomo chaimo.

⁷Mosesi akanga ava namakore makumi masere, Aroni aina makumi masere namatatu panguva yavakataura naFarao.

⁸Tenzi akataurirazve Mosesi naAroni achiti,

⁹“Kana Farao akati, ‘Itai chishamiso chinoratidza kuti matumwa naMwari,’ iwe iti Aroni akande tsvimbo yake pasi, isanduke igova nyoka, ipapo pana Farao achizviona.”

¹⁰Naizvozvo Mosesi naAroni vakaenda kuna Farao vakaita zvavakanga varayirwa naTenzi. Aroni akakanda tsvimbo yake pasi, tsvimbo ikasanduka ikava nyoka, Farao namachinda ake vachizviona.

¹¹Farao akadaidzawo magodobori ake, nyanzvi dzamapipi nen'anga. Magodobori omuIjipiti aya akabva aitawo izvozvo zvamapipi.

¹²Mumwe nomumwe akakanda tsvimbo yake pasi, ikasanduka ikava nyoka. Asi tsvimbo yaAroni yakamedza tsvimbo dzavo dzose.

¹³Kunyange zvakadaro, Farao akaomesa mwoyo wake akaramba kuteerera Mosesi naAroni sokutaura kwakanga kwamboita Tenzi.

¹⁴Tenzi akataurira Mosesi achiti, “Farao aomesa mwoyo ari kuramba kuti vaIsiraeri vaende.

¹⁵Iwe enda kuna Farao mangwanani undosangana naye paachaenda kurwizi kuna Nairi. Umumirire pamahombekombe arwo wakabata mumaoko tsvimbo yako iya yakambosanduka ikava nyoka.

¹⁶Undoti kwaari, ‘Tenzi, Mwari wavaHebheru, akandituma kwamuri neshoko rinoti rega vanhu vangu vaende kundondinamata murenje. Asika, kusvikira pari nhasi hauna kunditeerera.’

¹⁷Zvino, zvanzi naTenzi, ‘Muchazoziva kuti ini ndini Tenzi nokuda kwezvandichaita zvino. Ndicharova mvura iri muna Nairi netsvimbo yandakabata, mvura ichasanduka ichiva ropa.

¹⁸Hove dzose dzirimo dzichafa, mvura yacho ichanhuhwa kuti kutu. Saka vaIjipiti vachasema kunwa mvura yomuna Nairi.’ ”

¹⁹Tenzi akatiwo kuna Mosesi, “Iti kuna Aroni, ‘Tora tsvimbo yako uitambanudzire pamusoro pemvura yose yeIjipiti, pamusoro penzizi dzavo nemigero yavo namadhamu avo namadziva avo ose isanduke ive ropa. Richava ropa chete munyika yose yeIjipiti, mumidziyo yakavezwa nomumidziyo yamabwe.’ ”

²⁰Mosesi naAroni vakaita zvakanga zvataurwa naTenzi. Aroni akasimudza tsvimbo iya akarova mvura yomuna Nairi Farao namachinda ake vachiona, mvura yose yomurwizi ikasanduka ikava ropa.

²¹Hove dzaiva muna Nairi dzakafa, Nairi rukava gutukutu kunhuhwa vaIjipiti vakatadza kunwa mvura yacho. Munyika yose yeIjipiti rakanga rangove ropa chete.

²²Asi n'anga dzeIjipiti dzakagonawo kuita izvozvo namashiripiti adzo. Naizvozvo Farao akaramba akaomesa mwoyo, achiramba kuteerera Mosesi naAroni, sokutaura kwakanga kwaita Tenzi.

²³Farao akabva adzokera zvake kumba kwake asina hanya kunyange nezvizvi.

²⁴VaIjipiti vose vakandochera matsime munhivi dzaNairi vachitsvaka mvura yokunwa. Mvura yomurwizi yakanga isisanwiki.

²⁵Kwakapera mazuva manomwe ose Tenzi arova mvura yomuna Nairi.