Read Bhaibhiri Idzva rechiShona Jobhu 10 Bible Online

Jobhu 10 - Bhaibhiri Idzva rechiShona bible

Jobhu 10

¹Zvoupenyu handichazvida ndichataura kunyunyuta kwangu ndakasununguka. Ndichitaura zvinobva mukurwadziwa kwangu mwoyo.

²Ndichataurira Mwari kuti, “Regai kundipa mhosva ndizivisei mhosva yamunayo neni.

³Zvakanaka nhai kwamuri kudzvanyirira nokushora chisikwa chamakaita namaoko enyu muchifarira urongwa hwavakaipa?

⁴Muna maziso avanhu here enyama? Munoona sokuona kunoita vanhu here?

⁵Mazuva enyu akangoita here samazuva avanhu, kana kuti makore enyu akangoita samakore avanhu,

⁶zvamunototsvaka kudai uipi hwangu muchivhima kwazvo chitadzo changu

⁷imi muchiziva zvenyu kuti ini handina mhosva uye kuti wokundinunura mumaoko enyu ipapa hapana?

⁸“Imi namaoko enyu ndimi makandiumba imi, mukandisika asi zvino mavakusandukazve muchindiparadza.

⁹Yeukai kuti imi makandiumba semunyakwe zvino mondidzorera kuhuruva zvakare here?

¹⁰Hamuna here kundidurura somukaka mukandikodzeka somukaka wakakora?

¹¹Inga makandipfekedza wani neganda nenyama mukandibatanidza mapfupa namarunda.

¹²Nomwoyochena wenyu makandipa upenyu, mukunditarira kwenyu makandichengetedza upenyu hwangu.

¹³“Asi zvinhu izvi makazvipfundirira mumwoyo menyu. Ndinozviziva kuti ndochaiva chinangwa chenyu

¹⁴chokuti kana ndapara chitadzo, imi mobva manyatsozviongorora; pachitadzo changu ichocho musingandipembedzi.

¹⁵Dai kuri kuti ndakashata, nhamo ineni kana dai kuri kuti ndakarurama, handipasimudze musoro nokuti ndizere nenyadzi uye ndakati tindindi mukurwadziwa kwangu.

¹⁶Ndikada kuti ndipasimuke munondivhima seshumba, ndipo pamunotoratidza masimba enyu anotyisa.

¹⁷Ndipo pamunotounza zvapupu zvitsva muchipamhidzira kushatirwa kwenyu hondo dzenyu ndipo padzinotovirikana samasaisai kuteverana.

¹⁸“Chamakandiburitsira mudumbu chii chaizvo? Dai ndakafa zvangu pasina ziso rakandiona,

¹⁹ndakaita zvangu somunhu asina kumbovapo ndakatakurwa kubva munhumbu ndichiendwa neni kuguva.

²⁰Iwo mazuva angu haasi mashomanana here? Ko munoregereiko kumbobvisawo ziso renyu pandiri ndimbotiwo faranukei zvangu

²¹ndisati ndaenda kunzvimbo isingadzokwi, kunyika yenhamo nerima guru,

²²nyika yenhamo nenyonganyonga, chiedza choko irima zvaro.”