Read Bhaibhiri Idzva rechiShona Jobhu 11 Bible Online

Jobhu 11 - Bhaibhiri Idzva rechiShona bible

Jobhu 11

¹Zofa muNaamati akazotaurawo achiti,

²“Iwo mashoko akawanda kudai haafaniri kupindurwa here? Iko kutaurisa kunoreva kuti munhu akarurama nhai?

³Iko kubvotomoka kwako uku kunofanira kuita kuti vanhu vanyarare nhai? Kana ukataura marara poshaya wokukutsiura here?

⁴Nokuti iwe unoti chidzidziso chako ndicho chechokwadi; woti saka ndakachena panaMwari.

⁵Dai waro Mwari akambotaura, ambozarura muromo achitaura kwauri.

⁶Ambokunyevera zvakavandika zvoungwaru hwake hunoshaisa vangwaru mazano. Ndopaungaone kuti Mwari arikutokukanganwira zvimwe zvakaipa zvako.

⁷“Ungakwanise here kuera udzamu hwaMwari? Ungakwanise here kusvika kumuganhu waSamasimba?

⁸Ko zvino zvahunopfuura matenga ungazvigone here iwe? Zvahwakadzika kupinda nzvimbo yavafi ungazivei?

⁹Hwakareba kupinda nyika wakapamhama kupfuura gungwa.

¹⁰Kana akakuvinga, akakusunga akakukwidza dare angamudzivise ndiani?

¹¹Vakaipa anovaziva zvakaipa zvavanoita anozviona achitonyatsozvicherechedza.

¹²Benzi romunhu ringatozonzwisisa kana mbizi yabereka munhu.

¹³“Dai kuri kuti unogadziridza hana yako ugosimudzira maoko ako kwaari,

¹⁴dai ukakanda pasi kure uipi hwaunaho uchirega kuita ukama nechakaipa;

¹⁵pakadaro, kana kusimudza musoro ungasimudze pasisina mhosva, wasimba uye usisatyi.

¹⁶Ungatombokanganwa nhamo, uchitodziyeuka semvura yakayerera.

¹⁷Upenyu hwako hunopenya kupinda masikati; rima rahwo, richiita samambakwedza.

¹⁸Uchava nechivimbo nokuti unenge une chitarisiro, unenge wakanyatsodzika midzi wonyatsozorora wakagadzana mwoyo.

¹⁹Kana worara unonorara zvakanaka pasina anokutyisidzira vazhinji vachatsvaka ushamwari newe.

²⁰Maziso avakaipa acharezuka, vasina pokupunyuka napo, chavanenge vongoda kufema femo ravo rokupedzisira.”