Read Bhaibhiri Idzva rechiShona Jobhu 12 Bible Online

Jobhu 12 - Bhaibhiri Idzva rechiShona bible

Jobhu 12

¹Mhinduro yaJobhu kuna Zofa. Jobhu akapindurawo achiti,

²“Ichokwadi kuti imika ndimi vanhu uye kuti pamunongofa, ungwaru ndipowo pahunobva hwatoparara.

³Asi ndine njerewo sezvamakangoitawo imi. Ini handisi pasi kwamuri. Asingazivi zvinhu zvakadai ndiani?

⁴Ndiri chiseko zvacho chenyika kushamwari dzangu ini ndaidanidzira kuna Mwari, iye akatondipindura. Iyeni mururami, munhu ari pachokwadi ndini ndava chiseko zvacho chenyika.

⁵Kuna vagere zvavo zvakanaka, vanotambura vaya, varombo zvawo vanoshoreka. Anodzadzarika vanototi ngaasandidzirwe.

⁶Asi matendhe amakororo akagarika, vanoshatirisa Mwari hapana chinovawana vanotoita Mwari wokusevenzesa[12] zvavo.

⁷“Pamwe ungade zvako kubvunza mhuka dzinotokudzidzisa kana kuti shiri dzedenga dzingatokutaurira,

⁸kana kuti utaure nezvinomera panyika zvichakufundisa, kana kuti hove dzegungwa dzichakutsanangurira.

⁹Chii pakati pazvo chisingazivi kuti ndiye Tenzi akazvisika?

¹⁰Upenyu hwechinhu chose chinofema huri mumaoko ake uye upenyu hwavanhu vose.

¹¹Handiti nzeve inogona kusianisa mazwi here sezvinongoitawo mukanwa munogona kusianisa chokudya nechokudya?

¹²Ungwaru huri muna vakura kunzwisisa kunouya nokuendadzana kwenguva.

¹³“Asi Mwari[13] ndiye ano ungwaru nesimba ana mazano nokunzwisisa.

¹⁴Akapaza, hapana angavake akazaririra munhu, hapana angazarure.

¹⁵Akamisa mvura, kunooma, akaituma inoita murove.

¹⁶Iye ane simba noungwaru, vanonyengedzwa navanyengedzi vacho vose ndevake.

¹⁷Anotorera makurukota ungwaru hwavo, vatongi achivapazanisa musoro.

¹⁸Anosunungura zvakasungwa namadzimambo achivasunga netambo muchiuno.

¹⁹Anotorera vapristi ungwaru, vakuru vakuru achivabvisa pazvigaro.

²⁰Anotorera mazano vanovimbwa navo, vakuru vakuru achivatorera kunyatsoona zvinhu nemazvo.

²¹Anonyadzisa machinda, vana masimba anovatorera ukuru hwavo.

²²Anoburitsa pachena zvakavandika zviri murima achiita kuti rima riti ngwee nechiedza.

²³Anosimudzira marudzi avanhu pamusoro achiaparadzazve, anokudzakudza marudzi oamwararisa.

²⁴Anopazamisa musoro madzimambo avanhu venyika, achivadzungaidza murenje risina nzira.

²⁵Vanoputaira murima vasina mwenje, achivaita kuti vadzadzarike somunhu araradza.”