Read Bhaibhiri Idzva rechiShona Jobhu 13 Bible Online

Jobhu 13 - Bhaibhiri Idzva rechiShona bible

Jobhu 13

¹Mwari neshamwari handivaonerwi pavo. Ndakazviona ini nameso angu, ndakazvinzwa nenzeve dzangu ndikazvinzwisisa.

²Ndinenjerewo sezvamakangoita imi. Ini handisi pasi kwamuri.

³Chandingade ini, kutaura naiye Samasimba, chandinoda ini, kuzvidavirira mhosva yangu pana Mwari.

⁴Asi imi muri vokubata vanhu kumeso nenhema, mose murivarapi vasina maturo.

⁵Dai maitonyarara zvenyu, hwaitova ungwaru chaihwo kwamuri.

⁶Chinzwai zvino zvandinofunga muteerere mumbonzwawo zvandinokutaurirai nomuromo wangu.

⁷Munoda kutaura muchimiririra Mwari nemanyepo nhai, muchimumiririra nounyengedzi?

⁸Mavakutoita zvechizivano naye nhai, ndimi mava kureverera Mwari pamhosva yakeka imi?

⁹Munomira papi, imi, akada zvake kunyatsokuvhurumutsai?

¹⁰Anotokutsiurai kana mukaratidza rusarura rwamunoita muchivande.

¹¹Ukuru hwake haungakutyisei here? Kutyisa kwake hakungakudederesei here?

¹²Zvirevo zvenyu marara zvawo. Mazwi enyu okuzvidzivirira munyakwe zvawo.

¹³Chimbonyararai ndimbotaurawo. Kwandiri, chauya chauya.

¹⁴Ndavakutorovera mwoyo kudombo, ndichitobatira ura hwangu mumaoko.

¹⁵Kufa kufa zvako hapana chokuita. Ndichatongozvimiririra mhosva yangu pamberi pake.

¹⁶Izvozvi ndizvo zvichandinunura nokuti munhu asiri munamati haangaiti chivindi chokuenda pana Mwari.

¹⁷Chinzwai munzwisise mazwi angu muteererese zvandavakukutaurirai;

¹⁸chionai kuti ini ndanyatsogadzirira nyaya yangu ndinozviziva kuti ndichapembedzwa.

¹⁹Ndianiwo zvake angakwikwidzane neni, ini ndingatobva ndanyarara iye zvino ndife zvangu.

²⁰Ingondibvumirai zvinhu zviviri chete handizohwanda-hwanda pamuri.

²¹Chimbobvisai shamhu yenyu pandiri uye kukutyai imi ngakurege kundidederesa.

²²Pakadaro ndidaidzei, ini ndichapindura kana kuti regai nditange kutaura imi mundipindurewo.

²³Zvakaipa zvangu zvingani uye zvitadzo zvangu zvingani? Ndiziviseiwo zvikanganiso zvangu nechitadzo changu.

²⁴Munozvivanzireiko uso. Muchindiona somuvengi wenyu?

²⁵Munoda kutyisidzira shizha riri kupupuruka here? Munoda kudzingirira hundi zvayo yakawoma here?

²⁶Munonyora imi zvinorwadza pamusoro pangu muchiita kuti zvandakatadza ndichiri mudiki zvindipfukire.

²⁷Mukandisunga makumbo nengetani munoongorora kwazvo mafambiro angu muchiti tsikanditsikewo[14] muchiongorora pandatsika.

²⁸Munhu anosakara sechinhu chavakuora semvemve rinodyiwa nezviundudzi.