Read Bhaibhiri Idzva rechiShona Jobhu 14 Bible Online

Jobhu 14 - Bhaibhiri Idzva rechiShona bible

Jobhu 14

¹Munhu akaberekwa nomunhukadzi mazuva ake mashoma, uye azere nenhamo.

²Anoti bhabhanu seruva ozouna anomhanyamhanya somumvuri uye haagari.

³Chinhu chakadai ndicho chamungazarurirewo here maziso enyu kutarisa? Ndiye wamungakwirirana naye dare here?

⁴Ndiani angaburitse chinhu chitsvene mune chan'ora; hapana,

⁵sokuti mazuva ake akatotemwa kuwanda kwawo? Zviri kwamuri kuti mwedzi yake mingani. Imi ndimi makamuisira migano yaasingapfuuri.

⁶Chimbobvisai ziso renyu paari, murege ambopedzawo zuva rake murugare somushandi.

⁷Zvawo muti, une chitarisiro, ukatemwa unotungirazve. Madungirwa awo haashaiki.

⁸Kunyange mudzi wawo ukachembera muvhu dzinde rawo rikafa muvhu,

⁹asi kungonhuwidza mvura chete unotungira uchitoita mapazi somuti mudiki.

¹⁰Asi munhu anofa obva aparara achiva chinhu pasina anofema femo rake rokupedzisa; anozova papiwo pakadaro?

¹¹Sezvinongoita mvura kukwenguka mudhamu rwizi rwunopwa rwooma,

¹²ndozvinoita munhu akaradzikwa haazombomuki kusvikira matenga aparara, haambomuki muhope dzake idzodzo.

¹³Dai mukangondivanza zvenyu munzvimbo yavafi, mundivige zvenyu imomo, kusvikira hasha dzenyu dzapera mugotema zvenyu nguva yokundiyeuka.

¹⁴Kana munhu akafa, angazova mupenyu zvakare here? Saka mazuva angu ose okushanda ndinenge ndomirira kusvikira nguva yangu yokusunungurwa yasvika.

¹⁵Ndipo pamunozondidaidza, ini ndodavirawo munengewo moda kuona chinhu chamakasika.

¹⁶Zvokuverenga nhanho nenhanho yangu mungadai musingaiti, zvokuramba mangoti nangananga nechitadzo changu morega.

¹⁷Maimbosungirira mhosva dzangu mutsapo uye uipi hwangu maimbohukwidibira.

¹⁸Asi sezvinongoita gomo kuti rinokoromoka richizoparara, sokugudumutswa kunoitwa dombo panzvimbo paro,

¹⁹sokudyiwa kunoitwa dombo richisvuurwa nemvura uye sokukukura ivhu kunoita mapopopo, ndiko kuparadza kwamunoita chitarisiro chomunhu.

²⁰Munomukurira zvachose, ndokutoenda ikoko munomusandura uso, mobva mamupfuudza.

²¹Vana vake vakarumbidzwa, iye haambozvizivi, vakaninipiswa haazvioni.

²²Chaanonzwa kurwadza ndochinenge chatomusvika pamuviri pake chake kuzvichema iye pachake.