Read Bhaibhiri Idzva rechiShona Jobhu 15 Bible Online

Jobhu 15 - Bhaibhiri Idzva rechiShona bible

Jobhu 15

¹Erifasi muTemani ndopaakazopindurawo achiti:

²“Iye munhu woungwaru anofanira kuita mwando here pakupindura achitozviti shutu kudaro nemwando wokumabvazuva,

³achizvidzivirira namazwi asina chimuko namashoko asina maturo?

⁴Zvokuremekedza Mwari wavakuti ngazvipere uchitotadzisa anoda zvake kunamata Mwari.

⁵Uipi hwako ndihwo hunokutunza kuva napamuromo, uye unosarudza matauriro ohujarijari.

⁶Muromo wako ndiwo unokubatisa nemhosva kwete ini. Muromo wako ndiwo unopupura kuti une mhosva.

⁷“Ndiwe wokutanga kuberekwa here iwe? Wakatangira makomo kuzvarwa here?

⁸Zvinoreva here kuti wakamboteerera padare raMwari, iwe? Saka unoti ungwaru ndohwako iwe chete nhai?

⁹Chaunoziva iwe chatisingazivi chii? Chaunonzwisisa chatisinganzwisisi isu chii?

¹⁰Vachena musoro navakwegura varimo mukati medu, vakuru kuna baba vako.

¹¹Iwo mazwi aMwari okunyaradza aita madiki kwauri nhai, kanawo mazwi akapfava ari kutaurwa kwauri?

¹²“Unoitirei manyawi kudai uchitoringaringa maziso kudaro,

¹³zvaunotovirukira Mwari nehasha kudaro uchingobvotomoka zvako kutaura?

¹⁴Munhu angave mutsvene sei chaizvo? Munhuwo zvake akaberekwa nomunhukadzi angave pachokwadi sei?

¹⁵Inga Mwari haavimbi navatsvene vake wani, Kunyange matenga chaiwo haana kuchena kwaari.

¹⁶Ko kutozotiwo zvake munhu akanyangara ane tsika dzakaora anonwa uipi semvura.

¹⁷Chiteerera unzwe ndikudziidzise ndichakutaurira zvandakaona,

¹⁸zvakataurwa navangwaru, zvisina kuvanzwa namadzibaba vavo,

¹⁹ivo voga vakapiwa nyika vakanga vasina mutorwa pakati pavo.

²⁰Upenyu hwavakaipa inhamo yoga isingaperi, munhu anobata vamwe noutsinye makore aakapiwa ndookutoverenga.

²¹Inogara iri mhere chete munzeve dzake, akati agarike, yauya mharadzi.

²²Haangambofunga kuti murima achamubuda. Asi chaanoziva ndechokuti chake chaatemerwa kuuraiwa nebakatwa

²³ichiva nyama yamagora.[15] Anoziva kuti zuva rokuparadzwa kwake rosvika.

²⁴Kuzvidya mwoyo nokushungurudzika kunomurwisa, samambo aronganisa hondo kuti achirwa.

²⁵Nokuti akasimudza ruoko rwake kurwisa Mwari akaita chivindi chokusaremekedza Samasimba.

²⁶Anomhanya kwazvo akateya musoro nenhoo inorema,

²⁷nokuti akafuta kumeso aine hutsakutsa dzezvidya.

²⁸Nokuti agere mumaguta ava matongo, mudzimba dzisingafaniri kugarwa nomunhu mudzimba dzavakuda kuva matongo.

²⁹Haambopfuma, uye upfumi hwake haugari kunyange mumvuri[16] wake chaiwo hauzova panyika.

³⁰Haazokwanisa kupunyuka rima, marimi omoto achaomesa mabukira ake maruva ake achapupurutswa nemhepo.

³¹Ngaarege kuvimba nezvisina maturo achizvinyengedza. Nokuti zvisina maturo ndizvo zvichava mubayiro wake.

³²Achauna nguva yake isati yasvika, mapazi ake asati ambopfumvudza.

³³Achazunzika magirepisi ake asina kuibva somugirepisi, achidonhedza maruva ake somuorivhi.

³⁴“Gungano ravakan'ora harina michero yarinobereka. Misha yevepfumbamuromo ichaparadzwa nomoto.

³⁵Mhodzi yavanodyara mumwoyo yavo unhunzvatunzva, vanotakura uipi, unyengedzi ndiye mwana wacho wavanobereka.”