Read Bhaibhiri Idzva rechiShona Jobhu 17 Bible Online

Jobhu 17 - Bhaibhiri Idzva rechiShona bible

Jobhu 17

¹“Mweya wangu uri kudzungaira mazuva angu avakutopera. Guva ratondimirira

²Vanhu vanongoramba vaneni kwazvo, ini ndinoramba ndakatarisa zvangu kubaya mwoyo kwavo.

³Imi Mwari chivai ndimi rubatso rwangu, nokuti ndianiwo zvake angasimudze ruoko rwake kundiitira rubatso?

⁴Nokuti makavaputira pfungwa dzokunzwisisa, saka musavarege vachikunda.

⁵Mungaite somunhu anotaurira shamwari zvomugove wake, asi vana vake vachizvitsvokorera[18] meso.

⁶Ndatove tsumo zvayo yenyika uye ndave munhu wokusvipirwa mate kumeso.

⁷Maziso angu aita rima pamusana pokurwadziwa kwangu mwoyo, uye nhengo dzangu dzangova mumvuri zvawo.

⁸Munhu ari pachokwadi zvinomukatyamadza vakanaka vanobva vashatirwa navakan'ora.

⁹Asi mururami anoramba akangoti kwati kwati namaitiro ake ana maoko akachena anoramba achingosimbarara chete.

¹⁰Zvino chidzokai zvakare mundivinge, mose zvenyu asi pakati penyu, munhu anoungwaru handimbomuwana.

¹¹“Mazuva angu apfuura, zvandaifunga kuita zvakapera, zvandaida kuita zvacho zvaparara.

¹²Usiku vanohuti masikati, chiedza vachichiti chakaita serima.

¹³Kana chido changu kuri kuita nzvimbo yavafi musha wangu, kana rima riri iro randinoita uriri hwandinorara,

¹⁴ndava kutoti kuguva ndivo baba vangu, kuhonye ndichiti ndimi amai vangu nehanzvadzi yangu,

¹⁵Chitarisiro, changu chiripi ipapa? Ndianiwo zvake achaona chitarisiro changu?

¹⁶Kusatoti taenda tose kunzvimbo yavafi tanyura muvhu tose pamwechete?”