Read Bhaibhiri Idzva rechiShona Jobhu 18 Bible Online

Jobhu 18 - Bhaibhiri Idzva rechiShona bible

Jobhu 18

¹Hurukuro yechipiri yaBhiridhadhi. Bhiridhadhi Mushuhi akazopindurazve achiti,

²“Kusvikira riniko? Chimbonyararawo ufunge, isu timbotaurawo.

³Sei uchitiona semhuka uchititora sezvituta?

⁴Zvibvarure zvako kana uchida kunyange ukashatirwa zvako ukadii, nyika haisanduki ikava gwenga, mabwe haambobva panzvimbo pawo.

⁵“Mwenjewo wavaipi unodzimwa, murazvu womoto wake hauvheneke.

⁶Mwenje wemutendhe rake uchasviba nemwenje uri pamusoro pake uchadzimwa.

⁷Simba rokuita nhanho richaderera zvirongwa zvake zvichamuputsira pasi.

⁸“Nokuti tsoka dzake dzichamuti tindindi mumumbure achifamba pamusoro pehunza.

⁹Anobatwa chitsitsinho nechikachikiro, dhibhu rinomurapura.

¹⁰Musungo wakamuvanzirwa muvhu, hunza inenge yakavigwa panzira yake.

¹¹Zvinotyisa zvichamukomba kumativi ose zvichingodzingirirana naye.

¹²“Nzara ndiyo ichamupedza simba nyatwa ichava parutivi pake.

¹³Chirwere chichamudya ganda honzeri chaiyo yorufu ichamudya makumbo.

¹⁴Achamwaurwa kubva mutendhe yaanovimba nayo agozvuzvurudzirwa kuna mambo wokutyisa.

¹⁵Mumwe angangogara zvake mutendhe yake asi musha wake watanga wasaswa nesarufa.[19]

¹⁶Pasi midzi yake iri kuoma kumusoro mapazi ake achioma.

¹⁷Panyika zvokumuyeuka zvakapera. Hapana mugwagwa unodaidzwa nezita rake.

¹⁸Achadzingwa muchiedza achiendeswa murima achitandaniswa panyika.

¹⁹Haachazovi nomwana kana muzukuru zvake pakati pavanhu vokwake, kana mumwe anoraramawo paaigara.

²⁰Vokumadokero vachadumbirwa nazvo vokumavirira zvichavazadza nokutya.

²¹Ndizvoka izvi, zvomusha unogara vanhu vakaipa, ndizvo zvenzvimbo yomunhu asingazivi.”