Read Bhaibhiri Idzva rechiShona Jobhu 19 Bible Online

Jobhu 19 - Bhaibhiri Idzva rechiShona bible

Jobhu 19

¹Mhinduro yaJobhu kuna Bhiridhadhi. Jobhu akapindura achiti,

²“Kusvikira riniko chokwadi muchindirwadzisa kudai nokundisakadza namazwi kudai?

³Rwatosvika rugumi rwose muchindinyomba. Hamunyari here imi kundiitira zvakaipa?

⁴Dai kuri kuti ndakakanganisa zvechokwadi mhosva yacho ndeyanguka ini.

⁵Kana imi mavakutoita zvokuzvionesa kwandiri muchitosevenzesa kuninipiswa kwangu sechinhu chokuratidza nacho kuti ndine mhosva,

⁶mochizviziva kuti Mwari ndiye akandipiya akandimbundira namambure ake.

⁷Ini ndikapopota nezveutsinye hwakadai hapana anondinzwa. Ndinodanidzira asi ruenzaniso hapana.

⁸Akavaka panzira pangu rusvingo zvokuti handikwanisi kupfuura, akakwidibira nzira yangu nerima.

⁹Akandikurumura mbiri yangu akandikutunura mumusoro ngundu yangu.

¹⁰Anondityoranisa kumativi ose zvokuti ndaenda ini, chitarisiro changu akachitipura somuti.

¹¹Anondivirukira nehasha achinditora semuvengi wake.

¹²Hondo dzake dziri kukokana dzinouya dzakanangana neni dzichikomba tendhe rangu.

¹³“Akanditsauranisa navakomanavanun'una vangu. Hama dzangu dzakapesaniswa neni.

¹⁴Hama neshamwari dzangu dzapamwoyo dzakandinyengedza vanhu vokuziva chaivo vakatondikanganwa.

¹⁵Vari kuroja mumba mangu vakandikanganwa vasikana vebasa wava kutondiona somusevenzi. Mupfungwa dzavo ndatova mutorwa zvangu.

¹⁶Ndinodaidza musevenzi wangu asi haadaviri, ini ndini ndavakutoita zvokumuteterera.

¹⁷Kamweya kandava nako kava kunhuwa kumudzimai wangu, ndava kusemesa kuvana vamai vangu chaivo.

¹⁸Kunyange vana vaduku vavakundishora, ndikati ndisimukewo vanondisveeredza.

¹⁹Shamwari dzangu dzose chaidzo dzavakundisema chaivo vangu vapamwoyo vavakundipandukira.

²⁰“Mapfupa angu aomererana neganda; aomererana nenyama yangu. Ndichatopona napaburi retsono[20] chaipo.

²¹Ndinzwireiwo tsitsi, ndinzwireiwo tsitsi imi shamwari dzangu. Ruoko rwaMwari rwandirova.

²²Ko munodireiko kundironda sezviri kuita Mwari? Hamugutsikani here nokundishora zita kwamunoita?

²³“Dai mazwi angu angonyorwawo, adhindwa zvawo mubhuku.

²⁴Zvinyorwe nepenzura yesimbi nomutobvu zvitemerwe pabwe nokusingaperi.

²⁵“Ndinoziva kuti mununuri wangu mupenyu pakuguma achamira pamusoro payo nyika.

²⁶Mushure mokunge ganda rangu raora saizvozvi ndisisiri mumuviri[21] wangu ndichaona Mwari.

²⁷Wandinozvionera iyeni, ndichamuona pachangu namaziso angu kwete mumwe. Mukati mangu umu ndapera nokuzvisuwira.

²⁸Nokuti imi munoti tingamutambudze sei mhosva tingaiwane sei maari.

²⁹Munofanira kutya bakatwa rakakutarisai nokuti hasha dzinounza kuranga kwebakatwa kuti muzive kuti kutongwa kuripo.”