Read Bhaibhiri Idzva rechiShona Jobhu 20 Bible Online

Jobhu 20 - Bhaibhiri Idzva rechiShona bible

Jobhu 20

¹Zofa muNaamati akapindura achiti,

²“Pfungwa dzangu dzinondipa kuti ndipindure pamusana peshungu dzandibata.

³Pfungwa dzandanzwa dzinondishatirisa, mweya unopfuura kunzwisisa kwangu ndiwo unondipa minduro.

⁴“Unoziva wani kuti kubvira pasi chigare, kubvira pakaiswa munhu panyika,

⁵rufaro rwavakaipa rupfupi. Kupembera kwavakang'ora ndekwechinguvana chete.

⁶Kunyange akati dzuu kumira kusvika kumatenga, musoro wake uchisvika kumakore,

⁷anoparara sendove yake. Vakambomuona vanenge vavakutoti, ‘Aripi?’

⁸Anobhururuka sechiroto asingazowanika, anonyangarika sechioniso chousiku.

⁹Ziso raimbomuona harizomuonazve. Haazomboonekwazve panzvimbo pake.

¹⁰Vana vake ndivo vanotozoripa varombo, ivo namaoko avo vachadzorera upfumi hwake.

¹¹Mapfupa ake azere simba rouduku, asi richazoti rakata kurara pamwechete naye.

¹²Kunyange uipi huchimbonaka mukanwa make, achihuviga pasi porurimi rwake,

¹³achinyatsohuchengetedza asingahurasi, achihuchengetedza mukanwa make.

¹⁴Asi chokudya chake chinosanduka mudumbu make chichiita sechepfu yemvumbi.

¹⁵Anomedza upfumi asi anozohurutsa. Mwari anomurutsisa upfumi ihwohwo.

¹⁶Aiyamwa chepfu yemvumbi rurimi rwechiva runomuuraya.

¹⁷Haachazoonazve hova dzamafuta kana tukova twouchi neruomba.

¹⁸Achadzorera muchero webasa rake asina kumboudya. Zvaanowana pashawo dzake hazvimbomupa mufaro.

¹⁹Akabata varombo zvisina kunaka akavasiya vasisina chavanacho, akapamba imba yaasina kuvaka.

²⁰Kudokwairira zvinhu kwaimushaisa zororo, chaainge atorwa mwoyo nacho haaichirega chichimupunyuka.

²¹Haaisiya chinhu mundiro saka zvokubudirira kunoenda mberi hapana.

²²Paanenge ane zvose zvaanoda kuzvidya mwoyo kunobva kwamupinda ndopaanowirwa chaizvo nenhamo.

²³Angazadze zvake dumbu asi Mwari anomuvirukira nehasha shamhu dzigonaya paari sechokudya chake.

²⁴Achatiza zvako chombo chokurwa chesimbi achibva anzi mbetete nomuseve wendarira.

²⁵Unonoburitsa muromo wawo neseri uchinyiminya muromo wabva nomunduru agongweda nokutya.

²⁶Rima rakati kwirindindi rakamumirira, moto usingafutidzwi uchamuroromesa zvinenge zvasara mutendhe zvichaparadzwa.

²⁷Denga richaratidza pachena uipi hwake, nyika ichamupandukira.

²⁸Upfumi hwemba yake huchayeredzwa hugokukurwa pazuva rehasha dzaMwari.

²⁹Uyu ndiwo mugove waMwari kumunhu akaipa ndiwo mubayiro waanotemerwa naMwari.”