Read Bhaibhiri Idzva rechiShona Jobhu 21 Bible Online

Jobhu 21 - Bhaibhiri Idzva rechiShona bible

Jobhu 21

¹Mhinduro yechipiri yaJobhu kuna Zofa. Jobhu akapindurawo achiti,

²“Nyatsoteererai zvandichataura zvive ndizvo zvinokunyaradzai

³mombondiitirawo mwoyo murefu nditaure. Kana ndichinge ndataura mozoseka zvenyu.

⁴Munhu ndiye wandinonyunyutira here ini, ndingarege nei kuzvidya mwoyo?

⁵Nditarirei mudumbirwe nazvo mubate muromo nazvo.

⁶Ndikazvirangarira zvinondidzongodza mwoyo muviri wangu wose unobva wadedera.

⁷“Vaipi vanoraramireiko vachitosvika pakukwegura, vachiva noukuru nesimba?

⁸Vanotoona vana vavo vachinyatsodzika midzi zvizvarwa zvazvo zvichinyatsopasa.

⁹Dzimba dzavo hapana chadzinotya, hapana shamhu yaMwari pavari.

¹⁰Handira dzavo hadzikoni kuberekesa, Mhou dzavo dzinobereka hadzisvodze.

¹¹Vanoburitsa vana vavo sedanga rehwai vana vacho vanochirika-chirika.

¹²Vanoimba nengoma nechipendani vachifara nokurira kwenyere.

¹³Vanopedza mazuva avo vari vakabudirira vachizoenda zvavo kuvachakabvu murugare.

¹⁴“Vanoti kuna Mwari tibvireipo, hatidi kuziva nzira dzenyu.

¹⁵Iye Samasimba ndianiwo zvake, watinonzi tishandire isu? Chatinowana chii kana tikanamata kwaari?

¹⁶Handiti kubudirira kwavo kuri mumaoko avo here? Ini mazano avaipi anondipesa.

¹⁷Zvinombooneka here kazhinji kuti mwenje wavaipi unodzimwa, uye kuti njodzi yavo inombovawirawo here? Kangani Mwari kaakavagovera zvinorwadza akashatirwa?

¹⁸Kangani kavakapeperetswa samashanga kana sehundi inotututswa nedutu,

¹⁹zvichinzi Mwari akachengetera vana vavo mhosva idzodzo?

²⁰Vazvionere nameso kuparadzwa kwavo, vambonwawo mukombe wehasha dzaSamasimba.

²¹Vangazoita hanya dzei nemhuri dzavo kana mwedzi yavo yadimurwa?

²²Ndiani angadziidzise Mwari ungwaru ari iye anotonga vari pazvigaro zvapamusoro?

²³Mumwe anogona kufa achiri kuzvinzwa akagarika zvake ari pamutambaratede,

²⁴akakora, mwongo wamapfupa ake wakanaka, wakanyorevera.

²⁵Mumwe anofa achingorwadziwa mwoyo asina kana kumboravirawo chinhu chakanaka.

²⁶Vanorara zvimwechetezvo muvhu vose havambotani kunzi momote nehonye.

²⁷Zvamunoona, ndinoziva pfungwa dzenyu nekafungiro kenyu kokurwisana neni.

²⁸“Imi munototi mhuri dzavakuruvakuru dziripi, tendhe raigara vaipi riri kupi?

²⁹Hamumbobvunzawosu vanofamba nzendo, hamungarambi zvavanopupura zvokuti pazuva renhamo yomuipi

³⁰anonzi wakaipa anopunyuka pazuva repfumvu, uye kuti zuva rehasha ndiro rinotomununura?

³¹Ndiani anomutsiura zviito zvake akatarisana naye, kana anomuripisa zvaakaita?

³²Kana atakurwa kuendeswa kumakuva vanoisa vanhu vokugaririra paguva.

³³Ivhu romubani rinobva ramunakira vanhu vachiita dungwerungwe kumutevera vari mberi kwake varizararira.

³⁴Sei muchida kundinyararidza nezvinhu pasina, mhinduro dzenyu hadzichina chirimo kusiya nhema dzoga-dzoga.”