Read Bhaibhiri Idzva rechiShona Jobhu 22 Bible Online

Jobhu 22 - Bhaibhiri Idzva rechiShona bible

Jobhu 22

¹Erifasi muTemani akapindura achiti,

²“Pane munhu angave chipundutso kuna Mwari here? Kunyange mungwaru chaiye anomuwanisa chimuko here?

³Iye Samasimba anowana chimuko here paururami hwenyu, kana kuwana chaanowana paupenyu hwako kana husina chinoshoreka?

⁴Ari kurangira kumutya kwako here kana kukwirirana dare newe izvozvo here?

⁵Handiti huipi hwako here hwakaipisisa uhu naizvo zvitadzo zvako zvisingaperi izvi.

⁶“Pasina chikonzero wakaita kuti hama dzako dziripe chitsidzo chadzo. Uchivasiya vava musvo, vasina kupfeka.

⁷Wainyima iwe vane nyota mvura yokunwa uchinyima vane nzara chokudya.

⁸Waipa vane simba roukuru nyika ichiva misha yechizivano newe.

⁹Waiendesa chirikadzi dzisina chinhu usingatsigire nherera.

¹⁰Ndokusaka wakombwa nemisungo uchibva wati mwoyo papata nezvinokuvhundutsa.

¹¹Uye kuti chiedza chako chapinduka kuita rima zvokuti haukwanisi kuona, wachinzi ndondo nemafashamo emvura.

¹²Handiti Mwari ari kumusoro kudenga here? Chimbotarira uone nyenyedzi dziri mudenga-denga, kukwirira kwadzakaita mudenga.

¹³Asi imi ndopaunoti Mwari anozivei, uchiti angagone here kuona murima rakati ndoo kuti akwanise kutonga?”

¹⁴Unoti akaputirwa namakore zvokuti haangakwanisi kuona paanofamba muzienda nakuenda redenga

¹⁵uchiri kungotevedza here maitiro evechinyakare akafambwa navaipi,

¹⁶vakabvutwa nguva yavo isati yasvika? Ugaro hwavo hwakukurwa nemvura.

¹⁷Vanoti kuna Mwari “Tibvirepo, iye Samasimba angatiitei?”

¹⁸Asi ari iye akazadza dzimba dzavo nezvinhu zvakanaka ini mazano avaipi anondipesa.

¹⁹Varurami vanozviona vagofara vakanaka vanopfida kuvaseka,

²⁰vachitoti mhandu dzedu dzakaparadzwa zvakasara zvaroromeswa nomoto.

²¹Naizvozvo wadzana naMwari uve norugare zvikunakire.

²²Gamuchira chidzidziso chinobva mumuromo make uchengetedze mashoko ake mumwoyo wako.

²³Ukadzokera kuna Samasimba wakazvidukupisa, uye ukabvisa uipi kure namatendhe enyu,

²⁴kana ukarasa ndarama pavhu, ukarasira ndarama yokuOfiri mukati mehurungudo dzomurwizi,

²⁵Samasimba achiva iye ndiye ndarama yako nesirivha yako inokosha;

²⁶ipapo uchazofara una Samasimba uchizosimudza musoro wako kuna Mwari.

²⁷Uchanamata kwaari, iye achakunzwa unozokwanisa kuzadzikisa mhiko dzako.

²⁸Ucharonga kuita chinhu chichiitika. Nzira ichavhenekerwa nechiedza,

²⁹Nokuti Mwari anodukupisa vanozvikudza achinunura vapasipasi.

³⁰Anonunura vakarurama iwewo uchanunurwa kana maoko ako achena.