Read Bhaibhiri Idzva rechiShona Jobhu 23 Bible Online

Jobhu 23 - Bhaibhiri Idzva rechiShona bible

Jobhu 23

¹Mhinduro yechitatu yaJobhu kuna Erifasi. Jobhu akapindura achiti,

²“Nanhasi uno kunyunyuta kwangu ndekwekupanduka, ruoko rwake ruri kungondiremera kunyange ndichiwuwura kudai.

³Dai ndaiziva kwokumuwana ndaisvika kunyange pachigaro chake.

⁴Ndaisvitsa kwaari nyaya yangu ndigozadza muromo wangu nezvokutaura.

⁵Ndipo pandichaziva zvaanondipindura ndigonzwisisa zvaanotaura kwandiri.

⁶Angaite mapitse neni here? Noukuru hwesimba rake kudaro? Kwete, anotondinzwa chete.

⁷Ipapo munhu akarurama anogona kutaura naye, mutongi wangu achitosvika pakutonditi handina mhosva zvachose.

⁸“Tarirai muone kuti ndinoenda kumabvazuva asi haako kumadokero asi handimuwane.

⁹Ndinomutsvaka kuchamhembe, asi handimuone kudoti kumaodzanyemba asi haaoneke.

¹⁰Anoziva wani mufambiro wangu kana akandiedza ndichabuda sendarama.

¹¹Tsoka yangu yakaramba iri mugwara rake ndakaramba ndiri munzira yake ndisingatsauki.

¹²Handina kusiyana nemitemo inobva mumuromo make mazwi omumuromo make ndakaaisa mudura romumwoyo mangu.

¹³Chaanenge afunga ndichocho ndiani angamusandure? Chaanenge oda kuita anoita.

¹⁴Zvaakanditemera achatozviita. Hazvisi zvoga izvozvo ane zvimwe zvakawanda mupfungwa dzake zvakadaro.

¹⁵Ndokusaka ndichidedera nokutya pamberi pake ndikangozvifunga chete, ndinobva ndatonyanya kumutya.

¹⁶Mwari akaita kuti ndive mbwende, Samasimba akandityisidzira.

¹⁷Zvakadaro zvazvo rima harina kundipfumbira muromo akandinzvengesa kuzarima guru.”