Read Bhaibhiri Idzva rechiShona Jobhu 24 Bible Online

Jobhu 24 - Bhaibhiri Idzva rechiShona bible

Jobhu 24

¹Zuva rokutonga zvarisina kuvandika kuna Samasimba sei vanomuziva vasingamboriona?

²Vanhu vanobvisa zvitata zvomuganhu vanobvuta matanga ezvipfuwo vachindozvifudza.

³Vanoteteretsa dhongi renherera vanotora dhonza rechirikadzi kuripa rubatso rwechakavimbiswa.

⁴Vanodzinga varombo munzira, varombo venyika vose vanotovanda.

⁵Varombo vanototsvaka chokudya mugwenga samadhongi omusango. Renje ndiro rinotovapa kudya kwavana vavo.

⁶Uswa hwemombe dzavo vanotonocheka musango vachitoita zvokufuhwa mumunda wavaipi

⁷vanorara usiku hwose vari musvo, vasina chavakapfeka, vasina chokufuka muchando.

⁸Vanonyorova nemvura inonaya mumakomo vachitonamatirana nedombo vachishaya pokuvanda.

⁹Vanobvuta nherera pazamu, mucheche wavarombo anobvutwa kuripa chikwereti.

¹⁰Vanofamba vari bunumunhu vasina chavakapfeka. Ndivo vokutakura zvisote asi nzara vainayo.

¹¹Pakati pemitsara yemiorivhi yavakaipa vanoita mafuta vanosvina muguvi rewaini asi vaine nyota.

¹²Vari kufa vari kuwuwura kunze kweguta, kunonzwika kugurukuta kwavakakuvara vachitsvaka rubatsiro asi Mwari haamboteerera zvake munamato yavo.

¹³Asi kune vamwe vanopandukira chiedza vasina kujairira gwara racho vasingagari munzira dzacho.

¹⁴Mhondi inomuka nousiku kuti indouraya varombo navasina chavanacho, kana hwava usiku anoita sembavha.

¹⁵Ziso remhombwewo rinomirira ruvhunzavayeni ichiti hapana ziso rinondiona, inosandura uso.

¹⁶Murima vanobhovhora dzimba dzavamwe, masikati, vanozvipfigira, chiedza havachizivi

¹⁷nokuti zarima hapana zvariri kwavari vose, pamusana pokuti vanoushamwari nezvinotyisa zverima.

¹⁸Munoti vanotakurwa nechimbichimbi pamusoro pemvura, mugove wavo wakashurikidzirwa rushambwa munyika. Hakuna mushambadzi anotsaukira kuminda yavo yemigirepisi.

¹⁹Kushaikwa kwemvura uye kupisa kunoomesa mvura yamazaya echando ndozvinoita nzvimbo yavachakabvu kuvanhu vanenge vatadzira Mwari.

²⁰Mimba inovakanganwa, honye dzinozipirwa kuvadya, vanhu vakaipa havayeukwi asi vanotyoka somuti.

²¹Vanoita hwenda nomukadzi asina mbereko pasina mwana anoberekwapo chavanobatsira chirikadzi hapana.

²²Asi Mwari nesimba rake anokwekweretsa vana masimba, vanogona zvavo kusimukira asi havana chivimbo chaicho choupenyu.

²³Anovanetsa nokufunga kuti vagare zvisina njodzi asi ziso rake rinenge riri panzira dzavo.

²⁴Pakanguva kadukuduku vanombosimudzirwa pamusoro vobva vaenda voti pasi mokoto vachindorongedzwa zvinongoitwa vamwe vose, vanochekwa sezvinongoitwa hura dzembeswa.

²⁵Kana zvisizvo ndiani angati ndinoreva nhema aburitse pachena kuti ndinotaura nhando.