Read Bhaibhiri Idzva rechiShona Jobhu 26 Bible Online

Jobhu 26 - Bhaibhiri Idzva rechiShona bible

Jobhu 26

¹Jobhu akapindurawo achitizve,

²“Ndokubatsira munhu asina simba ikoku, ndokununura here ikoku munhu anenge arukutika?

³Ndokurairawo here munhu asina mazano ikoku uchimuzivisa mano ohungwaru akawanda?

⁴Ndianiko akakupa kuti utaure mashoko iwaya? Uri kuzvitauriswa nemweya wani? Bhiridhadhi akapamha kutaura achiti

⁵Vari pasi, vakafa vanodedera nokutya mvura nezvinogara mumvura zvinodedera.

⁶Nzvimbo yavafi mutwi zvayo kuna Mwari, kwaari nzvimbo yavachakabvu yakashama.

⁷Mwari ndiye akatambanudza zidandanakutanda mumhene. Akapaikira nyika pasina pokupaikira.

⁸Anosungirira mvura mumakore ake makobvu asi gore haribvaruki nokurema kwayo.

⁹Anofukidza mwedzi[22] wejenaguru achiwarira pauri gore rake.

¹⁰Akatara denderedzwa pamusoro pemvura pamuganhu wechiedza nerima.

¹¹Mbiru dzedenga dzinodedera dzinokangaidzwa nezwi rake rokuyambira.

¹²Akanyaradza gungwa nesimba rake nohungwaru hwake akaparadza zigaranyanya Rahabhu.

¹³Nezwi rake akaita kuti denga riti ngwee, noruoko rwake akauraya zigaranyanya parainge rotiza.

¹⁴Izvi zvinongova kadimbu kadiki kezvaanoita, zvatinonzwa rinongova zevezeve razvo. Ndiani anganzwisise kutinhira kwesimba rake?”