Read Bhaibhiri Idzva rechiShona Jobhu 27 Bible Online

Jobhu 27 - Bhaibhiri Idzva rechiShona bible

Jobhu 27

¹Jobhu akaenderera mberi nenyaya yake achiti,

²“Ndinopika naMwari mupenyu nokundinyima ruenzaniso rwangu iye Samasimbaose akandishungurudza mwoyo.

³Kana ndichiri kufema mweya kudai, mweya waMwari uchiri mumhuno dzangu,

⁴muromo wangu haumbotaura nhema, rurimi rwangu harumbotaura zvounyengedzi.

⁵Hazvimbofa zvakaitika kuti nditi imi muri pachokwadi. Kusvikira ndife zvangu, handisi kuzokanda pasi kuva pachokwadi kwangu, ururami hwangu handimbohukanda pasi.

⁶Hana yangu haindipire mhosva zvandakaita mazuva angu ose.

⁷Dai muvengi wangu akawana chinowana munhu akaipa. Iye anondipandukira awane chinowana asina kururama,

⁸nokuti chitarisiro chomunhu asiri munamati chii kana Mwari amuparadza, kana Mwari amutorera upenyu hwake?

⁹Mwari achanzwa kuchema kwake here kana nhamo yamuwira,

¹⁰anofadzwa here naSamasimba achadaidza kuna Mwari nguva dzose here?

¹¹Ndichakudzidzisai zvesimba raMwari handidi kukuvanzirai zvinofungwa naSamasimba.

¹²Ko inga mose makazviona wani, ko kutaura zvisina maturo kwabvepi?

¹³“Uyu ndiwo mubayiro waMwari kumunhu akaipa nenhaka inowaniswa naSamasimba kune vano utsinye.

¹⁴Vana vavo vanogona kuwanda zvavo asi vanowandira kuuraiwa nebakatwa rehondo uye vana vavo vanenge vasina kudya kwakawanda.

¹⁵Vanorarama vake, denda richavaendesa kumakuva chirikadzi dzavo hadzivachemi.

¹⁶Kunyange zvake akaunganidza mari sevhu uye kunyange akaunganidza mbatya semunyakwe,

¹⁷anogona kuisona asi mururami ndiye anoipfeka, mari yake ichagovanwa navarurami.

¹⁸Imba yaanovaka yakaita sedandemutande sedumba rinovakwa nomutariri wenzvimbo.

¹⁹Anogona kundorara ari mupfumi asi hazviitiki zvakare paanoti pepu upfumi hwake panenge pasisina.

²⁰Anowirwa nokutya samapopopo emvura usiku anotututswa nechamupupuri.

²¹Mhepo yokumabvazuva inomutututsa yoenda naye ichimubvisa panzvimbo yake.

²²Inobonderera paari zvisina tsitsi iye achiita bara chairo kutiza.

²³Inomuitira ruzha ichimufuridza panzvimbo pake.”