Read Bhaibhiri Idzva rechiShona Jobhu 28 Bible Online

Jobhu 28 - Bhaibhiri Idzva rechiShona bible

Jobhu 28

¹“Inga ungwaru hunopfuura njere dzomunhu sirivha ine migodhi yayo kune nzvimbowo yokunatsa ndarama.

²Simbi inocherwa muvhu mhangurawo inonyungurutswa ichibva mumatombo.

³Munhu ndiye anotoisira rima miganhu, achichera kusvika kwakadzama chaiko, kumatombo ari kuhwenje hwerima.

⁴Munhu anogona kuchera migodhi kure nokunogara vanhu, munzvimbo dzakakanganika norutsoka rwomunhu vachiita muzeerere netambo kure navanhu

⁵muvhu munobva chokudya asi zviri pasi apa zvinopinduka kunge moto.

⁶Mumatombo munogara matombo esafaya uye mune huruva yendarama.

⁷Nzira yacho iyoyo haisati yabhururuka neshiri kunyange ziso rorukodzi harisati ramboiona.

⁸Zvikara zvinoti ndisu pano, hazvisati zvambokutsika. Shumba haisati yambokufamba.

⁹Munhu anochera dombo romusarasara achipidigura makomo kusara aisa midzi yawo pachena.

¹⁰Anoita mwena mumatombo ziso rake richiona chose chakakosha.

¹¹Anoita madhamu kunotangira tukova kuitira kuti zvakavandika zvibude pachena.

¹²“Asi ungwaru hunowanika kupi? Kunzwisisa kunogarepi?

¹³Munhu haazivi nzira yoko uye hauwanikwi munyika yavapenyu.

¹⁴Hwenje hunoti hausi mandiri, gungwawo rinoti hausi neni.

¹⁵Haugoni kutsinhaniswa nendarama haugone kuyerwa nomutengo wesirivha.

¹⁶Haugoni kuenzaniswa kukosha kwahwo nendarama yeOfiri kana nokukosha neOnikisi kana neSafaya.

¹⁷Ndarama kana girazi hazvingaenzaniswi naho, kana kutsinhaniswa nezvishongo zvendarama yakanakisisa,

¹⁸tisingamboswerozvienzanisa zvedu nekarari kana nekiristari mutengo woungwaru uri pamusoro pewemapera.

¹⁹Matombo eTopasi ekuEtiopia haangamboenzaniswa nahwo kana kuera kukosha kwahwo nendarama yakanakisisa.

²⁰“Ko zvino hungwaru hunobva kupi? Kunzwisisa, nzvimbo yako iri kupi?

²¹Yakavandika kuvapenyu vose yakahwanda kushiri dzedenga.

²²Nzvimbo yavachakabvu norufu zvinoti takangonzwa chete runyerekupe rwahwo nenzeve.

²³“Mwari ndiye anonzwisisa nzira yokuungwaru uye anoziva nzvimbo yahwo

²⁴(Nokuti anoona kwakaperera nyika uye anoona chose chiri pasi pedenga.)

²⁵Paakapa mhepo simba rayo achiyera mvura nechiyereso

²⁶achipa mvura inonaya mitemo yayo, nemheni inodhiriridza nzira yayo

²⁷ndopaakanyatsohuongorora akahuona akahurangarira akahuera udzame hwahwo.

²⁸Ndipo paakati kuvanhu kutya Mwari ndihwo hungwaru kunzvenga chitadzo ndiko kunzwisisa.”